Rom 15 | ASO | STEP | Laza monoku' amuzo molo nonive nene leli' lutelokovo' ogo molo minamo monoku' gilizevo i nizave hize ele' o-ngedo engi' geni ngibiline' inite' nene lazasi gehe-ngedelonido' o neive.

Romans 15

Laza Leli' Lutelokovo' Ogo Molo Minamo Kilisito' Ogo Molo Minidi'mine Ogo Leze Zuho Monoku' Gilizevo I Minani' Nene Hize Ele' O-ngedelone Lo Paulo' Line' Gamazi

1 Laza monoku' amuzo molo nonive nene leli' lutelokovo' ogo molo minamo monoku' gilizevo i nizave hize ele' o-ngedo engi' geni ngibiline' inite' nene lazasi gehe-ngedelonido' o neive. 2 Laza hamo hamo' muki' nene leze zuho monoku' do amuzo molo-ngedelingumu' ve lo do lamine' o-ngedelesa nene ingine gilavo lamine' iline' initekovo' ogo molo minuke'zo. 3 Nene nanitekumu' ve. Laza nene Kilisito' idi'mine ogo ogo molo minelone' o neinako nemu' ve. Kilisito' aza nesi ei' lulolokovo' ogo molo amine'za mono' godolou' ti' li gizi nizani' nene eito' gihile izine' ve:

O'mosoo, gei' divi ledivi' i-gidaa' avete
divi ledivi' i-gidi lani' ne'mi geni've nene neni' nogihuve.
4 Ido' naza mono' godolou' gizi nizani' gamazimu' noluvoni' nene nemu' noluve: Gozopo' gizi nizani' gamazi muki' nene O'moso'mo a'mine gamazi leli' nene mono' apize lemelive lo gelo lavo gizi nizani' ve. Ee, monoku' amuzo mili mini geni ha gihi di dizi minilizado' nene a'mine gamazi ne'mo lu'ine do ngi lo-ngedavo ga'ine sita' gilami lukuvo nalizangumu' nene gilingili igi gizebo igi minilizave lo gelo O'moso'mo lavosa a'mine gamazi nene gizi nizani' ve. 5 Ido' lingine lutine gatinesi ido' gamazitinesi nene di hamo' igisa Guvetesi ve Izesu' Kilisito' melehine O'moso nene opo'ni li di naba i-dilizave lo monoku' amuzo molo geni gehe do dizo minaa' monovo ido' lute do ngi laa' monovo do soto' ive O'moso ne'mo nene lingine Izesu' Kilisito'ni e'meti nizavo gatine gilaa' nani' nene do hamoli'mine o-lengedeliho.

Kilisito' Aza Zuda Vesi Ido' Heta Ato' Vesi Lele'mize Lamine' Ine' Nenako Laza A'mine'mine Ogo Ge Nele'mize Lamine' O-nede Ne Gele'mize Lamine' O-gede Lo Minelone Lo Paulo' Line' Gamazi

7 Nemu' nene O'moso opo'ni li di naba i-dilizangisi Kilisito' aza lengikisi lengele'mize lamine' idi'mine igi lingine ge nele'mize lamine' o-nede ne gele'mize lamine' o-gede li minilo. 8 Ido' Kilisito' lengi' evene' ato ato' lengele'mize lamine' ine' gamazi noluvoni' nene nemu' noluve: Kilisito' aza O'moso'mo gamazi laminetokovo' laa' neine' nene do soto' ogo O'moso'mo Zuda veti avotemotinemu' lo huko lo-ngidine' gamazi nene do gihile izelesa gelekele' ve lolo' ogo O'moso'mi noso okodela mulunive Zuda ve lelita nene gono dani' ve. 9 Ido' Zuda ve lelikumukovo' ani' nevoba asi O'moso'mo heta ato' vesi ise'ine izavo inginesi a'minemu' opo'ni li di naba i-dilizangumu' ve losa nene engikumukisi ani' ve. Ido' ne'mine ine' nene mono' godolou' ti' li gizi nizado' nene e'metosa ne'mine ine' ve:

