1 Peter 2
1 aAloxo ne, la sou ngasu'anu 'ili'ilixo sou ngalea anangenge ulali noxi'a ta vivinge ngatongato'o, mo ngakalakalavoi mo ngavivikala la vaikalamengi temanu uasi, mo ngaiisuiisu, xe saisa'i masumasua ulaa no anangenge uasi. 2Aloxo ta keakea ipaa alavua la imasaxa lexe iiexu susu noxi'a ta neni'a, la sou ngingi kalumo ngasoliu mo ngamasaxau susu ane lailaixe manina. Susu lailaixe ne ane vaikala noxou Lataua lexe ngingi ngano'u la u'oxongengi ngaleme mo ngano'u mauli ane kaluxu uasi. 3 bLa sou ngingi ngatovo nga'oxonu aloxo ne la ngamaisou alauna noxou Tila.Lavo'o sou Mauli Xe ta Mitema Ane Lataua Musosovosi'a
4Ta mitema mipianu lavo'o sou mauli ne, ia ngingi ngane'e noxou xo lavo'o sou mauli ne Lataua musosovosou mo no iou la Anu lailaixe manina. 5 cMo ngingi kalumo aloxo lavo'o sou mauli e Lataua Uleenu utulusou taasou no anu, aloxo ne la ngingi ngaxali ta aili'i noxou Lataua manina. Xo no anu xaixai noxou Iesu Kalisito la ngingi ngelosou maulingenge mulai noxou Lataua loxo mii ma'ia ane lailaixe anu mumasaxau manina. 6 dXo vaikala muai no nano no 'a Lavuku Tavuna teinu muvikala aloxo 'o,“Ngamaisou, eni Lataua amuxaxu lavo'o
sou tani tava'u uai ne Sioni.
Lavo'o sou tani tava'u ne eni esosovosou
xo Anu lailaixe misevile.
Lexe Anu ane umuxaxu tanu noxou
la anu umomomo sou umaela uasisi manina.”
7 eLa sou Iesu muxali loxo lavo'o lailaixe sou tani tava'u noxinge ngingi ane ngemuxaxu tangengi noxou, ia ane'i ane imaxaxu tane'i uasi aloxo kaukavu muai no nano no anu Lavuku Tavuna teinu. Vaikala ane ne muvikala aloxo 'o,
“Ta mitema sou itulusou tani mipianu lavo'o ne,
ia lavo'o ane ne muxali lavo'o sou tani tava'u maninasou.”
8 fMo, vaikala vile la muai no nano no anu Lavuku Tavuna teinu muvikala aloxo 'o,
“Lavo'o ane ne ta mitema itulakisou la ilapau,
mo kulu toxoxa'a utaluxa'a,”
xo ane'i ilomuxu mo imulinu vaikala noxou Lataua uasi. La sou ane'i itulaki, loxo Lataua muxavutalanu lexe ane'i i'oxo aloxo ne. 9 gIa ngingi ne Lataua musosovosinge mo mukalipalangengi ngexali ta mitema noxou manina, mo mu'oxongengi ngexali loxo ta aili'i sou ngaxaxai no nano no tani noxou tatananu tuala. Anu mu'oxonu mo musosovosinge aloxo ne sou lexe ngingi nga'aloxu mii ma'ia lailaixe ane Lataua mu'oxonu noxinge sou mulivulingenge no isivoxo ngeuatu no anu lamana lailaixe misevile noxou. 10 hTei ne ngingi ta mitema noxou Lataua uasi, ia vaimomo 'o la ngingi ta mitema noxou Lataua. Xo tei la ngingi ngalavusou alauna noxou Lataua uasi, ia vaimomo 'o ne ngingi ngelavusou. 11 iTa menexilo e eni emasaxainge misevile, ngingi aloxo ta asila e me'a no tuala vile ine'e ixolu maxuveeni uasi ne avikalangengi pekia'u aloxo 'o. Ngaxolu va'axu no anu masaxa masua sou vasimenge ane u'oto'oto no anu xavutalamenge. 12 jMo nga'oxonu 'ili'ilixo lailaixesi no ie'i ta mitema ane imuxaxu tane'i noxou Lataua uasi. Mo sou ane'i ivikala masua noxinge lexe, “Ngingi ta mitema sou 'ili'ilixo masumasua,” ia ane'i imaisou 'ili'ilixo lailaixe noxinge la i'itinu Lataua ualasou no voxo ane Anu ulivu une'e.
