1 Timothy 4
Vaikala Peletoto Ulai Noxou Timoti
1Uleenu Tavuna muvikala lamana aloxo 'o. Ili'i, la ta mitema se'i ixiu tumali'a mo imuxamuxaxu tane'i noxou Lataua uasi. Ia ilomuxa'a ta uleenu sou ixovulaulaulixa'a mo imulinu lavulavu noxi'a ta uleenu masua. 2Lavulavu ane ne, molu noxi'a ta mitema sou kalakalavoi. Ane'i ilavusou i'oxonu susu utotomu, ia ixamuli lexe ane'i isusu uasi. 3 aAne'i ivikala lexe ta mitema itaula'i uasi mo i'ou la'ilali se'i uasi. Ia Lataua mukoinu la'ilali sou nenge ta mitema e tamuxamuxaxu tanenge xe telavusou vaikala manina, ta'ou. Ta'ou, la nenge tavikala laixe ulai noxou Lataua. 4Lexe nenge tavikala laixe ulai noxou Lataua, la nenge telavu lexe mimii tavu'alo e Lataua mukoinu ne, laixe mukalusi. Mamu sou nenge tasu'anu. 5Xo vaikala noxou Lataua mo lakilaka noxinge mu'oxonu la'ilali ne, muxali loxo noxou Lataua.6Lexe nini nalosi'a ta mitema noxou Lataua vaikala ane ne, la nini naxali loxo itema sou xaixai laixe noxou Kalisito Iesu. La sou nini na'ana'analixene no anu vaivaikala manina e nenge tamuxamuxaxu tanenge no anu mo no anu lavulavu laixe e nini nemulinu. 7 bXe nini naxiu tumalineu a'alo vitavitanisi sou no lia mo a'alo vitavitanisi e ta sema ta tatila ilavusou ia'aloxu. Ia nini naxaxaisine pakia'u, mo sou nini namulinu 'ilixo ane Lataua mumasaxau. 8Nini na'ilii vasimene, la anu laixe noxine sevile. Ia namulinu 'ilixo ane Lataua mumasaxau, la anu laixe noxine manina. Anu ulosine mauli sou vaimomo mo mauli ane sou ili'i.
9Vaikala ane ne, manina musuku, mo anu umomomo sou ta mitema tavu'alo ilomusou mo imuxamuxaxu tane'i no anu. 10 cNexi taxaxai xavinexi mo ta'oto'oto pekia'u. Xo nexi tamolo tanexi noxou Lataua, anu umauli mo kaluxu uasi. La sou anu Lataua upamauline'i ta mitema ukalusi, mo umasaxa manina lexe upamauline'i ane'i ane imuxamuxaxu tane'i noxou.
11Eni emasaxa lexe nini nasolonu nalosieixu ta mitema lavulavu ane ne mo navikalane'i pekia'u lexe ane'i imulinu. 12 dNini uao namaulu 'o. Ia eni emasaxa lexe nini natulu pekia'ine, mo sou ane'i imaisine la ilevetesine uasi. Nini na'oxonu 'ili'ilixo laixe, mo sou ta mitema imaisou 'ili'ilixoneni, la ane'i imulinu. Nini na'oxonu 'ilixo laixe no anu vaikalameni, mo no anu muamua'ixene, mo no anu 'ilixo sou namasaxai'a ta mitema, mo no anu 'ilixo sou muxamuxaxu taneni noxou Lataua, mo no anu 'ilixo sou naxolu va'axu no anu 'ili'ilixo masumasua. 13Lexe eni umomomo sou ane'e palea uasi, la nini nalailixu maulixene no anu mii tatalu aloxo 'o. Naitisou vaikala noxou Lataua ulai noxi'a ta mitema, mo naa'aloi'a laixe, xe nalosie'i ta mitema no anu vaikala noxou Lataua. 14 eNo voxo ane ta tatila noxi'a ta mitema noxou Lataua mimuxaxu avo'a no kisine sou mialusine lexe nini na'oxonu xaixai noxou Lataua, la ta mitema sou palomatana mivikalaneni sou Lataua mulosine xavi, mo sou na'oxonu xaixai noxine laixesi. Xavi ane Lataua mulosine muxolu noxine ne, naxiu tumalineu uasi.
15Utotomu ne, nini natovotovonu mii tatalu e eni evikalanenixu mo nalailixu maulixene manina no anu. La sou ta mitema imaisine, la ilavu lexe xaixai noxine muxalixu temanu. 16Nini nasaxisaxila'ine laixe mo nasaxisaxila'u vaikalameni sou nalosieixu ta mitema no anu. Nini na'oxonu aloxo ne utotomu, la anu usu'ulineni xe usu'uline'i ta mitema ane ilomusou vaikalameni.
Copyright information for
ATA