Heb 5 | ATA | STEP | Ioxe, vote'isou itema uxali kisi'a ta aili'i ne aloxo 'o. Lataua ulosou xaixai sou usosovosou itema vile no taine'i ta menexu la utulusou xe ulosou xaixai sou usosovosi'a ta mitema no anu mii ma'ia i'oxonu ulai noxou Lataua. Xe ta mitema ino'u mimii mose'i sou ine'e ilosou aili'i la u'elaxu mo uvau ukalu la u'elaxu sou uxexeenu susu noxi'a.

a 5:3Liv 9:7, 16:6

b 5:4Mul 28:1

c 5:5Lex 2:7

d 5:6Lex 110:4; Eva 6:20, 7:1

e 5:7Mat 26:36-46; Pil 2:6-8

f 5:121Ko 3:1-3

‏ Hebrews 5

1 Ioxe, vote'isou itema uxali kisi'a ta aili'i ne aloxo 'o. Lataua ulosou xaixai sou usosovosou itema vile no taine'i ta menexu la utulusou xe ulosou xaixai sou usosovosi'a ta mitema no anu mii ma'ia i'oxonu ulai noxou Lataua. Xe ta mitema ino'u mimii mose'i sou ine'e ilosou aili'i la u'elaxu mo uvau ukalu la u'elaxu sou uxexeenu susu noxi'a. 2 Xe ta mitema ane lavulavui'a uasi mo ane milai va'axu ine'e noxou sou uxaxaisi'a la umalalixa'asi xo anu kalumo ne pekia'u sou uxaxaisi'a uasi. 3 ^aLa sou no mine ane'i ino'a ta mimii ine'e sou lexe anu u'elaxu sou uxexeenu susu noxi'a la anu u'oxonu sou uxexeenu susu noxou kalumo.

4 ^bItema uxali kisi'a ta aili'i ne anu uno'u uala tatila manina, la sou itema vile umomomo sou ukelelixu u'una no anu xaixai 'o no anu masaxa noxousi uasi. Xo Lataua anusisi u'avalou itema ne la sou ulosou xaixai sou uxaxaisou loxo anu mu'oxonu noxou Aloni taatei. 5 ^cMo Iesu kalumo ne Anu aloxo ne, Anu molu mune'esi ka molu mulosou uala tila sou mu'oxonu muxali kisi'a ta aili'i uasi. Ia Lataua molu musosovosou sou u'oxonu xaixai ane. Xo loxo Anu mulemolu, la muvikalanu lexe,

“Nini ne, eni 'alixeni, mo vaimomo 'o eni exali Mamine.”
6 ^dMo no anu kaukavu vile muai no anu vaikala noxou Lataua la Lataua muvikala la aloxo 'o,

“Nini naxolu loxo aili'i vaimomo 'o mo kaluxu uasi,
mo neno'u tanixu Melikisateki.”
7 ^eNo anu voxo e Iesu muxolu mo mumauli loxo itema no lia 'o, la Anu mukilaka mutotomu mulai noxou Lataua, xe muvikalanu sou usu'ulinu. Anu mukilaka toxotoxoxa'a xe mutama iou lexaxu munixi mulai noxou Lataua, xo mulavusou lexe Lataua anusisi umomomo sou usu'ulinu no anu soli. Lataua mulomuxu la mukolinu lakilaka noxou xo Anu mutaloxolixu. 8 Manina anu Lataua 'Olu, ia Anu mutavulenu tu'utu'umaxu. Aloxo ne, la sou no anu tu'utu'umaxu ne mulosou lavulavu lexe no anu 'ilixo sou umulinu masaxa noxou Latauasi, xe ulolomuxusi, la utavulenu tu'utu'umaxu. 9 Xo Anu mumulinu masaxa noxou Momu laixe, la sou Anu muxali kisi'a ta aili'i laixe manina mo tava'u pamauli noxi'a ta mitema mukalusi ane imulinu masaxa noxou, xe ulosi'a mauli ane kaluxu uasi. 10 Xo Anu mu'oxonu aloxo ne la sou Lataua musosovosou sou muxali kisi'a ta aili'i tatila manina la muno'u tanixu Melikisateki.

Mamu sou Taxolu Tatovava loxo ta Molomolo ta Kitukitu'a

11 No anu ngiou ane Iesu muxali kisi'a ta aili'i loxo Melikisateki ne, nexi tamomomo sou taa'alomengixu tavu'alo. Ia nexi tamomomo sou talamanalixu ukalusi uasi, xo ngalomusou laixe ia xavutalamengi ne utovava sio. 12 ^fNgingi ngexolu no nano no anu lalotu mo ngexali ta mitema noxou Kalisito maxuveni. Mo vaimomo 'o ne ngingi ngamomomo sou ngaxali ta tisa sou ngalosi'a mose'i lavulavu. Ia uasi ngingi ngatovavasi la sou ngamasaxa lexe ngaxolusi ia ta mitema se'i ine'e sou ia'alomengi no anu lavulavu se ngeno'u tei noxou Lataua no anu vaikala la. Xo ngingi ngamomomo sou menge ngano'u la'ilali pekia'u mo nga'ou uasi. Ngingi uao ngaiexu susu loxo ta keakea sio. 13 Nenge telavusou lexe ta mitema e iiexu susu sio ne ane'i uao ta keakea sio, mo ilavusou 'ilixo mii ma'ia laixe xe masua uasi. 14 Ia la'ilali pekia'u ne ta mitema ta tatila na'a. Ane'i ta mitema ane loxo ne ane'i milavusou vote'i sou itilovosou mii ma'ia ane masua xe mii ma'ia ane laixe. Xo ane'i mitotovonu sou mi'oxo'oxonu mutotomu no anu maulixa'a.