2 Timothy 2
1Ioxe, nini Timoti loxo 'alixeni, nini natulu pekia'ine no anu alauna noxou Kalisito Iesu. 2Vaivaikala e nini nelomusou noxilo no ie'i ta mitema tavu'alo ne, nini na'italonu vaikala ane ne ulai noxi'a ta mitema e nini nemaisi'a lexe ane'i imomomo sou ilosieixu ta mitema no anu kalumo. 3 aNini natavule tu'utu'umaxu loxo itema sou 'oto'oto laixe noxou Kalisito Iesu aloxo eni atatavulenu 'o. 4Lexe itema vile uxali loxo itema sou 'oto'oto, la anu u'oxonu xaixai sou 'oto'oto nesi, mo sou tila noxou u'osasou. Ia umomomo sou u'oxonu xaixai se'i e anu ulavusou u'oxonu no tualasou uasi. 5 bXe itema vile sou uiave no anu iaveiave sou uuaulixa'a ta menexu, la anu umulinu lapuloto sou uauli, xe uasi la anu umomomo sou uuaulixa'a mo uno'u kisivalu sou uuli no anu iaveiave noxou uasi. 6 cXe itema vile uxaxai no xai xaviinu misevile, la anu itema sou uno'u temanu tei. 7Naxavutala laixe no anu vaivaikala eni elosine ne. Nini naxavutala laixe, la Tila ulosine xavutala lamana sou nalavu no anu mimii latala.8 dMo naxavutalanu Iesu Kalisito. Anu 'ilusunu ane Deviti e tatananu tuala ne Isilaeli, mo Lataua mutulusou no anu soli. Anu a'alo laixe eni aa'aloxu noxi'a ta mitema ane. 9 eEni aa'aloxu a'alo laixe noxou Iesu, la sou eni atatavule tu'utu'umaxu mo ane'i misakileli loxo itema ane sou mu'oxonu susu. Ia vaikala noxou Lataua ne, umomomo sou ane'i isakiinu uasi. 10Anu aloxo ne, la sou eni a'osasou tu'utu'umaxu e muxalisilo sou asu'uline'i ta mitema ane Lataua musosovosi'a sou ane'i ino'u mauli noxou Kalisito Iesu mo ixolu noxou utotomu no tuala ane lamanaxusi.
11 f“Lexe nenge tasoli loxo Anu musoli,
la nenge tamauli loxo Anu mumauli.
Xe lexe nenge ta'osasou tu'utu'umaxu e uxalisinge no lia 'o,
la nenge nenge'a taxolu sou tasaxila'u tuala teitexi.
Xe lexe nenge tasingisou,
la Anu usingisinge kalumo.
Xe voxo se'i, la nenge taxiu tumalingeu Iesu,
ia Anu ulavusou uxiunu tumalouinge uasi.
Xo Anu molu usingisou uasi.”
Vaikala ane ne, anu umomomo sou nenge tamuxaxu tanenge no anu.
Itema sou Xaixai Noxou Lataua E Anu Musosovosou
14 gEni emasaxa lexe nini naavutilixu xavutalai'a ta mitema no anu vaivaikala e eni alosine ne. Mo navikalane'i pekia'u no iou Lataua aloxo 'o. Mamu sou i'oto'otosou anaxa'a no anu vaivaikala. Xo i'oto'otosou anaxa'a, la usu'uline'i ta menexi'a uasi. Ia u'oxo masuane'i ane'i ane ilomusi'a. 15 hNini pekia'ine sou nalailixu maulixene ulai noxou Lataua loxo Anu musosovosine loxo nini itema sou xaixai noxou. Nini namaela mamu, ia nalosieixu ta mitema laixe no anu vaikala manina. 16 iNaxiu tumalineu vaivaikala vitavitanisi sou lia 'o. Xo ane'i ane ivikala no anu vaikala vitavitanisi ne, ane'i ixolu va'axu noxou Lataua, 17 jmo vaivaikala noxi'a ne, uve'a ta menexi'a loxo vovolea vila masua manina. Tamei noxi'a ualasi'a lexe Amenaio ilou Piletusi. 18Ane'i ilou mipolo vilenu vaikala manina. La ane'i ivikala lexe Lataua mutulusi'a ta mitema misoisoli mukalu ne. La sou ane'i mixovulaulaulixa'a ta mitema se'i no anu muxamuxaxu tane'i noxi'a. 19 kTa mitema se'i mi'oxonu aloxo ne, ia Lataua mutulusou mii vile pekia'u manina loxo vuluvulu sou tani. Kaukavu muxolu no anu aloxo 'o. Vile lexe, “Tila mulavusi'a ta mitema ane ane'i ta na'u manina.” Xe vile aloxo 'o, “Ta 'ei ane ipala'alixu lexe Iesu anu Tila, la ane'i ixiu tumali'au 'ili'ilixo masumasua.”20No nano no tani tatila, la mimii se'i sou ta'ani no anu loxo paku ilou latotope mo lakupapa a uai. Ioxe, se'i ne, mi'oxonu no anu xoulu ilou siliva sou voxo tilasi xe se'i, la mi'oxonu no anu ovu ilou lialia, anu sou voxovoxo vitanisi. 21La sou lexe itema vile uxolu va'axu no anu 'ili'ilixo masumasua, la anu uxali itema sou xaixai noxou Tila, loxo paku ilou latotope ane sou voxo tilasi. Anu uxolu va'axusi sou u'oxonu xaixai noxou tatananu tani tila ne xe uloosi sou xaixai laixe ukalusi.
22 lLa sou nini naxiu tumalineu 'ilixo sou vote'i ane ta maulu ilavusou i'oxo'oxonu. Ia ngingi ngongi'a ane'i ane ilinga noxou Tila no anu opone'i maninasou, ngamulinu 'ili'ilixo ane laixe mo ngamuxamuxaxu tangengi noxou Kalisito mo ngamasaxai'a ta mitema la opongengi uai se'isisi. 23 mNamuxaxu xaleeneniu vaivaikala vulaulau. Xo nini nelavu lexe mii ane ne, uxalixu 'oto'oto sou anaxa'a. 24Mamu sou itema sou xaixai noxou Tila ilo'a ta menexu i'oto'otosou anaxa'a. Ia anu u'oxo laixe noxi'a ta mitema ukalusi, mo anu ulosieixu ta mitema no anu vaikala noxou Lataua laixe xe anu itema sou la'iaxui'a ta mitema palea uasi. 25Mo anu itema sou upela'a ta mitema se'isisi ane ane'i imasaxau uasi. Anu upela'a ta mitema, la male Lataua upelemasaxane'i lexe ixiunu xavutalai'a mo ilavusou vaikala manina. 26Mo ane'i xavutalai'a lamana, la i'ume no anu uoi noxou Satani e mutetelisi'a sou i'oxonu xaixai noxou.
Copyright information for
ATA