Eph 5 | ATA | STEP | Lataua tanungenge misevile loxo anu ta 'olu, la sou laixe lexe ngingi ngamulimulinu 'ili'ilixo loxo Anu u'oxo'oxonu.

a 5:1Mat 5:48

b 5:2Mul 29:18; Eva 10:10

c 5:51Ko 6:9-10; Kol 3:5

d 5:6Rom 1:18; Kol 2:4, 8

e 5:8Ioa 12:36; Ep 2:13; Kol 1:13; 1Pi 2:9

f 5:13Ioa 3:20-21

g 5:14Ais 26:19; Rom 13:11

h 5:15-16Kol 4:5

i 5:18Luk 21:34

j 5:19Kol 3:16

k 5:20Kol 3:17

l 5:211Pi 5:5

m 5:22Kol 3:18; 1Pi 3:1

n 5:231Ko 11:3; Ep 1:22

o 5:25Kol 3:19; 1Pi 3:7

p 5:26Tit 3:5

q 5:272Ko 11:2; Kol 1:22

r 5:31Tav 2:24; Mat 19:5

s 5:32Pal 19:7

‏ Ephesians 5

1 ^aLataua tanungenge misevile loxo anu ta 'olu, la sou laixe lexe ngingi ngamulimulinu 'ili'ilixo loxo Anu u'oxo'oxonu. 2 ^bMo no anu xoluxolungenge la ngamasaxainge ngatongato'o. Aloxo Kalisito mumasaxainge la mulosou maulixusinge loxo mii tuma'u lailaixe mo iaiama lailaixe manina uela ulai noxou Lataua.

3 La sou mamu sou nga'oxonu 'ili'ilixo sou vote'i mo 'ili'ilixo masumasua iouiou xe ngaisuisuxu ta menexinge mi'ami'a la ngavivikala sou. Xo ngingi ngexali ta mitema noxou Lataua la 'ili'ilixo ane ne nga'oxonu uasi. 4 Mo a'alo masumasua mo a'alo ane laixe uasi xe suku masumasua nga'oxonu uasi, ngasu'anu mo usu'a. Vaivaikala aloxo ne anu laixe sou ngingi nga'oxo'oxonu uasi, ia laixe lexe ngingi ngavikala laixe noxou Latauasi. 5 ^cXo ngingi ngelavusou laixe lexe ta mitema ane i'oxo'oxonu 'ilixo sou vote'i mo 'ili'ilixo masumasua iouiou mo isuisu ne ane'i umomomo sou i'unalai no anu saxisaxila'u noxou Kalisito mo Lataua e no anu opo loxotolo uasi. Ta mitema ane aloxo ne, 'ili'ilixo ane ne muxali loxo lataua noxi'a.

Tamuamua'i no Anu Lamana

6 ^dLa sou mamu sou itema vile u'oxonu lolongenge no anu vaivaikala ane tematemanu uasi la ngamulinu. Xo la'ia noxou Lataua uxolu noxi'a ane'i ane imulinu 'ili'ilixo ane ne xe ilolomu uasi. 7 Aloxo ne la sou mamu sou ngingi ngongi'a ngaxolu ngapita.

8 ^eXo tei la ngingi ngexolu no isivoxo, ia vaimomo 'o Tila mu'oxongengi la ngingi ngexolu no lamana. La sou ngamuamua'i loxo lamana ta 'olu. 9 Xo ngingi lamana ta 'olu la sou 'ili'ilixo lailaixe mo 'ili'ilixo mulapu xe 'ilixo sou vaikala manina uxolu noxinge, la anu umaxa'u nene'axu lamana anesi. 10 Mo ngingi ngatovo ngatilovosou 'ili'ilixo ma'ia manina ane ngingi nga'oxonu la Tila u'osa no anu. 11 Ngaxolu va'axu no anu 'ili'ilixo masumasua sou isivoxo ne xo anu uxalilixu nene'axu vile laixe uasi. Ia ngano'u 'ili'ilixo masumasua ne uatu mo ngamulaxu lamana. 12 Xo tamaela sou talemolu 'ili'ilixo ma'ia ane mi'oxo'oxonu mutalume ne. 13 ^fIa lamana uxalilixu mii ma'ia ane mutalume ne uxali lamana. 14 ^gXo no anu lamanasi la sou mimii latala e mutalume ne muxali lamana. La sou umomomo sou vaikala aloxo 'o.

