Jam 2 | AOJFILIFITA | STEP | Sahin owan aeꞋipei, ipeꞋ pembaleꞋefa Dembinai apeꞋinai Jisas Krais, Anan Dembinai nafifili endilisi. EaꞋ deiꞋ ipeꞋ ina pigiambama epes isima agufisi etis eaꞋ pewaꞋ alafugaha epes agof aꞋasi, owaꞋ. PendaꞋam naꞋama etin.

‏ James 2

ApeꞋ mimila epes hiesi dembesi awasi naꞋama etin

1 Sahin owan aeꞋipei, ipeꞋ pembaleꞋefa Dembinai apeꞋinai Jisas Krais, Anan Dembinai nafifili endilisi. EaꞋ deiꞋ ipeꞋ ina pigiambama epes isima agufisi etis eaꞋ pewaꞋ alafugaha epes agof aꞋasi, owaꞋ. PendaꞋam naꞋama etin. 2 Basef amama ofagema naꞋama. IꞋi anona aman amamaga hiamunai nondaꞋ trausis siot sosaf buꞋwami nola ring gol faf ananinai ma nuwis ipat anama pandaꞋ lotuwanai nomon, ma iꞋi anona aman kwahuna ma otamba luwaguf maim nuwis wapotiꞋ, ipeꞋ atuwasi pendaꞋ maina anan? 3 IꞋi ipeꞋ pendaꞋ aman anama luwaguf maim buꞋwami piꞋipana piꞋi, “IneꞋ fiꞋi balata buꞋunai naꞋae”, ama iꞋi aman anama kwahunai nuwisi piꞋipana piꞋi, “IneꞋ nitu gani”, o niꞋi “Nepe gani etap felefeleꞋma boꞋwagah aeꞋami”. 4 IꞋi ipeꞋ pendaꞋam naꞋama, atuwasi ofagema awami ipeꞋimi. IpeꞋ pawaloga sahin owan ipeꞋisi ma ukup ipeꞋimi, eaꞋ ipeꞋ ina pawalogas paila waf buꞋunai naꞋama etin, owaꞋ. IpeꞋ pawalogasa ukup awami atom.

5 IpeꞋ sahin owan aeꞋipei, ipeꞋ pemeꞋ! God nandandepa epes isima kwahusi ma otamba hiahaom maim ma deiꞋ sape laꞋifis sombaleꞋefana laꞋelaꞋef sape boꞋwes andeandeꞋ siꞋi epes isima amamaga hiamisi. Anan nandandepasa sofaꞋ amamaga buꞋwami wambel Ananinai. Amamaga amama naꞋi basef endilisimi atom laꞋifimi nosoꞋ emi egafis ukup maimaila Godi. 6 EaꞋ ipeꞋ pandaꞋ epes isima kwahusi ambagof aom. Emi egafis sandaꞋ ambagof ipeꞋimi aom saseꞋepa nimanimi sandaꞋmepa basef? Esis amamaga hiamisi. 7 God naseꞋepa agel buꞋunai Krais eaꞋ ipeꞋ Ananipei. Epes isima etis saꞋi basef awami sandaꞋ findiwama agel anama.

8 Dembinai King apeꞋinai numafi apeꞋ hiapai, anan naseꞋapa basefa miꞋuli Ananinai mape Buk Baibeli. Basef amama maꞋiam maꞋi, “IpeꞋ ukup mimila emi egafis sape felefeleꞋma ipeꞋi siꞋi ipeꞋ ukup maimaila ipeꞋ atona etin.”

IꞋi ipeꞋ pila miꞋuli anama, pendaꞋ waf buꞋunai andeandeꞋ. 9 IꞋi ipeꞋ pigiambama enis epes, pewaꞋ alafugaha enis, miꞋuli anama atona nandaꞋ kotimipa ma pandaꞋ waf anama pesambala miꞋuli anama. 10 DeiꞋ main, emi egafis sila basefa miꞋuli hianai hiꞋilana eaꞋ sesambala anona miꞋuli anama atotona anom basef tuꞋwanim kwaieꞋum, epes isima ofagema asasimi siꞋi sawala miꞋuli anama hianai hiꞋalana. 11 DeiꞋ main, anan naꞋi basef amama naꞋi, “IpeꞋ owaꞋ peha enis epes sogaꞋ.” IꞋi ipeꞋ owaꞋ pendaꞋ waf anama soꞋa waolanai, eaꞋ paha enin epen nagaꞋ, ipeꞋ pataga epes aopei pesambala miꞋuli Godi.

12 Anona nemaf God nowaloga apeꞋ ma anona miꞋuli nandaꞋapa mope wafifipa. EaꞋ laꞋelaꞋef ipeꞋ piꞋi basef pendaꞋ waf nondahama miꞋuli anama. 13 DeiꞋ main, emi egefis owaꞋ siti uwahipis enis epes, owagama God ina niti epes isima uwahipisa nemaf anama nowaloga esisanai, owaꞋ. EaꞋ emi egafis siti enis epes uwahipis, God anona nemaf ina nowaloga epes isima niꞋi awes, owaꞋ. Waf anama apeꞋ miꞋi uwahipisanai nikilaꞋ endilisi.

