2Pe 3 | ATA | STEP | Ta menexilo e eni amasaxaine misevile, kaukavu ta tamei sou 'o eni akaukavunu ulai noxinge la. No nano no anu kaukavu ta tamei la anu vaivaikala sou aavuavutilixu xavutalamengi mo u'oxongengi sou ngaxavutalanu vaivaikala ane laixesi.

a 3:2Iud 17

b 3:31Ti 4:1; Iud 18

c 3:4Mat 24:48

d 3:5Tav 1:6-9

e 3:6Tav 7:11; 2PE 2:5

f 3:8Lex 90:4

g 3:9Ava 2:3; 1Ti 2:4

h 3:10Mat 24:29, 35; Luk 12:39; 1Te 5:2

i 3:13Ais 65:17, 66:22; Pal 21:1, 27

j 3:15Rom 2:4

k 3:17Mak 13:33; 1Ko 10:12

‏ 2 Peter 3

Voxo sou Tila Ulivu Une'e

1 Ta menexilo e eni amasaxaine misevile, kaukavu ta tamei sou 'o eni akaukavunu ulai noxinge la. No nano no anu kaukavu ta tamei la anu vaivaikala sou aavuavutilixu xavutalamengi mo u'oxongengi sou ngaxavutalanu vaivaikala ane laixesi. 2 ^aEni amasaxa lexe ngingi ngaxavutalanu vaivaikala noxi'a ta mitema sou palomatana noxou Lataua tatei mo lapuloto noxou Tila noxinge mo itema sou pamauli e ta aposeli noxou Lataua mia'alomengixu. 3 ^bMii mutila laixe lexe ngingi ngalavusou tei aloxo 'o, no anu voxo kalukaluxu sou la ta mitema e imulimulinu masaxa masua sou vasime'a imolovila'isou lalotu noxinge. 4 ^cLa ane'i ivikala imolovila'i lexe, “Anu musakiinu vaikala tei lexe Kalisito ulivu une'e, la ava'a? Ta 'ilusulusunenge misoisoli mukalu no musoko no mine Lataua musokou mimii mune'e muxali vaimomo 'o la mimii uxiu uasi a uxolu no tanixu 'o si.” 5 ^dIa ane'i ixavutala laixe uasi tane'i vulusi lexe tatei manina no mine Lataua musokou sou mukoinu mimii la mukoinu loxotolo mo lia muxali muatu no anu lexa. Mimii ne anu mukoinu muxali no anu vaikalasi. 6 ^eMo no anu lexa ne kalumo la anipaa toxoxa'a mukalusi'a ta mitema no lia 'o tatei. 7 Ia loxotolo ilou lia e uxoxolu vaimomo 'o ne imulinu vaikala noxou Lataua, mo ixolu iloo sou navu uasi. Ane'i ixoxolu aloxo ne ulai utalo no anu voxo ane Lataua utulusi'a ta mitema e imulinu 'ili'ilixo noxou Lataua uasi itulu no anu vaivaikala mo iulua.

8 ^fLa sou ta menexilo e eni amasaxainge misevile, mamu sou tangengi vulusiou mii ane 'o aloxo 'o. Voxo vile noxou Tila ne anu aloxo tauu ie itemaxu mavulovexa ta'uve (1,000) mo tauu ie itemaxu mavolovexa ta'uve (1,000) ne aloxo voxo vilesisi. 9 ^gMo ta mitema mose'i milavusou lexe Tila u'oxoo se'isisi sou u'oxonu mimii uxali loxo anu musakiinu vaikala sou tatei. Ia aloxo ne uasi, anu uxolu se'isisi mo uxomaiengi, xo umasaxa lexe itema vile noxinge uulua uasi. Anu umasaxa lexe ta mitema latala ixiunu opone'i ukalusi

Loxotolo Alavua Mo Lia Alavua.

10 ^hTila uxolu se'isisi mo uxomaiengi ia voxo sou Tila ulivu une'e ne aloxo itema sou pakali. Mo no voxo ane ne la loxotolo upau la luluxu tatila loxo lele'e xe alaxu vilesisi la tasiauxu avile mo ta mimii iouiou mixolu teitexi no loxotolo mo no lia 'o mo lia ilou xaixai iouiou e ta mitema i'oxo'oxonu no lia 'o ne umamulo mo u'ela ukalusi. 11 Ioxe lexe no anu vote'i anenesi la mimii latala ne ukalu, la sou ngingi ngamauli a loxovaa? Lexe ngingi ngamasaxa lexe ngamauli la, ngaxolu va'axu no anu 'ili'ilixo masumasua mo ngamulinu 'ili'ilixo noxou Lataua. 12 Mo ngingi ngaxolu ngaloloopalasi lexe voxo noxou Lataua ne uvoovoxo uasi uxali upasipaasi. Ia no anu voxo ane ne la loxotolo u'ela ukalusi mo ta mimii iouiou mixolu no anu mo ta mimii ane mixolu no lia 'o kalumo ne navu uieine'i la isiali vitanisi. 13 ⁱMo sou nenge taxolu taloloopalasi no anu mii ma'ia e Anu musakiinu vaikala sou tatei. Anu ane loxotolo alavua mo lia alavua mo 'ili'ilixo mulapusi u'ana'ana no anu.

14 La sou ta menexilo e eni amasaxainge misevile, lexe ngingi ngaxoxolu sou ngaxomaiou voxo ne uxali la ngatovonu xavingengi manina sou nga'oxonu susu vile mo ixalisou susu vile mo vuvuli vile uxolu noxinge uasi. Ngingi nga'oxonu aloxo ne xe no mine Anu une'e la opongengi uai se'isisi xo ngingi ngongi'a ngaxolu. 15 ^jNenge'a talavusou laixe lexe Tila anu uxolu se'isisi mo uxoxomaienge ne xo Anu umasaxa lexe nenge latala tamauli ukalusi. Aloxo vivinge nenge'a Paulo e nenge temasaxau misevile, Lataua mulosou lavulavu la Anu mukaukavu mulai noxinge la mulelemolu kalumo. 16 No anu kaukavu noxou mukalusi ne la Anu muvivikala no anu mimii iouvilesisi ane. Mo no nano no anu kaukavu noxou ne la Anu muvivikala no anu mimii mose'i pekia'u sou nenge talavusou. La sou ta mitema mose'i ilavusou uasi mo xavutalai'a pekia'u uasi, itovo lexe ilulusou laaxu la ikalakalavoi no anu. Ane'i mi'oxonu no anu a'alo mose'i muai no nano no anu Lavuku Tavuna noxou Lataua kalumo. Ane'i mi'oxonu aloxo ne la iuluasi. 17 ^kAloxo ne la sou ta menexilo e eni amasaxainge misevile, ngingi ngelavusou mimii ne, la sou ngasaxila'inge laixe. Loxo 'o io ngamulinu 'ili'ilixo noxi'a ta mitema e imulinu lapuloto noxou Lataua uasi la u'oxongengi ngalai va'axu. Ngingi nga'oxonu aloxo ne mamu, xo ngingi nga'oxonu aloxo ne la u'oxongengi ngalapau no anu muxamuxaxu tangengi. 18 La ngingi ngaleme no nano no anu alauna mo lavulavu noxinge noxou Tila noxinge mo itema sou pamauli Iesu Kalisito. Eni akilaka lexe ta'itinu Tila noxinge ualasou vaimomo 'o mo utotomu mo kaluxu uasi. Manina.