2Th 1 | ATA | STEP | Eni Paulo, nexi noxi'a Sailasi ilou Timoti tekaukavu vaikala ane 'o mulai noxinge ngingi ta mitemau Lataua ne Tesalonika e ngingi ngongi'a Lataua Maminge mo Tila Iesu Kalisito ngepita vilesisi.

a 1:2Rom 1:7

b 1:42Ko 7:4; 1Te 2:19

c 1:6Rom 12:19

d 1:71Te 3:13

e 1:8Ais 66:15

f 1:9Ais 2:10

g 1:10Kol 3:4

h 1:11Kol 1:9; 1Te 1:2‑3

‏ 2 Thessalonians 1

1 Eni Paulo, nexi noxi'a Sailasi ilou Timoti tekaukavu vaikala ane 'o mulai noxinge ngingi ta mitemau Lataua ne Tesalonika e ngingi ngongi'a Lataua Maminge mo Tila Iesu Kalisito ngepita vilesisi.

2 ^aNexi talinga lexe alauna mo opo se'isisi noxou Lataua Maminge ilou Tila Iesu Kalisito umomomo sou uxolu noxinge.

Vaikala Laixe Musuku Ilou Linga Noxi'a Paulo Ena Mulai Noxou Lataua

3 Ta vivixe, utotomu ne nexi talavusou talemolu laixe musukusi singe ulai noxou Lataua mo anu laixe sou nexi ta'oxonu aloxo ne. Xo muxamuxaxu tangengi ne, anu muxali pekia'u maninasou mo 'ilixo sou ngingi vilevilesi tanengingenge ngatongato'o ne, anu muxali laixe. 4 ^bAnu aloxo ne, la sou ane nexi ta'itinu ualasinge no taiine'i ta mitema sou lalolalotu noxou Lataua. Xo ngingi ngetulu pekia'inge mo ngemuxamuxaxu tangengi noxou Lataua, la no anu tu'utu'umaxu tavu'alo xe tovotovo iouiou muxali noxinge ne, ngingi ngetavulenusi.

5 La mimii latala ane muxali noxinge ne, anu sosovo sou lexe Lataua uiloinge no anu xavutala noxou ane mulapu. Xo tu'utu'umaxu ilou tovotovo ane ngingi ngetatavule ne, anu mu'oxongengi sou ngingi ngaxolu no nano no anu saxisaxila'u noxou Lataua. 6 ^cLataua anu mulapu, la sou Anu molu ukolinu tu'utu'umaxu noxi'a ane'i ane milosinge, 7 ^dmo Anu umasaxa lexe uxexeenu tu'utu'umaxu ane ngingi ngetavule ne, la ulosinge nenge'a ma'ila. Anu u'oxonu mii ane ne uxali no voxo ane Tila Iesu ilo'a ta angelo noxou xavine'i i'umesou opo loxotolo, ia ilu'e ixali lamana no anu navu lamixu. 8 ^eNo voxo ane ne, la sou ane'i ane ilavusou Lataua mo ilomuxu a'alo laixe noxou Tila noxinge Iesu uasi ne, Anu ulosi'a navunavu. 9 ^fTa mitema ane ne, Lataua ulosi'a navunavu sou 'ili'ilixo noxi'a mo usu'ane'i avilesi ilai ixolu va'axu manina noxou Tila mo imaisou xavi laixe noxou la uasi. 10 ^gNo mine Tila Iesu ulivu une'e, la ta mitema noxou Lataua i'itinu ualasou mo ta mitema ane'i ane mimuxaxu tane'i noxou i'osasou misevile. Mo ngingi kalumo nga'oxonu aloxo ne, xo ngingi ngemuxaxu tangengi no anu a'alo laixe noxou Iesu e nexi tea'aloxu noxinge.

11 ^hXe nexi texavutalanu mii ane ne mo 'ava noxou Lataua noxinge la sou utotomu ne nexi talinga lexe Lataua noxinge usu'ulingengi sou ngingi namulinu 'ili'ilixo ane umomomo no iou. Mo nexi talinga lexe no anu xavi noxou ne, la Anu usu'ulingengi no anu vote'i mulapu mo nga'oxonu 'ili'ilixo laixe mo xaixai tavu'alo e ngingi ngemuxaxu tangengi noxou Iesu sou lexe nga'oxonu. 12 La sou no mine ngingi nga'oxonu aloxo ne, la nexi talinga sou lexe ngingisi ane nga'itinu ualasou Tila noxinge Iesu xe Anu u'itinu ualasinge kalumo no anu alauna noxou Lataua noxinge xe Tila Iesu Kalisito.