1 Timothy 3
Tila sou Usaxila'u Xaixai Noxi'a ta Mitema Noxou Lataua
1 aIoxe, itema vile umasaxa lexe uxali tila vile sou usaxila'u xaixai noxi'a ta mitema noxou Lataua, la anu umasaxa lexe u'oxonu xaixai laixe manina. Vaikala ane ne, anu manina musuku. 2 bLexe anu umasaxa aloxo ne, la ususu no ie'i ta mitema uasisi manina. Anu umasaxa lexe utaula'i, la u'uluxe sema vilesisi. Xavutalau lamana mo anu molu usaxila'u muamua'ixu. Xe ta mitema imaisou, la itoxonu. Xe anu umaisi'a ta mitema, la usexelaxa'a mo usu'uline'i. Anu ulaixe no anu xaixai sou ulosieixu ta mitema lavulavu. 3Mo anu uiexu uaini, la uiexu tavu'alo malaxo uasi. Mo u'oto'oto uasi. Ia u'oxo se'isisi noxi'a ta mitema mo ilo'a ta mitema i'oto sou anaxa'a uasi. Mo umasaxau lamoli malaxo uasi. 4Anu itema sou usaxila'e semau ilo'a ta 'olu mo ta mitema ane ixolu no taasou laixe, mo ta 'olu ilomuxu vaikalau mo itoxonu laixe. 5Lexe anu ulavusou usaxila'a laixe uasi, la anu umomomo sou usaxila'a ta mitema noxou Lataua uasisi manina. 6Itema vile muxiunu opoonu alavua, la umomomo sou uno'u xaixai ane ne uasi. Xo anu uxali tila, la u'itinu ualasou. Anu u'oxonu aloxo ne, la Lataua ulosou navunavu loxo ulosou Satani. 7 cXe ta mitema ane'i ilavusou Lataua uasi, imaisou la ane'i kalumo ivikala laixesi no anu xaixai noxou, mo sou ane'i ivikala masua ulai noxou mo anu u'amo no anu uoi noxou Satani uasi.Ta Mitema sou Xaixai Noxi'a ta Mitema Noxou Lataua
8Ioxe, ta mitema se'i imasaxa lexe ixali ta mitema sou xaixai noxi'a ta mitema noxou Lataua sou isu'uline'i, la ane'i kalumo xoluxoluxa'a laixesi, mo sou ta mitema imaisi'a, la ivikala masua ulai noxi'a uasi, itoxone'isi. Ane'i levexa'a utatanga uasi mo iiexu uaini tavu'alo uasi. Mo ikalavoine'i ta mitema sou i'umenu lamoli'a ilou mi'ami'a uasi. 9Ia ane'i ixavutala laixe mo itetelisou vaikala manina ane Lataua mulosienge nenge ta mitema ane temulaxu tanenge no anu. 10Xe ngingi ngatovone'i tei mo lexe ngaxalisou susu vile noxi'a uasi, la ane'i ixali ta mitema sou xaixai noxi'a ta mitema noxou Lataua.11 dXe ta semasemai'a kalumo xoluxoluxa'a laixesi mo ta mitema imaisi'a la ivikala masua ulai noxi'a uasi, itoxone'isi. Ane'i ilavixa'a ta mitema uasi mo iiexu uaini tavu'alo uasi. Ane'i ivikala lexe i'oxonu mii vile, la imulinu vaikalai'a mo i'oxonusi.
12Ioxe, nenge talivu une'e noxi'a ta mitema sou xaixai noxi'a ta mitema noxou Lataua. Ane'i itaula'i, la i'uluxe sema vilesisi mo isaxila'a ta 'ili'a laixe mo ta mitema ane ixolu no taasi'a. 13Ane'i i'oxonu xaixai noxou Lataua laixe, la ta mitema i'itinu ualasi'a. Mo ane'i i'ume noxi'a ta mitema uasi. Ane'i itulusi mo ivikala lamana no anu muxamuxaxu tane'i noxou Kalisito Iesu.
14Eni emasaxa lexe ane'e noxine, ia mii vile utetelisilo mo axali palea noxine uasi, la laixe lexe nini namalei no anu vaikala e eni ekaukavunu 'o. Anu sou ulosienixu mii ma'ia nini na'oxonu ulai noxi'a ta mitema noxou Lataua. Ane'i ne, lalotu noxou Lataua ane usoli uasi. Ane'i loxo loe xe vuluvulu sou vaikala manina noxou Lataua. 16 eNenge tavikala manina lexe mii ane utalume ne, anu mutila musuku. Mii ane ne, anu no anu 'ilixo ane Lataua mumasaxau.
“Mii ane mutalume ne, muxali mupala'a itema manina,
mo Uleenu Tavuna mupala'alixu lexe Anu itema mulapu.
Ane'i ta angelo mimaisou,
mo ta mitema mia'aloxu ualasou noxi'a ta mitema no xalexalee tuatuala mukalusi.
La sou ta mitema no lia mimuxamuxaxu tane'i noxou.
Lataua muno'u mulivunoxu mulai no opo loxotolo.”
Copyright information for
ATA