1 Timothy 1
1 aEni Paulo, ekaukavunu vaikala ane 'o mulai noxine, nini Timoti. Nini loxo 'alixeni manina, xo nemulaxu taneni noxou Kalisito Iesu. Eni ne, Lataua anu itema sou pamauli ilou Kalisito Iesu, mipalusilo lexe eni itema sou xaixai noxou Kalisito Iesu e nenge tamolo tanenge sou taxomaiou ulivu une'e.Eni alinga lexe alauna mo tanutanuxu mo opo se'isisi noxou Lataua Maminge nenge'a mo Tila noxinge Kalisito Iesu umomomo sou uxolu noxine.
Nasaxila'ine Noxi'a ta Mitema sou Kalakalavoi
3Tei no mine eni elutu sou elai ne Makedonia, la eni elinga'ine pekia'u lexe nini naxolu ne Epeso ne sio. Mo sou navikalane'i ta mitema se'i pekia'u lexe ane'i ilosieixa'a ta mitema lavulavu ane iouvilemo ne uasi. 4 bMo lexe ane'i ixiu tumali'au a'alo vitavitanisi ne mo nana veveeni noxi'a ta 'ilu'ilusune'i ilo'a ta xaixasi'a ne. Mimii ane loxo ne, uxovulaulaulixu xavutalai'a, xe anu ulavusou usu'uline'i ta mitema sou imuxaxu tane'i noxou Lataua mo i'oxonu xaixai noxou uasi. 5Ia, tava'u vaikala pekia'u ane eni elosine 'o ne, xo eni emasaxa lexe ane'i itetelisou 'ilixo sou imasaxai'a ta mitema. Lexe ane'i opone'i ne, malemalengasi mo maninasou xe ane'i imuxamuxaxu tane'i maninasou noxou Iesu, la sou mii tatalu ne, uxalixu 'ilixo ane sou imasaxai'a ta mitema. 6Se'i noxi'a mipolo va'axu no anu 'ili'ilixo ane ne, la sou milai no anu vaikala vitavitanisi ne. 7Ane'i imasaxa lexe ilosieixu ta mitema no anu lapuloto noxou Lataua, ia ilavusou mii ma'ia ane ane'i ilelemolu ne mo ilavusou vaikalai'a tava'u ne uasi.8 cNenge latala telavusou lexe lapuloto noxou Lataua ne, anu mii laixe lexe nenge tamulinu laixe. 9Lapuloto ne, anu sou si'a ta mitema mulapu uasi. Anu sou usu'uline'i ta mitema ta masua aloxo 'o. Ta mitema ane ixiu tumali'au mo imulinu lapuloto uasi. Mo ane'i ane mixiu tumali'a noxou Lataua xe ilavusou i'oxo 'ili'ilixo masumasua. Mo ta mitema ane ilavusou imasaxau 'ilixo noxou Lataua uasi, ia imulinu 'ilixo sou lialia. Mo ta mitema e ilavusou ive'a ta mami'a ilo'a ta neni'a mo ta mitema isoisoli. 10Mo ta mitema ane ilavusou i'oxo'oxonu 'ilixo sou vote'i, mo ta mulu ane ilavusou i'oxo 'ilixo masua noxi'a ta mulu la, mo ta mitema ane ilavusou ipakaline'i ta mitema sou ilotone'i, mo ta mitema sou kalavoi xe ta mitema e i'oxonu pekia'u sou kalavoi noxi'a, la ilemolu manina teitexi. Lapuloto ne, sou usu'uline'i ta mitema aloxo ne, mo usu'uline'i ane'i ane ixiunu tumali'a no anu 'ili'ilixo se'i laixe ane vaikala manina noxou Lataua ulemo kalumo. 11Lavulavu manina ne, anu muxolu no anu a'alo laixe noxou Lataua e Anu itema sou ualusinge. Anu mu'italonu mune'e noxilo sou lexe eni aa'aloxu.
Alauna Noxou Tila Mune'e Noxou Paulo
12 dEni alemolu laixe musuku ulai noxou Kalisito Iesu, Tila noxinge ane Anu mulosilo xavi. Xo musosovosilo mo mulavusilo lexe eni emomomo sou a'oxonu xaixai noxou. 13 eTei, la eni evikala masua mulai noxou Kalisito Iesu mo eni e'oxo masuane'i ta mitema e imulimulinu, mo eni eve'a ta mitema. Ia Lataua tanuxo, xo eni alavusou a'alo laixe noxou uao mo amuxaxu taleli noxou uao. 14La sou Tila noxinge mu'ana'analixo no anu alauna noxou xe musu'ulileli sou emuxamuxaxu taleli noxou Kalisito Iesu, la sou eni emasaxai'a ta mitema kalumo.15 fEni amitema vile sou 'ilixo masua ano, 'ilixo masua noxilo muuli noxi'a ta mitema sou 'ilixo masua mukalusi. Ia Kalisito Iesu mulu'e no lia 'o sou umapaulinenge ta mitema sou 'ilixo masua. Vaikala ane ne, manina misevile, mo anu umomomo sou ta mitema tavu'alo ilomusou mo imuxamuxaxu tane'i no anu. 16Eni amitema sou 'ilixo masua manina, ia Anu tanuxo tei sou ulosieixu ta mitema lexe Anu itema sou la'iaxui'a palepalea uasisi manina. Ane'i ta mitema ilavusou aloxo ne, la sou ane'i kalumo imuxaxu tane'i noxou sou ino'u mauli ane kaluxu uasi. 17Anu tatananu tuala sou usaxila'inge no voxovoxo utotomu. Anu umomomo sou usoli uasi, mo itema vile umomomo sou umaisou uasi. Anu Anusisi Lataua manina. Nenge tatoxonu mo ta'itinu ualasou no voxovoxo utotomu mo kaluxu uasi. Manina.
18Timoti, nini loxo 'alixeni. Eni apeletotosine no anu vaikala e ta mitema sou palomatana mivikalanenixu no anu tei. Lexe nini namulinu vaikala ane ne, la na'oto'oto pekia'u. 19Nini na'oto'oto, la namuxamuxaxu taneni mo oponeni manina. Xo ta mitema se'i ne, mixiu tumali'a no anu mii tamei ne. La sou ane'i misusu no anu muxamuxaxu tane'i. 20 gTamei noxi'a ne, ualasi'a aloxo 'o Amenio ilou Alekisanda. La eni emuxaxa'a ilou no avolu Satani, mo sou ane'i ilou ilavusou lexe ilea vaikala masua ulai noxou Lataua la uasi.
Copyright information for
ATA