Ephesians 6
Vaikala Ulai Noxi'a ta Molomolo Mo ta Mami'a Ilo'a ta Neni'a
1 aTa molomolo, ngatoxone'i ta maminge ilo'a ta neninge. Xo ngingi noxou Tila. Xo anu 'ilixo laixe sou ngamulinu ane. 2 bVaikala muai no nano no anu Lavuku Tavuna teinu noxou Lataua mikaukavunu aloxo 'o, “Ngatoxone'i ta maminge ilo'a ta neninge.”Xo anu lapuloto muai tei aloxo ne mo misakiinu vaikalasou aloxo 'o, 3“Lexe ngingi nga'oxonu aloxo ne la sou mimii ma'ia ane ngingi na'oxonu ne uxali laixesi la nga'osa mo ngaxolu maxuveeni no lia 'o.”
4 cMo vaikala ulai noxi'a ta molomolo ta mami'a aloxo 'o. Mamu sou nga'oxone'i ta 'ilinge la'iaxa'a. Ia ngingi nga'oxonu 'ilixo laixe mo ngamomosi'a xe ngapotone'i no anu vaikala noxou Tila.
Vaikala Ulai Noxi'a ta Mitema sou Ixaxai Vitanisi Ilo'a ta Tatilasi'a
5 dMo ngingi ta mitema sou ixaxai vitanisi ngalomuxa'a ta tatilasinge no lia 'o mo ngatoxone'i. Mo nga'ume noxi'a la nga'oxonu xaixai laixe manina no ie'i. Aloxo ngingi nga'oxonu ulai noxou Kalisito. 6Loxo 'o io ngingi nga'oxo lexe nga'oxonu xaixai laixesi no mine ane'i ixoxolu imamaisingesi la i'osasingexu. Ia aloxo ne uasi, ngingi nga'oxonu xaixai loxo ngingi ta mitema sou xaixai vitanisi noxou Kalisito mo opongengi u'osa sou ngamulinu masaxa noxou Lataua. 7La sou ngaxaxai no opongengi maninasou. Xo xaixai e ngingi nga'oxonu ne nga'oxonu ulai noxi'a ta mitema uasi. Ngingi nga'oxonu loxo nga'oxonu ulai noxou Tila. 8 eXo ngingi ngelavusou lexe ta mitema sou ixaxai vitanisi mo ane'i ane ixaxai vitanisi uasi ne Tila ulosi'a 'ulu sou xaixai laixe noxi'a ukalusi.9 fMo ngingi ta tatilasi'a ta mitema sou ixaxai vitanisi kalumo nga'oxonu 'ilixo laixe noxi'a mo nga'oxone'i i'umenge mamu. Xo ngingi ngelavusou lexe ngingi ngongi'a ne Tila noxinge a uxolu teitexi no opo loxotolo mo ili'i la u'oxonu tulatula noxou evile uasi.
Ngatelonu Tokolomo sou 'Oto'oto Noxou Lataua
10Ioxe, vaimomo 'o eni amasaxa akalusou vaivaikala noxilo ulai noxinge aloxo 'o. Ngingi ngongi'a Tila ngepita, mo no anu xavi musuku noxou la u'oxongengi ngatulu pekia'inge. 11 gLa sou ngatelonu tokolomo sou 'oto'oto noxou Lataua utelo no vasimenge. Mo sou utalungenge xe u'oxongengi ngatulu pekia'inge sou ngalooxu xavutala kalakalavoi noxou Satani e lexe u'oxonu noxinge. 12 hXo 'oto'oto ane 'o ne sou nenge ta'oto noxi'a ta mitema e vasime'a loxo nenge 'o uasi. Nenge ta'oto noxi'a ta uleenu ane mixolu teitexi mo ta'oto noxi'a ta uleenu ane iulaxune'i ta uleenu, mo noxi'a ta mimii ane xavine'i musuku e misaxila'u isivoxo no lialia 'o. Xe ta'oto noxi'a ta uleenu ta masumasua e muxolu teitexi no loxotolo. 13Aloxo ne la sou ngatelonu tokolomo sou 'oto'oto noxou Lataua ne ukalusi mo uxoo no vasimenge. Mo sou no anu voxo masua la ngingi nga'oto ulivu pekia'inge. Xe ili'i no anu 'oto'oto ne ukalu la ngingi ngatulu peki'ainge mo ngalapau uasi. 14 iLexe ngingi ngamasaxa ngatulu pekia'inge la ngasakiinu vaikala manina loxo sini sou ngautupokolixu no vaimenge, mo 'ili'ilixo mulapu loxo siovexu lutungengi. 15 jMo ngalalaxii sou ngalai nga'aloxu a'alo laixe sou opo se'isisi noxou Lataua loxo siove sou tava'inge ngataanu no tava'inge. 16Mo mii vile mutila no anu tokolomo sou 'oto'oto ne sou ngano'u utotomu ane muxamuxaxu tangengi loxo xaliau. Xo no anu xaliau ne la ngingi ngamomomo sou ngataluxu lalumiso axexexaxu noxou itema masua e lexe uto'omenge no anu. 17 kMo ngaxavutalanu 'ilixo sou Lataua mupamaulingengi uxolu no kisinge ngataanu loxo siove sou utaluxu kisinge. Xe ngano'u vaikala noxou Lataua ngatetelisou loxo lavisou Uleenu Tavuna. 18 lMo utotomu la nga'oxonu lakilaka iouiou ulai noxou Lataua no anu xavi no anu Uleenu Tavuna, sou usu'ulingengi no anu taitaiinu a loxovaa. Mo ngatetelisou 'ilixo ane ne uxolu no anu xavutalamengi pekia'u. Mo ngaloo xe ngakilakasi'a ta mitema noxou Lataua utotomu.19 mMo ngakilakasilo kalumo lexe no mine eni avivikala la Lataua ulosilo vaivaikala sou alemolu, mo sou eni a'ume uasi la a'aloxu a'alo laixe noxou Iesu ma'ia mutalume ne. 20 nXo eni itema sou a'aloxu a'alo laixe noxou Iesu e Lataua mupalusilo la sou eni misakileli no nano no taasou navunavu 'o. La sou ngakilakasilo mo sou eni a'alo la a'ume uasi mo a'alo no anu mii ma'ia ane lexe a'aloxu.
Vaikala Kaluxusou
21 oIa eni amasaxa lexe ngalavu laixe no anu xoluxoluxo mo mimii ma'ia ane eni a'oxo'oxonu 'o la sou Tukikosi anu vivilo e eni emasaxau musuku xe itema sou xaixai manina noxou Tila molu ua'alomengi no anu mimii ukalusi. 22Anu tava'u aloxo ne la sou eni epalusou mulai noxinge mo sou ngingi ngalavusou lexe nexi texolu a loxovaa xe umamaatolasinge.23Mo eni akilaka lexe opo se'isisi noxou Lataua Maminge mo Tila Iesu Kalisito uxoo noxinge ta vivilo ngamasaxainge misevile ngatongato'o mo ngamuxaxu tangengi. 24Xe akilaka lexe alauna uxolu noxinge ukalusi e tangengi noxou Tila noxinge Iesu Kalisito utotomu mo kaluxu uasi. Manina.
Copyright information for
ATA