BaleꞋef atona wafinai, waf buꞋunai ina napeis, owaꞋ

14 IpeꞋ sahin owan aeꞋipei, iꞋi enin epen niꞋi, “AeꞋ embaleꞋefa Krais” ma waf ananinai ina boꞋona, baleꞋef ananinai falafunai atona. BaleꞋef anama ina laꞋifina ma anona nemaf God nofaꞋan notanimani, owaꞋ. 15 BaleꞋef anama falafunai nape naꞋama. IꞋi enis sahin owan sape sala luwaguf awami o gwaꞋaimi aꞋas, eaꞋ 16 enin epen ipeꞋini niꞋipa epes isima niꞋi, “IpeꞋ opalef awanem pefeꞋ pefaꞋai luwaguf ipeꞋimi pewaheꞋam pembahoꞋ alop ipeꞋinai pefeꞋ peaꞋ gwaꞋaimi buꞋwami!”

IꞋi ipeꞋ piꞋiam naꞋama, basef amama ipeꞋimi ina mataga endilisi, owaꞋ. Basef amama ipeꞋimi migiambamas miꞋimama? OwaꞋetin. Falafumi atom. 17 BaleꞋef naꞋama etin. IꞋi enin epen nembaleꞋef etin ina nandaꞋ waf buꞋunai naloma baleꞋef ananinai, baleꞋef anama ananinai falafunai atona.

18 EaꞋ enin epen naꞋi, “IneꞋ epen nembaleꞋefa Krais eaꞋ aeꞋ andaꞋ waf buꞋunai.”

DeiꞋ aꞋipa epen inima naꞋama aꞋi, “IneꞋ nihiꞋambe baleꞋef anama ineꞋinai waf buꞋunai owaꞋ neataga nelomana. Waf buꞋunai aeꞋ andaꞋanai ihiꞋambena baleꞋef aeꞋanai.”

19 IneꞋ nembaleꞋefana naꞋama naꞋi, “God atotona nape.”

IneꞋ naꞋi naꞋama, andeandeꞋ. Ambagof awami wapotiꞋ mombaleꞋefana naꞋama etin eaꞋ umbamaham bombol etin kwapeteꞋam. 20 IneꞋ aman okom nahaga nagaolinai, ineꞋ nembaleꞋefa Jisas atona, ama ina nandaꞋ waf buꞋunai wapotiꞋ, baleꞋef anama ineꞋinai falafunai atona. DeiꞋ ineꞋ naꞋi negawa anama ofagema? DeiꞋ iꞋipina.

21 FowaꞋ gani akunamapa apeꞋinai Abraham naꞋi nondolali ma nogalomana ananinai Aisak nondolalimana ma Goda balata anama sondolalima Goda. Amama atom deiꞋ God naꞋipana naꞋi anan aman boꞋona andeandeꞋ. Anan nandaꞋ waf buꞋunai deiꞋ God naꞋipana basef amama naꞋama. 22 IneꞋ negawa o owaꞋ? BaleꞋef Abrahami naloma waf buꞋunai anan nandaꞋanai amama mandaꞋ opeh etifigin. EaꞋ waf buꞋunai anan nandaꞋanai nagiambama baleꞋef ananinai nataga alihina andeandeꞋ. 23 EaꞋ basef amama mail buk Baibeli mataga alihim mandawalap. Basef amama maꞋi, “Abraham nembaleꞋefa God, deiꞋ God nofalana naꞋi anan aman buꞋunai andeandeꞋ.”

EaꞋ God nofalana naꞋi, “Anan alupunai AeꞋanai.”

24 Basef amama mail buk Baibeli mihiꞋambapa deiꞋ ipeꞋ pegawa baleꞋef atona God ina naꞋi epes boꞋwes andeandeꞋ, owaꞋ. Esis sombaleꞋef endilisi ma sandaꞋ waf buꞋunai wapotiꞋ, anan nofalas naꞋi epes buꞋwasi andeandeꞋ.

25 NemataꞋw akwama Rahap kwandaꞋ waf soꞋa waolanai, akwaꞋw naꞋama etin. God nati waf buꞋunai akwaꞋw kwandaꞋanai deiꞋ okom napomaꞋw naꞋi akwaꞋw nemataꞋw boꞋokw andeandeꞋ. Waf buꞋunai akwaꞋunai kwagiambama amam Juda mandambahoꞋ mafiꞋi eaꞋ kwihiꞋambam anona eaf mafeꞋ wafifim.

26 EaꞋ basef amama mape naꞋama. IꞋi alop atona ambal owaꞋ nopaipa, alop anama nagaꞋ eaꞋ. NaꞋama etina emi egalin nembaleꞋef etin ma ina nandaꞋ waf buꞋunai, baleꞋef epen inima falafunai atona.