1 John 1
Basef ambal namili lagapaifi
1Afaꞌ wandaꞌ basef ifimba ma anona aman agilinama Basef, anen nagasoꞌapa ambal namili lagapaipai. Aman anamba fowaꞌ gani dambadamba nagapani. Afaꞌ wameꞌ basef ananifi eaꞌ, watolona naep afaꞌipi wahapilana lagof afaꞌigufi. a 2Ambal alamba namili lataga eaꞌ afaꞌ watolol naep afaꞌipi. Isimba atis deiꞌ afaꞌ wawalipipa ma ambal alamba lagape dondol lifilafii. Ambal alamba fowaꞌ lape laloma Ahamapa eaꞌ deiꞌ lataga alihigima watolol. 3Hiahaom amamba afaꞌ watolom wagameꞌami deiꞌ waꞌipipam ipaꞌ wapani ma pegape nembel atotombel pegalomafa. Afaꞌ wape wambota atota waloma Ahamapa nagaloma Nogamana ananinai Jisas Krais. b 4Afaꞌ wandaꞌ basef ifimba ma atiasi dagala apeꞌini negataga luꞌwin siꞌina apaꞌ. cGod anen nogogalaꞌ nandaꞌ waf buꞌwafi usiꞌifi atifi
5Basef ifimba afaꞌ wameꞌanamef naꞌamba. God anen nogogalaꞌ afitinai. Ina anota akot tailana kwasakwasala, owaꞌatin endilisi. d 6Iꞌi apaꞌ miꞌi mape nembel atotombel malomana, ama apaꞌ ataꞌ mape mandaꞌ waf awafi siꞌi magape akot atotai, apaꞌ mambasoꞌma apaꞌ atepa ma basef apeꞌifi faloma feꞌ apeꞌini. e 7Anen nogogalaꞌ afitinai. Iꞌi mope mogalaꞌ siꞌi anen waf awafi akapa, eaꞌ mope nembel atembel moloma sahin owan hiasi. Eaꞌ esimbel Jisasi Nogamana Godi basaꞌopa waf awafi apeꞌifi hiafi hiꞌalaf, eaꞌ mataga beꞌepa. f 8Iꞌi apaꞌ miꞌi waf awafi akapa, apaꞌ mambasoꞌma apaꞌ atepa eaꞌ basef endilisifi ina fapaepa, owaꞌatin. 9Iꞌi apaꞌ mowalapa waf awafi apeꞌifi alihif, atiasi anen nokwahomapa waf hiafi awafi apeꞌifi okom masoꞌanafa nosaꞌopapa mogataga beꞌepa hililiꞌ. Basef fowaꞌ nagalaꞌ lapafi eaꞌ nilif nondaꞌ waf usiꞌifi datima. 10Iꞌi apaꞌ miꞌi, “Apaꞌ owaꞌ mondaꞌ waf awafia”, apaꞌ mofala God maꞌi anen aman nagaꞌi basef basoꞌafii. Eaꞌ basef ananifi ina fape opalef apeꞌilifi, owaꞌatin.
Copyright information for
AOJ