Nemu' nene O'mosoo, heta ato' veti vovo'ningu' mino gopo'ni lolosuve.
Ee, gei' guliveka do hozi lo nama lolosuve.
10 Ido' ma nene ti' li gizi nizani' ve:

Heta ato' ve lingine O'moso'mi evenelesi makato' longolize izi minilo.
11 Ido' gohi ma ti' lo neive:

Heta ato' ve lingine muki' nene O'moso opo'ni li minilo.
Ee, evene' zuho ato ato' muki' ingine nene
O'moso opo'ni li minilizani' o neive.
12 Ido' polohete Isaia' nesi nene ti' lo ma line' ve:

Guvelesi ve Davidi' meleho Zesai' a'vopilemo' zuhouti' nene
ve ma soto' oloseive.
Aza nene heta ato' veti guve'inesi ve lolo' ogo gizebo o-ngedo neivo
heta ato' ve ingine gilingili igi ezemu' gili ele'vole' ilisave.
13 Ido' lukuvo naloningumu' nene gele mu'musi' oga' monovo do soto' ive O'mosomu' nene gili ele'vole' igi nizavo aza lavo muludingu' nene gulumo avile atoli'mine ogo lisivo hongu gehepeve lo neivo O'moso'mi Sikalahu' ne'mo lukuvo nalizangumu' nene gili mu'musi' ilizani' amuzo nene lengemavo ne'mo vauve ilisa gili mu'musi' igi minavoo.

Luhuvo Nite' Mene Nogize-lingimuvoni' Nene O'moso'mo Nimine' Gono Nodosa Nogize-lingimuve Lo Paulo' Ei' Gono Dani' Monovo Line'

14 Neze zuhokizo, neni' lengikumu' giluvoni' nene mo ne'mine losa gele ele'vole' ogo gele nouve: Ado' lengita nene monovo lamine' vai' lo neivo gamazi monovo ato ato' muki' nene mo gili minisa lingine ne gaka doo do akalo' o-gede ge ga'ne doo do akalo' o-nede li minilizado' lisihe' i nizave losa gele nouve. 15 Ne'mine lo gele nouha eze O'moso'mo neni' ninge lamine' do heta ato' ve lengita gono nimine' nenako nemu' nene mono' linge ma gohi do gatido' molalove lo luhuvo nite' mene nogizuve. Ido' gamazi linge ma nogizuvoni' nene amuzo malehe gamazi nogizuvoni'za neemukisi nehelele izamivo ha nogizuve. 16 Ee, O'moso'mo Izesu' Kilisito'ni gelekele' ve've lolo' ogo heta ato' vemu' nene gono daline lo nele'mize molavo naza eveneto' medelo mino O'moso inite' lehize-daa' uve gelo O'moso'mi Sikalahuli'mo do kekeize lo-ngedavo O'moso'mo ninge lamine' ilido' i nizavo naza heta ato' ve nene O'moso'mine lehize-delove lo O'moso'mi gamazi lamine' nene heta ato' vesi lo soto soto' ogo lo-lengemaa' nouve. 17 Nemu' nene naza giluvo Izesu' Kilisitoda gi'mize mino O'mosomu' gono daa' nouvoni' nene dizo minavo naza a'minemu' nolize izo mino laa' nouve. 18 Ido' inite' mamu' lolovoba asi O'moso'mi Sikalahuli'mo amuzo nemavo na'nise'ne gamazi noluvosi ido' ngehelele izeline' inite' oso' amoso' suno ato ato' ngelebizo ogo molo nouvosi Kilisito' aza heta ato' ve do eito' gelekele' o-ngedelesa ine' initekumukovo' nene lovo' kiselevo' ogo lolosuve. Ido' noluvoni' ne'mine ogo Zelusalemi numuno ebetoti' api' ogo Kilisito' gamazi've lamine' nene lo soto soto' o'mo vo mo Ililikumi misubola vo pelekuve. 20 Ido' ne'mine noogo naza evene' mali'mo gono dado' imine' molo damo Kilisito' gulive've olihe gilamadaavo' nene ezemu' gamazi lamine' lo soto' ogo lo-ngemelove losa neni' lu'ne'mo gilido' nene e'metuvoni' ve. 21 Ne'mine nouvo mono' godolou' ti' li gizikani' gamazi nene vo gihile izine' ve:

Ezemu' gamazi gilamave ingine nene ningilisave.
Ee, eze gamazi gilamave a'minemu' gili guno ilisave.

