1 Timothy 5
Vaikala Peletoto Ulai Noxi'a ta Mitema Se'i
1Eni emasaxa lexe nini nakaitolonu aululu mamu. Napela'u se'isisisi loxo mamine. Na'oxo aloxo ne ulai noxi'a ta maulusine loxo ta vivine. 2Mo na'oxo aloxo ne ulai noxi'a ta sema ta aululu loxo ta nenine xe ta vuangasine loxo ta vivine ta sema, ia namaisi'a ta vuangasine la naxavutala masua noxi'a mamu.3Eni emasaxa lexe nini natoxone'i ta sema ta vaalu ane ane'isisi ixoxolu, mo evile sou usaxila'a uasi. La nini nasu'uline'i. 4Ia lexe sema vaalu vile ane ta 'ilie mo ta xaixasie a ilo'a ixoxolu, la nini nasu'uline'i mo ilavu laixe no anu xaixai ane muuli no anu xaixai tavu'alo. Xaixai ane ne aloxo 'o. Ane'i imaxa'u 'ili'ilixo ane Lataua mumasaxau ulai noxi'a ta mitema ane ilo'a ixoxolu no taasi'a mo ikolinu xaixai toxoxa'a e ta mami'a ilo'a ta neni'a mo ta xaixasi'a mi'oxonu sou misaxila'a no mine ane'i ta molomoloxa'a. Xo Lataua mumasaxau 'ilixo ane ne misevile. 5Sema vaalu ane anesisi ixoxolu ne, ane imolo tane sou ixomaiou Lataua sou usu'uline mo ilavusou ilinga noxou Lataua no voxovoxo. 6Navikalane'i ta sema ta vaalu pekia'u lexe ane'i i'oxonu aloxo ne. Mo sou ta mitema va'axu imaisi'a, la ivikala masua noxi'a uasi. Ia sema vaalu vile i'oxo'oxonu 'ili'ilixo sou vote'i, la ane mixiu tumalie noxou Lataua, mo ane loxo misoli mukalu. 8Xe lexe itema vile ulavusou usaxila'a ta tulanu ilo'a ta 'olu xe semau uasi, la anu musu'anu muxamuxaxu tanu noxou Lataua. Anu u'oxonu aloxo ne, la anu muxali masua manina noxi'a ta mitema ane ilavusou imuxamuxaxu tane'i noxou Lataua uasi.
9Nasosovosi'a ta sema ta vaalu ane lexe ane'i ixali ta sema sou xaixai noxi'a ta mitema noxou Lataua, la nasovosi'a e tauu iexa'a muuaulixu tauu ie itemaxu tatalu xe mi'uluxu mulu vilesisi. 10Mo ane'i ualasi'a muxali mupala'a lexe ane'i ta sema sou i'oxo'oxonu xaixai lailaixesi. Xaixai loxo isaxila'a ta 'ili'a laixe mo isaxila'a ta mitema ane me'a no tuala va'axu mo imulaxa'a no laaxa'a ta mitema, la i'oxonu xaixai sou isu'uline'i ta mitema noxou Lataua loxo i'uinu tava'a. Mo isu'uline'i ta mitema no anu tu'utu'umaxu noxi'a xe ane'i ilailixu maulixa'a no anu xaixai laixe ukalusi.
11Ia ta sema ta vaalu ane ta aululu uao ne, nasosovosi'a sou lexe ixali ta sema sou xaixai noxi'a ta mitema noxou Lataua mamu. Xo xavutalai'a sou taula'i uavuti, la sou ane'i ixiunu tumali'a noxou Kalisito sou imasaxa itaula'i la. 12Ane'i mixiunu tumali'au vaikala e mivikala tei lexe imulinu Kalisito. La sou ta mitema ilavu lexe ane'i mixiunu tumali'au, la ivikala lexe ane'i misusu. 13 aAne'i i'oxonu aloxo ne, ia ane'i ilavusou ixaxai kalumo uasi. Ane'i ilavusou ixixaoxao vitanisi mo i'una no tatani sou imunumunuxa'a ta menexi'a mo ipupuie'i. Ane'i ipupuie'i ta menexi'a, la ane'i ilemolu vaikala se'i laixe no anu lolomu noxi'a uasi. 14 bLa sou eni emasaxa lexe ta sema ta vaalu ane ta aululu uao ne, itaula'i. Mo ipalaane'i ta 'ili'a mo isaxila'u taasi'a. Ane'i i'oxonu xaixai aloxo ne, la evile umomomo sou uvikala masua ulai noxi'a uasi. 15Xo eni elavu lexe se'i noxi'a ne, mixiu mo mimulinu Satani.
16Lexe sema vile imuxamuxaxu tane noxou Iesu, ia no tani noxie ne, sema vile vaalu ilo'a ixoxolu, la laixe lexe ane isaxila'e. Mo sou ta mitema noxou Lataua itavule tu'umaxu uasi. Xo ane'i sou isaxila'a ta sema ta vaalu ane ane'isisi ixoxolu mo evile usaxila'a uasi.
17Ta tatila e isaxila'u xaixai noxi'a ta mitema noxou Lataua laixe ne, laixe lexe ta mitema ilotone'i laixe. Xe laixe manina lexe ilotone'i ane'i ane ia'alo xe ilosie'i ta mitema no anu vaikala noxou Lataua tei. 18 cXo vaikala noxou Lataua muvikala aloxo 'o, “Ta bulumakau ixaxai sou imalamalaxo'u uiti ngiaxu sou sosou uxexee, la umomomo sou isamali anaxa'a uasi, mo sou ane'i isolixa'a la i'ani uiti temanu se'i.” Xe anu aloxo 'o, “Ta mitema sou xaixai noxi'a ta mitema noxou Lataua ixaxai, la ta mitema noxou Lataua ilotone'i kalumo.” 19 dMamu sou nalomusou susu noxou tila vile noxi'a ta mitema noxou Lataua. Ia lexe ta mitema tamei, uasi la tatalu imaisou mo ilavusou susu ane ne, la sou nini nalomusou. 20 eAne'i ane ilavusou i'oxonu susu, la natulusi'a uuli no ie'i ta mitema. Mo nakaitolone'i, mo sou ta menexi'a imaisi'a, la imama'u.
21No iou Lataua mo Kalisito Iesu xe ta angelo musosovosi'a, la eni avikalaneni pekia'u lexe nini namulinu vaikala e eni elosine ne. Mamu sou namasaxai'a ta mitema se'isi, ia namasaxai'a ta mitema tavu'alo ukalusi.
22Naiexu lexasi mamu. Naiexu uaini sevile sou usu'ulinu oponeni xe uxexeenu pipiena e ulavusou uxali noxine utotomu. Lexe nini namulaxu avone noxou itema kisou sou nasovosou lexe uxali itema vile sou xaixai noxi'a ta mitema noxou Lataua, la naxavutala mo namalei laixe. La sou namulaxu avone vaxa no kisou. Mo namulinu 'ili'ilixo masua noxi'a ta mitema uasi. Nini naxolu va'axu no anu.
24Xo ta mitema se'i mi'oxonu 'ili'ilixo masumasua mo itulu no anu vaivaikala uao, ia 'ili'ilixo masumasua noxi'a muxali mupala'a lamana. Ia 'ili'ilixo masumasua noxi'a ta mitema se'i ne, utalume xe ili'i la sou anu uxali upala'a lamana. 25Anu aloxo ne, xaixai laixe noxi'a ta mitema se'i muxali mupala'a lamana, ia xaixai laixe ane mutalume, ili'i la sou uxali upala'a lamana.
Copyright information for
ATA