1Pe 4 | AOJFILIFITA | STEP | Krais nofaꞋ nimanimi alop ananinai eaꞋ ipeꞋ wapotiꞋ ukup motaga laꞋifim naꞋama etin siꞋi Anan. DeiꞋ main, emi egafis ipeꞋisi sefaꞋ nimanimi ma alop asasinai, esis sakwaha waf aonai.

‏ 1 Peter 4

ApeꞋ mofaꞋ nimanimi ma mokwaha waf aonai

1 Krais nofaꞋ nimanimi alop ananinai eaꞋ ipeꞋ wapotiꞋ ukup motaga laꞋifim naꞋama etin siꞋi Anan. DeiꞋ main, emi egafis ipeꞋisi sefaꞋ nimanimi ma alop asasinai, esis sakwaha waf aonai. 2 EaꞋ deiꞋ nogota anaeꞋ ipeꞋ ataꞋ pape etap anaeꞋ, ipeꞋ pefeꞋ pila okom Godi atona nahopepa pefeꞋ pefeꞋ petagama pegaꞋ. EaꞋ okom aonai nehafema waf aonai, owaꞋ. Hapainai. 3 FowaꞋ ipeꞋ pape nogota launai eaꞋ pafeꞋ paila waf naninani aonai esis sololama Godi ukup maꞋianai. Waf anama naꞋama, waf aonai soꞋa waolanai, ukup mahaga magaolasanai, ukup mohafela waf aonai eaꞋ saꞋ embel laꞋifimi ma ukup mahaga magaol eaꞋ saꞋ gwaꞋaimi embel laꞋifimi nogota launai eaꞋ sandatama etifigin saꞋ embel laꞋifimi mamumami sosambala basef Godi ma sandaꞋ waf aonai, sandaꞋ lotuma god basoꞋomunai. Nogota pafeꞋ paila waf anama deiꞋ hiꞋalana. 4 DeiꞋ epes isima sololama Godi gegelalasis sati ipeꞋ owaꞋ pendaoꞋoma pelomas pendaꞋ waf anama hianai aonai. NaꞋama deiꞋ saꞋipipa basef awami findiwama ipeꞋ. 5 Anan nandandombam nowaloga epes isima sapani soloma sagaꞋi. Esis anona nemaf sowalapa waf aonai esis sandaꞋanai sogwamana basef Anan ama waf anama ofagena esis sandaꞋanai. 6 Amama atom fowaꞋ basef buꞋwami Godi mafeꞋ matagama epes isima sagaꞋi wapotiꞋ. Ama God nowaloga esis siꞋi anona nemaf nowaloga epes hiesi hiꞋilas. Basef amama buꞋwami mafeꞋ matagama esisa sope namis ambagof asasimi siꞋi God nape namona.

ApeꞋ mondaꞋ maol andeandeꞋ mumafi presen amamaga buꞋwami God naseꞋapam naꞋai

7 Nogota amamaga amama maꞋi hiꞋilamanai nafiꞋi felefeleꞋ. Amama atom ipeꞋ ukup mope andeandeꞋ eaꞋ pimafi alop ipeꞋinai andeandeꞋma ipeꞋ laꞋifipa ma pendaꞋ beten. 8 Basef luꞋwami mape maliꞋma basef hiami amama. IpeꞋ ukup mimila sahin owan ipeꞋisi laꞋifipa endilisi. DeiꞋ main, waf anama ukup mimilasanai naseꞋala waf hianai aonai eaꞋ nikilaꞋ waf hianai hiꞋalana. 9 IpeꞋ piꞋi ahoꞋma pigiambama enis alupusi deindeiꞋas sifiꞋi ifagw ipeꞋimi pimafias andeandeꞋ. IpeꞋ ina opalef aoma esis, owaꞋ. 10 IpeꞋ hipei atona etin pefaꞋ presen naninani buꞋunai hianai Ambal BuꞋunai Godi nasiꞋipanai. EaꞋ pimafi presen anama ipeꞋ atona etin andeandeꞋ ma pigiambama esis sahin owan. Pimafiana naꞋama. 11 Emi egafis sowalapa basef, esis siꞋiam siꞋi sawalapa basef Godi atom. EaꞋ emi egafis sondaꞋ maola sigiambama enis epes, esis sondaꞋana pepel anama God naseꞋasanai. Ama epes hiesi siti maol anama hianai buꞋunai sondanifel sefela agel Godi ma Jisas Krais atona. Agel luꞋunai noloma pepel nafifili hianai Ananinai atona laꞋelaꞋef hihif. Endilisi etis.

ApeꞋ mofaꞋ nimanimi moloma Jisas

12 IpeꞋ Kristen alupipei endilisi, anom hiahaom meagwambipei miꞋi motagama ipeꞋ, ipeꞋ ina piꞋi amama anom amamaga awami matagamepa pehafel gegelalasipa ma amama, owaꞋ. Nimanimi amama ipeꞋ pefaꞋam paloma Krais. 13 EaꞋ ipeꞋ pendanifel pefaꞋ nimanimi amama. Ama anona nemaf agel luꞋunai ananinai noloma nafifili ananinai notaga, nemaf anama ipeꞋ pendanifel endilisi.

14 IꞋi enis siti ipeꞋ pitu laꞋifipama Kraisa siꞋipipa basef awami findiwaimi, andeandeꞋ, ipeꞋ pendanifel. DeiꞋ main, nimanimi amama mihiꞋambepa Ambal BuꞋunai Godi nafifili deiꞋ napaipa. 15 AeꞋ andaiwaꞋ endilisi ma enin epen ipeꞋini neha enin epen negaꞋ o nendaꞋ wal o nendaꞋ waf aonai naninani o niꞋi nepe niliniliꞋ ma maol enis epesi, owaꞋ. AeꞋ andaiwaꞋma enin epen ipeꞋini nendaꞋ waf aonai ma soseꞋana nimanimi. Amama owaꞋ, aom. 16 EaꞋ iꞋi ipeꞋ pefaꞋ nimanimi ma pataga Kristen, andeandeꞋ. IpeꞋ ina ambagof aoma amama pefaꞋam, owaꞋ. IpeꞋ pinifela Goda pepan epes Kraisi.

17 Nogota anama mataga eaꞋ ma deiꞋ God nowaloga epes hiesi Ananisi ma basef luꞋwami. IꞋi God niliꞋ nowaloga apeꞋ miliꞋ, anona nemaf nigiꞋ nowaloga epes isima sosambala basef buꞋwami Ananimi sope siꞋimama? Esis sofaꞋ nimanimi luꞋwami. 18 SiꞋi basef Godi mail Baibeli maꞋiam maꞋi,

“IꞋi ahifima God nofaꞋai epes buꞋwasi sotanimani, deiꞋ epes isima sowaꞋ alafugaha Godi soloma isima sandaꞋ waf aonai anona nemaf sope siꞋimama? Esis sope awes sofaꞋ nimanimi luꞋwami.”
19 EaꞋ emi egafis sofaꞋ nimanimi ma saila okom Godi, isima sondaꞋam naꞋama. Esis sope sondaꞋ waf buꞋunai atona eaꞋ sosoꞋ esis sofeꞋma God numafias. God nandaꞋ epes hiesi sataga sapan. EaꞋ naila basef Ananimi andeandeꞋ laꞋelaꞋef.