Ngalomuxa'a ta Tatilasinge no Tuala Mo Tatananu Tuala
13 kLa sou ngaxolu no laxa'a ta tatilasinge no tuala mo lapuloto ane ane'i mi'oxonu loxo ngingi noxou Tila Iesu Kalisito. Mo ngalomuxu tatananu tuala ane anu mutila manina, 14mo ta kisi'a ta mitema no 'a tuala sou ane'i ilosi'a ta mitema sou susu tu'utu'umaxu xe iiti ualasi'a ta mitema ane i'oxonu 'ili'ilixo lailaixesi. 15 lXo anu masaxa noxou Lataua lexe ngingi nga'oxonu aloxo ne la vaikala vile umomomo sou ulaa uasisi manina no anaxa'a ta mitema e ivikala lailaixe uasi xe ilavu uasi. 16Mo ngingi ngamuamua'i aloxo ta mitema e Iesu Kalisito mululusinge, ia ngingi ngaxavutala lexe Kalisito mululusinge la ngingi ngamomomo sou ngatalumeiou 'ilixo masumasua noxinge. Uasi, ia ngamuamua'i aloxo ta mitema sou xaixai noxou Lataua. 17 mXe ngataxane'i ta mitema latala mo tangengixa'a ta vivinge noxou Lataua, mo ngamama'u noxou Lataua, la ngataxanu tatananu tuala tila. 18 nNgingi ta mitema sou xaixai ane ngaxaxai no nano no tani, ngaxolu no laxa'a mo nga'ume noxi'a ta tatilasinge. Ngalomuxa'a mo ngatoxone'i ane'i ane ipaipoungengisi, ia ngalomuxa'a mo nga'ume noxi'a ane'i ane ipaipoungengi uasi kalumo. 19Lexe 'ena'ei ane uno'u navunavu, ia u'oxonu susu vile uasi mo tamaxu uxolu no nano no opoonusi ia uxolu se'isisi la anu mumulinu masaxa noxou Lataua manina. Xo 'ena'ei ane anu u'oxonu aloxo ne la Lataua u'osasou. 20 oIa lexe 'ena'ei ane ivauxu susu noxou ia uxolu se'isisi, la sou anu uxali a loxovaa? Anu uno'u sou susu noxou lexe ngingi nga'oxonu 'ili'ilixo lailaixesi ia ngano'u navunavu vitanisi mo ngaxolu se'isisi la anu 'ilixo ane ne Lataua u'osasinge no anu. 21 pXo aloxo Lataua mu'avalinge xo Kalisito muno'u navunavusinge mo musolisinge. No anu vote'i ane ne la Anu mulosiengexu lexe ngingi ngamulinu xua'u.22 q“Kalisito u'oxonu susu vile uasi,
mo vaikala masua vile ulaa no anaxu uasi.”
23 rTa mitema mivivikalasou masumasua ia anu ukoline'i uasi mo ane'i mitetelisou xe mivau la Anu ulivuxa'a mo u'ume uasi. Ia Anu mu'italonu maulixusi mulai noxou Lataua e Anu utilovosou 'ili'ilixo noxi'a ta mitema la utilovosou laixesi. 24 sAnu mutavule susu noxinge no vasimolu teitexi no ovu valautu. Anu mu'oxonu aloxo ne la sou nenge taxolu va'axu no anu susu mo tamulinu 'ili'ilixo mulapu. No anu navunavu mo vovomasou ane ne la Anu mupamaulingengi. 25 tXo ngingi aloxo ta sipsip e mixovulaulau la milai va'axu, ia vaimomo 'o ngingi ngelivu ngene'e noxou itema sou usaxila'a ta sipsip mo tila sou usaxila'u tangenge.
Copyright information for
ATA