2Pe 1 | ATA | STEP | Eni Saimoni Pita itema sou xaixai noxou Iesu Kalisito mo eni Aposeli, ekaukavunu vaivaikala ane 'o mo esovanu mulai noxi'a ane'i ane no anu 'ili'ilixo mulapu noxou Lataua noxinge mo Anu itema sou pamauli Iesu Kalisito mulosie'i la sou ane'i mimuxaxu tane'i kalumo iouvilesisi laixe aloxo nexi 'o.

a 1:6Xal 5:22-23

b 1:14Ioa 21:18-19; 2Ko 5:1

c 1:16Mat 17:1-5

f 1:212Ti 3:16; 1Pi 1:11-12

‏ 2 Peter 1

1 Eni Saimoni Pita itema sou xaixai noxou Iesu Kalisito mo eni Aposeli, ekaukavunu vaivaikala ane 'o mo esovanu mulai noxi'a ane'i ane no anu 'ili'ilixo mulapu noxou Lataua noxinge mo Anu itema sou pamauli Iesu Kalisito mulosie'i la sou ane'i mimuxaxu tane'i kalumo iouvilesisi laixe aloxo nexi 'o. 2 Xo ngingi ngelavusou Lataua mo Iesu anu Tila noxinge, la sou eni akilaka lexe alauna mo opo se'isisi noxou u'ana'ana noxinge manina.

Lataua Musosovosinge Mo Mu'avalinge

3 Aloxo nenge telavusou lexe Tila Iesu anu Lataua e no anu uala tila Anu muno'u mo 'ili'ilixo lailaxe noxou Anu mu'avalinge, la no anu xavi noxou mo Anu mulosinge mimii tavu'alo nenge temasaxau sou usu'ulinu maulinenge mo tamuamua'i no anu 'ili'ilixo noxou Lataua. 4 No anu 'ili'ilixo ne la sou Anu ulosinge mimii ta tatila xe lailaixe ane Anu musakiinu vaivaikalasou tei lexe ulosinge, la sou no anu mimii e Anu ulosinge ne, usu'ulingengi sou ngamulinu 'ilixo noxou Lataua, mo usu'ulingengi la ngaxolu va'axu no anu 'ilixo masumasua noxi'a ta mitema e imulinu masaxa masumasua sou vasime'a iulua mo ino'u navunavu. 5 Xe tava'u aloxo ne, la sou ngatovonu xavingengi sou ngamuxaxu tangengi manina sou menexu 'ilixo lailaixe ne, la sou ngingi ngalavusou Lataua. 6 ^aMo lexe ngingi ngalavusou Lataua la sou ngingi ngamomomo sou ngamulinu masaxa sou vasimenge uasi, mo lexe ngingi ngamulinu masaxa sou vasimenge uasi, la ngingi ngamomomo sou ngatulu pekia'inge no voxo sou tu'utu'umaxu uxalisinge, mo lexe ngingi ngamomomo sou ngatulu pekia'inge la sou ngamuamua'i no anu 'ili'ilixo noxou Lataua, 7 mo lexe ngamuamua'i no anu 'ili'ilixo noxou Lataua la sou ngingi tangengixa'a ta vivinge ngatongato'o, xe lexe ngingi tangengixa'a ta vivinge ngatongato'o la tangengixa'a no nano no tanengi maninasou. 8 Xo lexe 'ili'ilixo ane ne uxolu no nano no anu maulingenge la anu uleme mo uxali tatila, la ngingi ngalavusou Tila noxinge Iesu Kalisito la ngingi ngaxali loxo mii vitanisi mo unene'a mo ngiangiaxu uasi, uasi. 9 Ia lexe 'ei ane 'ili'ilixo ane ne uxolu no anu maulixu uasi la anu loxo itema iou seleveenu mo umalei ulai no paxa uasi, anu ulavusou lexe 'ili'ilixo masumasua e anu mu'oxonu tei 'olele ne Lataua uxexee uasi. 10 La sou ta vivilo, ngatovonu xavingengi manina mo nga'oxonu 'ava mo sosovo noxou Lataua noxinge uxali maninasou. Xo lexe ngingi nga'oxonu aloxo ne, la mivile umomomo sou utaloxolingenge uasi manina. 11 Lexe ngingi ngamulinu vote'i ane ne la aitenga ukisi noxinge la ngingi nga'unalai no tuala saxisaxila'u noxou Tila noxinge mo itema sou pamauli Iesu Kalisito teitexi no opo loxotolo e kaluxu uasi.

Palomatana sou Vaikala Noxou Lataua

12 La sou ngingi ngalavusou mimii ane ne mo ngatulu pekia'inge no anu vaikala manina ane ngingi ngeno'u vaimomo, ia eni amomomo sou axiu tumaliloinge uasi mo aavuavutilixu xavutalamengi utotomu no anu mimii ne. 13 Eni axavutala lexe anu laixe sou eni aavuavutilixu xavutalamengi no mine eni uao axoxolu loxo tani alelaxu noxou Lataua. 14 ^bXo aloxo Tila noxinge Iesu Kalisito muvikalaleli lamana mo eni elavusou lexe sexasisi sou tasaxanu vasimelo ulai no lia. 15 Mo eni atovo xavileli manina sou aavuavutilixu xavutalamengi utotomu mo sou ili'i no anu soli noxilo la ngingi umomomo sou ngaxavutalanu mimii ne.

16 ^cNexi taa'alomengi no anu a'alosou lailivuxu Tila noxinge Iesu Kalisito mo xavi noxou 'o ne, xo nexi temaisou manina no iexi, ia loxo tamulinu a'alo vitanisi mo xavutala noxi'a ta mitema uasi. 17 ^dXo no mine nexi noxou Iesu texolu teitexi no alaele tavuna, la nexi temaisou Lataua anu Momu mutoxonu mo mulosou uala tila. Mo nexisisi telomusou xolinu Lataua mulaa no anu lamanaxu e xaviinu musuku ne molu teitexi no opo loxotolo muvikala aloxo 'o,

“Anu 'alixeni ane, e eni talelixu misevile mo opoleli u'osasou misevile.”
19 La sou nexi temaisou mo telavusou manina lexe vaivaikala noxi'a ta mitema sou palomatana ne anu muxali sou, la sou anu laixe lexe ngingi kalumo ngamuxaxu no tangengi, xo anu Iesu loxo telu ukaakaa no isivoxo mo ulai utalo no mine lamana ukea loxo xuae sou lamana ukaa no nano no opongengi. ^{▼▼1:19Ulai utalo no mine lamana ukea ne anu voxo sou ta mitema itulu no anu vaivaikala.} 20 Mo mii mutila lexe ngingi ngalavusou ne aloxo 'o, vaivaikala noxi'a ta mitema sou palomatana e mikaukavunu muai no nano no anu Lavuku Tavuna noxou Lataua ne i'oxonu no anu xavutalai'asi uasi. 21 ^fXo vaivaikala noxou Lataua uxali no anu masaxa noxou itema vile uasisi manina. Ia Lataua anusisi molu ulosi'a ta mitema sou palomatana vaivaikala la sou ane'i ivivikala no anu xavi Uleenu Tavuna.