Loma Ebeku' Vo Ninge-ngedelesa Gilingumu' Paulo' Lo-ngemo Line' Gamazi

22 Ne'mine ogo gono do mineloni' neidi'mo naza lengita alosa giluvoni' aka'ne nene hize tile-nidine' ve. 23 Ne neiha idise mene noluvoni' misubola nene gono daloni' ebe' gohi ma nomivo naza kilisimasi mukiku' lengita volove lo amuzo molo giluvodo' e'meto lengita alosuve. 24 Ido' alosuve noluvoni' nene Sipeni misubou' volosa aka novosa lingine ninge-lengedelesa lengita vo hetelo lengikisi nene gamene linge ma minekuvo a'mida voloni' aka'ne nene vili-nidi hize ele' i-nidikevo volosuve lo gele nouvoni' nemu' noluve. 25 Ne neiha idise naza O'moso'mi evenele zuho Zelusalemi ebeku' nizani' nene hize ele' o-ngedelesa a'mida novuve. 26 Ido' novuvoni' nene Izesu' evenele Makedonia misuboukisi Akaia misuboukisi Izesu' evenele Zelusalemi ebeku' minanguti' goho' gahali' alevemu' nene moni do nubuho ogo ngemelone lisa di nubuho ani' nemu' nene novuve. 27 Ee, angise'nidati' ne'mine olone li ani'za lute do lamine' oga' inite' Zuda velati' soto' ine' nene heta ato' ve lengita ma inele ani' nenako nemu' nene a'mido' golo hizi okode do lamine' oga' inite' lengita neine' nene Zuda vela inele ma ilizani' o neido' nizanako a'mine ani' inite' nene engita dina' ne'mine minine' nene apaselido' o minine' ve. 28 Ido' a'mine gono do oku' lo ingine mono' gihile di soto' igi moni di nubuho ani' mene dalizaveti a'ningu' gehepeve molosa Zelusalemi numuno ebe' hulo lengita ogosa Sipeni misubola volosuve. 29 Ido' naza lengita voloni' nene Kilisitodati' no'noho' vauve elo do-lengedo alosuve lo gele nouve.

30 Neze zuhokizo, naza amuzo molo ti' lo longo' noo-lingiduve: Lingine Guvetesi ve Izesu' Kilisito'nimu' ve li ido' O'moso'mi Sikalahuli'mo lute ne geme ge neme lo minaa' monovo do soto' o-ledaa' neingumu' ve li naza amuzo molo O'mosola laa' nouvodi'mine igi linginesi imine' mili nenikumu' nene amuzo mili O'mosola li'mi vi minilo. 31 Ido' O'mosola lilizani' nene naza Zudaia misubouko volongu' nene a'mida Kilisito'nimu' gili ele'vole' amavelite nibililisa gili nilizanguti' nene lukuvo nalongumu' ve li ido' Izesu' evenele zuho Zelusalemi numungu' nizani' ingine do vo ngemeloni' initekumu' o'ove lami lu'ine laminetoti' dalizave li O'mosola lilo. 32 Ido' ne'mine likevo O'moso'mo gele lengemavo ne'mo nene naza lu'neu' gulumo avile lisivo O'moso'mi lulolo' noline' nene lengita ogo hetelo lengikisi mino hepe' doo lamine' gelelongumu' nene O'mosola lilo.

33 Hongu lo lamino minaa' monovo lemaa' ive O'moso nene lengi' mukita minivoo. Mo ne'mino miniliho.