Jam 4 | AOJFILIFITA | STEP | Maina waf ofagena ma nandaꞋ ipeꞋ pandaꞋ lopaꞋ fitap pape laꞋafena ipeꞋ? Ukup awami atom mafela ipeꞋ deiꞋ pandaꞋ lopaꞋ fitap laꞋelaꞋef opalef nomon, alop andeꞋ wapotiꞋ. EaꞋ amama atom.

‏ James 4

Emi okom nainaila waf etapanai, enin nandaꞋ naumbih naloma God

1 Maina waf ofagena ma nandaꞋ ipeꞋ pandaꞋ lopaꞋ fitap pape laꞋafena ipeꞋ? Ukup awami atom mafela ipeꞋ deiꞋ pandaꞋ lopaꞋ fitap laꞋelaꞋef opalef nomon, alop andeꞋ wapotiꞋ. EaꞋ amama atom. 2 IpeꞋ ukup maꞋimaꞋi amamaga hiami mamumami eaꞋ ipeꞋ ina pefaꞋam, owaꞋ. EaꞋ deiꞋ ukup aom paha epes sagaꞋ. IpeꞋ gegelalasipa ma amamaga hiami enis epesi, eaꞋ ipeꞋ ina laꞋifipa pefaꞋam, owaꞋ. EaꞋ ipeꞋ pandaꞋ lopaꞋ fitapa paꞋi pefaꞋam. OwaꞋetin. DeiꞋ main, ipeꞋ ina pahaliꞋ Goda amama, owaꞋ.

3 Nemaf anama ipeꞋ pandaꞋ betena pefaꞋ amamaga amama, ipeꞋ ina pefaꞋam, owaꞋ. DeiꞋ main, ukup ipeꞋimi ina mape boꞋom etifima pahaliꞋ God, owaꞋ. IpeꞋ ukup maꞋi pefaꞋ amamaga pendaꞋam pefaꞋam pekwahom amama ukup ipeꞋimi atom.

4 IpeꞋ pakwaha waf Godi eaꞋ pafeꞋma waf aonai siꞋi amam nematawa sakwaha waf buꞋunai daseꞋamainai ma sandaꞋ waf aonai soꞋa waolanai. IpeꞋ pegawa amama. Emi egafis ukup maila waf etapanai, esis sandaꞋ naumbih saloma God. DeiꞋ pegawam. Emi egafis ukup maila waf etapanai, esis deiꞋ sandaꞋ naumbih saloma God. 5 IpeꞋ ina piꞋi basef Godi mail buk Baibeli falafumi, owaꞋ. Basef amama maꞋi naꞋama maꞋi, “Ambal anama napaipai God naseꞋapana nandaꞋapa ukup matamea ma mofaꞋ amamaga mamumami hiami.”

6 EaꞋ God nagiambamapa naꞋa nandaꞋapa mataga laꞋifipa. Waf anama Godi nikilaꞋ waf aonai siꞋi basef mail Baibeli maꞋiami,

“God nosambala epes isima sasambala basef Ananimi eaꞋ nagiambama epes isima sandaꞋ esis safe owina Anan.”
7 EaꞋ deiꞋ ipeꞋ pefeꞋ owina God. IpeꞋ pewaꞋ alafugaha Satana anan nokwahipa nofaꞋ nefeꞋ. 8 IpeꞋ pifiꞋi felefeleꞋ endilisi ma Goda Anan nifiꞋi felefeleꞋ endilisi ma ipeꞋ. IpeꞋ pandaꞋ waf aonai, pekwaha waf anama ipeꞋ pandaꞋanai siꞋi epes sasaꞋopa lagof asasimi mataga boꞋom. IpeꞋ epes malogof biamipei, ipeꞋ pekwaha waf anama eaꞋ pendaꞋ ukup ipeꞋimi motaga boꞋom. 9 IpeꞋ pandaꞋ opalef ipeꞋimi aoma waf aonai ipeꞋ pandaꞋanai, pelef mehipa waf anama pekwahona eaꞋ hapainai. IpeꞋ deiꞋ pandaꞋ iafi, pemboma opalef pelef. IpeꞋ deiꞋ pandanifel, ipeꞋ pendaꞋ opalef ipeꞋimi aoma waf anama aonai. 10 IpeꞋ pefeꞋ owina Dembinai ma Anan nefelepa nendaꞋepa petaga laꞋifipa.

ApeꞋ ina mowaloga sahin owan apeꞋisi ma basef awami, owaꞋ

11 IpeꞋ ina piti waf sahin owan ipeꞋisi sandaꞋanai piꞋi aona, owaꞋ. Epen niꞋi basef awamima enin alupini o newaloga sahin owan ananisi, epen inima enin naꞋi basef awami nawaloga miꞋuli Godi. IꞋi ipeꞋ piꞋi basef awami pewaloga miꞋuli anama, ina ataꞋ paila miꞋuli anama, owaꞋ. EaꞋ pape siꞋi dembipei jas pawaloga miꞋuli anama. 12 God atona nawalapa miꞋuli Ananinai eaꞋ Anan atona jas nowaloga epes. Anan atona laꞋifina ma nefaꞋapa mokwaha waf aonai apeꞋ mandaꞋanai motanimani eaꞋ laꞋifina ma nohapa wapotiꞋ. EaꞋ deiꞋ ipeꞋ emi egafipa ma piꞋi basef pewaloga epes isima sape felefeleꞋma ipeꞋ? NaꞋama hapaimi.

ApeꞋ ina mefela agof apeꞋimi ma maina maol nambimb miꞋi meandaꞋanai, owaꞋ

13 Enipa ipeꞋ paꞋi naꞋama paꞋi, “DeiꞋ o naman afaꞋ ofeꞋ wambel luꞋunai taun ope ondaꞋ maola bisnis afagol atotona ofaꞋ otamba hiami.”

IpeꞋ paꞋiam naꞋama, pemeꞋ basef aeꞋami. 14 IpeꞋ ina pegawa maim amamaga naman meatagamepa, owaꞋ. Ambagof ipeꞋimi ataꞋ mape namum laꞋelaꞋef hihif? IpeꞋ siꞋi nogoh mataga mape nogota bandana mafeꞋ hiꞋalam nemaf atotona. 15 IpeꞋ ukup miꞋi, “Okom Godi niꞋi aꞋe, ope namofa ondaꞋ opeh amama o anom opeh.”

PiꞋiam naꞋama, andeandeꞋ. 16 EaꞋ deiꞋ ipeꞋ paꞋi diga luꞋunai paꞋi ipeꞋ etipa laꞋifipei pafela agof ipeꞋimi atom. Waf anama naꞋamainai aona. 17 IpeꞋ pegawa andeandeꞋ. Emi epen negawa ma nendaꞋ waf buꞋunai ma enin owaꞋ nondaꞋana, enin nandaꞋ waf aonai.