“Nini 'ena'ei neai, ne natulu.
Natulu no anu soli.
Mo Kalisito lamanaxu uieisine.”
15 ^hMo ngasaxila'u muamua'ingenge laixe ia mamu sou ngamuamua'i loxo itema xavutalau laixe uasi, uasi. Ngamuamua'i loxo itema xavutalau laixe. 16 Mo vaimomo 'o anu voxo nga'angingi sou nga'oxonu 'ili'ilixo lailaixe xo vaimomo 'o anu voxo masumasua. Xo itema sou isivoxo u'oxonu lolongenge. 17 Aloxo ne la sou ngaxolu ngaxovulaulau uasi, ia ngalavu sou masaxa noxou Tila a loxovaa. 18 ⁱMo ngaiexu lexa pekia'u mamu xo anu sou uxovulaulaulingenge la ngasu'a avile. Ia laixe lexe nga'ana'ana no anu Uleenu Tavuna. 19 ^jMo lexe ngavivikalangengi ngatongato'o la laixe lexe ngavivikala no anu lexe e muai no nano no anu Lavuku sou lexe, mo ngalexe la ngalexe lexe sou lalotu. Xe lexe ma'ia Uleenu uxalilixu no tangengi sou ngalexenu. Mo ngalexe no anangenge mo ngalexe no nano no tangengi ulai noxou Tila. 20 ^kMo utotomu la ngavikala laixe ulai noxou Lataua anu Maminge no anu mimii tavu'alo ukalusi no ualasou Tila noxinge Iesu Kalisito.

Vaikala Ulai Noxi'a ta Mulu Ilo'a ta Semasemai'a

21 ^lNgingi ngaxolu no laangenge ngatongato'o xo ngingi nga'ume mo ngatoxonu Kalisito. 22 ^mTa sema ngaxolu no laaxa'a ta mulumulumengi mo ngalomuxa'a loxo ngingi ngexolu no laaxu Kalisito mo ngelomuxu. 23 ⁿXo mulu anu muxolu kisie semau loxo Kalisito anu muxolu kisou lalotu. Xo lalotu anu Kalisito vasimolu mo Anu mupamaulinu. 24 Ia aloxo lalotu uxolu no laaxu Kalisito la ngingi ta sema kalumo ngaxolu no laaxa'a ta mulumulumengi no anu mimii latala ukalusi. 25 ^oMo ngingi ta mulu kalumo ngamasaxi'a ta semasemamengi misevile. Aloxo Kalisito mumasaxau lalotu misevile la mulosou maulixu sou. 26 ^pMo mu'ulosou lalotu mo muxali malemalenga manina mo muxali ta na'u no anu lexa xe no anu vaikala noxou. 27 ^qMo umasaxa lexe ulalaxiinu lalotu noxou ne uxali laixe mo uleleme manina no iou. Mo nuni vile mo xoxoa mo mimii iouiou uxolu no anu lalotu noxou ne uasi. Anu umasaxa lexe lalotu noxou ne uxolu va'axu no anu 'ili'ilixo masumasua mo ixalisou susu vile no anu uasi. 28 Anu iouvilesisi aloxo ta mulu ngamasaxai'a ta semasemamengi manina aloxo ngamasaxainge manina. 'Ena'ei ane umasaxaie semau la anu mumasaxau kalumo. 29 Xo itema vile ulavusou u'oxonu masuanu vasimolu uasi, ia anu ua'anu xe usaxila'u laixesi. Anu iouvilesisi aloxo Kalisito u'oxonu no anu lalotu. 30 Xo nenge vilevilesi tepita la sou texalilixu lalotu ne vasimolu muxali. 31 ^rLa sou vaikala muai no nano no anu Lavuku Tavuna teinu muvikala aloxo 'o,

“Tava'u aloxo ne la sou mulu u'umesi'a momu ilee nenu la ulai ilee semau ixolu ipita sou ixali vilesisi.”
32 ^sVaikala ane 'o ne laaxu tatila manina mo mutalume ia eni elavusou lexe anu mulemo Kalisito ilou lalotu noxou. 33 Ia anu aloxo ne ulai noxinge ngingi ngamulu vilevilesi lexe ngamasaxaie semameni manina aloxo ngingi ngamasaxainge manina ne. Xe ngingi ngasema kalumo ngatoxonu mulumengi.