Hebrews 4
Ta Mitema Noxou Lataua Ixolu Ima'ila
1Vaikala e Lataua musakiinu tei lexe ta mitema ane'i ane miloopalasi ane i'unalai no tuala sou ma'ila noxou ne anu a mukisi sio mo a ututulu sio. La sou nenge'a talaxa'i loxo 'o io se'i noxinge maasi la i'unalai no tuala ne uasi. 2Nenge kalumo telomusou a'alo laixe noxou Iesu e ane'i milomusou ne usu'uline'i uasi xo ane'i milomusou ia imuxaxu tane'i no anu uasi. 3 aAloxo ne la sou vaimomo 'o nenge ane temuxaxu tanengesi ane tamomomo sou ta'unalai no tuala sou ma'ila ne, aloxo Lataua mulemolu. Anu muvikala aloxo 'o,“Aloxo ne la sou eni la'iaxo, la evikalane'i lexe,
‘Manina teitexi, ane'i imomomo sou i'unalai no tuala sou ma'ila noxilo uasisi manina.’”
Lataua muvikala aloxo ne la anu manina, xo tatei no mine Anu mukoinu mimii latala mukalusi, la Anu mulalaxiinu tuala sou ma'ila kalumo ne a muxolu. 4 bAloxo vaikala vile muai no nano no anu vaikala noxou Lataua sou voxo muxatele tamei muvikala aloxo 'o “Lataua mukalusou xaixai noxou xe no anu voxo muxatele tameisou la Anu muma'ila.” 5 cMo aloxo no anu vaikala mautunu e nenge telomusou tei la muvikala lexe, “Ane'i imomomo sou i'unalai no nano no tuala sou ma'ila noxilo uasisi manina.”
6La sou anu mumaxa'u lexe tuala sou ma'ila ne anu a uxoxolusio sou ta mitema mose'i i'unalai no anu, xo ane'i ane tatei milomusou a'alo laixe noxou Iesu ia imulinu uasi la i'unalai uasi. 7 dAloxo ne la sou Lataua musosovosou voxo vile la, la sou voxo ne ane vaimomo 'o. Anu muvikalane'i ta mitema tatei no anu vaikala aloxo telomusou tei ne. Mo tauu ie tavu'alo mulai mukalu xe ili'i la Anu mulemolu no anaxu Deviti la. La Anu muvikala aloxo 'o,
“Vaimomo 'o lexe ngalomusou xolinu
la ngatatusou opongengi pekia'u mamu.”
8 eLexe Iesua mulosi'a ta mitema ma'ila, la Lataua usosovosou voxo vile la sou ma'ila la uasi. 9Aloxo ne la sou nenge talavusou laixe lexe voxo vile sou ma'ila noxi'a ta mitema noxou Lataua a uxoxolusio. Ma'ila ne iouvilesisi aloxo voxo manina sou ma'ila. 10 fMo nenge telavusou lexe itema ane mukalusou xaixai noxousi la anu u'unalai no tuala sou ma'ila noxou Lataua. Anu iouvilesisi aloxo Lataua mukalusou xaixai noxou mukalu, la sou anu muma'ila. 11Aloxo ne la sou anu laixe lexe nenge'a xavinenge mo sou ta'unalai no tuala sou ma'ila ne. Loxo 'o io se'i noxinge imulinu 'ilixo noxi'a ane'i taatei sou ilomu uasi la u'oxone'i ilapau la umomomo sou i'unalai uasi.
12 gXo vaikala noxou Lataua ne anu mauli mo anu xaviinu mo anaxu manina mua'ulixu laviso e anaxu tatamei. Vaikala ne uto'omolu itema la u'unalai no nano manina no anu uleenu ilou tanu upita xe ukalipala toxotoxo no anu itema xinuxinu mo xinuxinu taxutaxulunu. Xe utilovosou xavutalanu mo masaxa muxolu no nano no tanu. 13Mimii e Lataua mukoinu mukalusi 'o ne mii vile umomomo sou utalume no iou uasi. Mimii latala e Lataua mukoinu ne muxolu lamana no iou mukalusi, upala'a xe uai no tani keakea. Mo Anusisi utilovosou 'ili'ilixomenge ukalusi.
Iesu Anu Muxali Tatila Kisi'a ta Aili'i Tatila Noxinge
14 hIoxe kisi'a ta aili'i tatila noxinge mu'unalai mo a muxolu teitexi no opo loxotolo. Anu Iesu e Lataua 'Olu. La sou muxamuxaxu tanenge noxou e telemolu ne, anu laixe sou nenge'a tatetelisou pekia'u. 15Xo nenge tovotovo uxali noxinge la nenge xavinenge sou tataloxolixu uasi la u'oxonenge pelesinge. Ia loxo 'o io nenge xavutalamenge uvikala lexe kisi'a ta aili'i noxinge ne loxo 'o io tanunenge uasi. Uasi Anu tanunenge, xo tovotovo iouiou e uxali noxinge vaimomo 'o ne anu muxali noxou sou mutovonu tei kalumo, ia Anu ususu uasi. 16 iLa sou laixe lexe nenge talai alai no 'a xoluxolu laixe noxou Lataua ia ta'ume uasi. Ta'unalai no nano no anu alauna noxou. Lexe nenge talai noxou la sou tamaisou alauna noxou xe tanutanuxu noxou noxinge. Mo lexe tu'umaxu uxalisinge la Anu usu'ulinenge.
Copyright information for
ATA