2 Thessalonians 2
Sosovo Se'i Uxali Tei, Ka sou Kalisito Une'e
1Ioxe, ta vivixe, nexi talingainge aloxo 'o. No anu lailivuxu Tilasinge Iesu Kalisito ane une'e la utokinenge no anu sou nenge nenge'a Iesu taxolu tapita, la nexi talinga lexe ngalomusou vaikala ane 'o laixe. 2Nexi texavutala lexe ta mitema se'i mivikalangengi lexe voxo noxou Tila a muxali mukalu ne. Male, vile noxi'a mukalavoingengi no anu vaikala e ulee vile sou kalavoi mulosou. Xe vile noxi'a mua'alomengixu mo vile noxi'a mukalavoingengi lexe nexi tekaukavu aloxo ne. Ia ngingi ngelomusi'a mivikala aloxo ne, la mamu sou ngakuluke mo nga'olo'olo. 3 aMo mamu sou ngalomuxu itema vile va'axu ukalavoingengi no anu vote'i iouiou mo vaivaikala noxou vitanisi. Xo voxo noxou Tila uxali uao, la ta mitema tavu'alo ixiu tumali'au Lataua xe itema e umasaxa umulinu lapuloto noxou Lataua uasi uxali upala'a tei. Ia ili'i, la itema ane ne, Lataua ukalusou no tualasi'a ta mitema misoisoli. 4 bAnu uxiu tumalou Lataua mo uxiu tumaloui'a ta mimii ane ta mitema ilavusou ilotu noxi'a. Ia anu molu u'itinu ualasou sou uxali tila noxi'a mo uxolu teitexi no tani tila noxou Lataua sou uvikala lamana lexe, “Enisi eni Lataua.”5Nenge nenge'a texoxolu, la ngaxavu-talanu mimii ane evikalangengixu 'ole uasi? 6Mo ngingi ngelauvusou ma'ia ane mutaluxu vote'isou itema ne, la sou anu uxali upala'a lamana vaimomo uasi, ia anu uxali upala'a lamana no voxo ane Lataua ulemolu lexe anu uxali. 7Xo anu ane mutaluxu vote'isou mo utetelisou ne, ulai utalo no anu voxo ane sou anu u'italonu ulai. Ia vaimomo 'o, la uxaxai xaviinu, la Lataua uno'u mo sou ulailixu va'axu. 8 cLa no voxo ane itema e umasaxa umulinu lapuloto noxou Lataua uasi ne uxali upala'a lamana, xe Tila Iesu uvau usoli no anu anaxu tauuxu ilou lamanaxu no mine anu ulivu une'e. 9 dIa itema ane umasaxa umulinu lapuloto noxou Lataua uasi ne, uxali la u'oxonu xaixai noxou Satani. Anu u'oxonu xaixai sou kalakalavoi ane ta mitema imaisou la tane'i liliiou xe u'oxonu sosovo iouiou kalumo. 10Mo anu u'oxonu 'ili'ilixo masumasua iouiou sou ukalavoine'i ane'i ane imuamua'i no vote'i ane ne sou ilai iulua. Xo Lataua mulosi'a vaikala manina sou lexe upamauline'i no anu, ia ane'i mixiu tumali'au mo imasaxau sou ino'u uasi. 11Tava'u aloxo ne, la sou Lataua musovanu xavi sou xovulaulau mulai noxi'a, mo sou ane'i imuxaxu tane'i no anu mimii sou kalakalavoi. 12Tava'u sou ta mitema tavu'alo ane imuxaxu tane'i no anu vaikala manina uasi, ia i'osasou 'ili'ilixo masumasua sou i'oxonu ne, Lataua utulusi'a no anu vaivaikala.
Ngatulu Pekia'inge
13 eIa, ta vivixe e Tila ulavusou umasaxainge misevile. Utotomu ne, nexi talavusou talemolu laixe musuku ulai noxou Latauasinge. Xo tatei no mine Lataua ukoinu mimii uao, la Anu musosovosinge sou lexe upamaulingengi. Uleenu Tavuana uxaxai noxinge mo u'oxongengi ngaxali ta mitema noxou Latauasi xe ngamuxaxu tangengi no anu vaikala manina noxou. 14La Anu mu'avalinge no anu a'alo laixe noxou Tila Iesu Kalisito noxinge e nexi tea'aloxu sou lexe ngingi ngano'u mimii lailaixe ane Anu ulosinge. 15La sou ta vivixe, ngatulu pekia'inge mo ngatetelisou vaivaikala e nexi telosiengixu xe tekaukavu mo telelemolu no ananexe la tesova mulai noxinge.16Tila noxinge Iesu Kalisito anusi ilou Lataua Maminge mimasaxainge, la sou mi'oxonu alaunasinge mo utotomu ne mipeletotosinge sou tatulu pekia'inge mo mi'xonenge tamolo tanenge sou taloopala Iesu ulivu une'e. 17La nexi talinga lexe ane'i ilou iavutilixu opongengi mo i'oxongengi pakia'inge sou ngamulinu 'ili'ilixo lailaixe ukalusi mo ngavikala la ngavikala laixesi.
Copyright information for
ATA