Colossians 3
Muamua'i no Anu Mauli Alavua
1 aTei la ngingi ngesoli ia Lataua mutulusinge ngongi'a Kalisito, la sou laixe lexe tangengi utuluu mimii ane teitexi e Kalisito mulai muxolu no anu puloulou laixe no pa'umolu Lataua no avolu tema. 2 bMo xavutalamengi utuluu mimii teitexi la tangengi utuluu mimii no lialia 'o uasi. 3Xo ngingi ngesoli mo maulingenge maninasou ngongi'a Kalisito muxolu mutalume no nano noxou Lataua. 4Kalisito anu tava'u maulingenge, la sou no mine Anu une'e upala'alixu lamana la sou ngingi kalumo ngongi'a anu Kalisito ngakei ngapala'a no anu lamanaxu tatila.5 cAloxo ne la sou anu laixe lexe 'ili'ilixo sou lialia e muxolu no nano no anu maulingenge ne, ngavau mo usoli. 'Ili'ilixo ne anu aloxo 'o, 'ili'ilixo sou vote'i, mo 'ili'ilixo ane nuni'u manina, mo masaxa tatila sou 'ilixo sou vote'i, mo masaxa masua sou 'ilixo masumasua, xe 'ilixo sou matea. Xo 'ilixo sou matea ne anu aloxo 'ilixo sou lalotu no anu lataua kalakalavoi. 6Ta mitema ane ilomu uasi i'oxo'oxonu 'ili'ilixo ane loxo ne, ili'i la ino'u la'ia noxou Lataua. 7Tei no anu maulingenge la ngingi ngemulimulinu 'ili'ilixo ane. 8 dIa vaimomo 'o anu laixe lexe ngaxexeenu 'ili'ilixo ane 'o ukalusi no anu maulingenge. 'Ili'ilixo ne aloxo 'o, la'ia, lavilavi, opo masumasua xe sa'isa'i masumasua e ulaa no anu anangenge. 9 eAloxo ne la sou ngakalavoingengi ngatongato'o mamu, xo ngingi ngexexeenu 'ili'ilixo sou opo teinu ne, 10 fmo ngingi ngexali ta mitema ta alavua ne. Lataua e mukoinu mimii ne Anu mu'oxongengi ngexali alavua, mo mulosinge lavulavu, xe mu'oxongengi ngexali loxo Anu. 11 gLa sou nenge texali ta mitema ta alavua mo nenge texali ta mitema iouvilesisi. Mo mamu sou taxavutala lexe nenge ta Xiliki mo ngenge ta Iutaia mo nenge ane xooxoo mungasinge xe ane xooxoo ungasinge uasi, mo ta asila xe nenge ane texolu no tuala no paxapaxa, mo nenge texolu ta mitema sou xaixai vitanisi xe nenge ane texolusi. Xo Kalisito anu Anusisi, mo Anusisi muxolu no nano noxinge.
12 hLataua mumasaxainge misevile mo musosovosinge la ngexali ta mitema noxou mukalusi. Aloxo ne la sou anu laixe lexe ngatokolomongengi no anu 'ili'ilixo aloxo 'o, ngamasaxai'a ta menexinge mo tangengixa'a. Mo ngataloxolingenge xe nga'oxonu 'ilixo laixesi noxi'a ta mitema xe ta menexinge isusulingenge la la'iangenge palepalea mamu. 13 iNgavalangenge ngatongato'o mo lexe vile no taingengi ulosinge tu'umaxu la laixe lexe ngatavulenusi mo ngalulusou susu noxou loxo Tila mululusou susu noxinge. 14 jMo ngamasaxainge ngatongato'o mo tangegningenge manina. Xo 'ilixo ane ne mua'ulixu 'ili'ilixo latala mukalusi, mo ulavusou upitanu 'ili'ilixo mose'i ane lailaixe ne upita uxali vilesisi.
15 kNgingi vilevilesi ngexalixu Kalisito vasimolu xo Lataua mu'avalinge sou nga'oxonu aloxo ne, mo opo se'isisi noxou ne anu molu mulosinge sou uxolu no nano no tangengi, la sou anu umomomo sou uxalixu laixe ulai noxou Lataua. 16 lLaixe lexe vaikala noxou Kalisito uxolu u'ana'ana no nano no tangengi. Mo laixe lexe ngalosie'ixu mose'i, mo ngalosie'i no anu xavutala laixe xe lavulavu laixe la sou ane'i imomomo sou i'oxonu 'ilixo laixesi. La sou ngingi ngalemolu laixe ulai noxou Lataua no nano no tangengi, mo ngalexe lexe muxolu no nano no lavuku sou lexe no nano no tangengi, mo lexe sou lalotu xe lexe e Uleenu Tavuna uxalixu no nano no opongengi. 17 mMo no anu vaivaikala noxinge mo no anu xaixai noxinge mo no anu mimii latala nga'oxonu, la nga'oxonu no anu ualasou Kalisito anu Tila noxinge. Mo ngalemolu laixe ulai noxou Lataua anu Maminge no nano no ualasou.
'Ili'ilixo sou ta Mitema Noxou Lataua Ixolu no Nano no Tani Vile Imulinu
18 nNgingi ta sema ane ngetautaula'i ne, anu laixe lexe ngingi ngaxolu no laaxa'a ta mulumulumengi xo 'ilixo ane ne anu mulovo no iou Lataua. 19 oMo vaikala ulai noxinge ngingi ta mulu ngetaula'i kalumo aloxo 'o. Anu laixe lexe ngamasaxai'a ta semasemamengi manina, mo nga'oxo masuane'i mamu.20 pMo ngingi ta molomolo kalumo, anu laixe lexe ngalomuxa'a ta maminge ilo'a ta neninge no anu mimii latala ukalusi. Xo Tila umasaxau 'ilixo aloxo ne. 21 qMo ngingi ta mami'a kalumo nga'oxone'i lai'axa'a mamu, xo maasi la ane'i ixamuli lexe ane'i imomomo sou i'oxonu mii vile laixe uasi.
22 rMo ngingi ta mitema sou xaixai vitanisi, anu laixe lexe ngalomuxa'a ta tatilasinge no lia 'o no anu mimii latala ukalusi. Loxo 'o io ngingi nga'oxo lexe nga'oxone'i i'osasinge la nga'oxo xaixai laixe no mine ane'i ixoxolu imamaisinge. Ia nga'oxonu no nano no opongengi maninasou loxo nga'oxonu ulai sou ngatoxonu Tila la nga'oxonu xaixai laixesi. 23No anu mimii ma'ia nga'oxonu ne, la ngaxaxaisou no nano no opongengi maninasou loxo ngingi nga'oxonu ulai noxou Tila ia nga'oxonu ulai noxi'a ta mitema uasi. 24Ngingi ngelavusou lexe ili'i la Tila ulosinge mimii ane anu mulalaxiinu muai sou ulosi'a ta mitema noxou loxo 'ulusou xaixai noxinge. La sou anu loxo ngingi ngexolu ta mitema sou xaixai vitanisi noxou Kalisito, mo Anusisi anu Tilasinge. 25 sLa sou itema 'ena'ei ane u'oxonu susu ne anu uno'u lakolisou susu noxou ne, xo Lataua utilovosou 'ilixoi'a ta mitema no anu 'ilixo iouvilesisi.
Copyright information for
ATA