James 1
1 aEni Iakovo, amitema sou xaixai vitanisi noxou Lataua mo noxou Tila Iesu Kalisito. Eni ekaukavunu vaivaikala ane 'o ulai noxinge ngingi ta Isilaeli mata mulelia tamei e ngelai ngexolu no xalexalee tuatuala mukalusi no lia 'o. Eni asova aso laixe ulai noxinge.Tovotovo Iouiou
2 bNgingi ta vivilo ta mitema noxou Lataua, no mine tovotovo iouiou uxalisinge, la nga'osasou manina! 3 cXo ngingi ngelavu lexe tovotovo ane ne utovonu muxamuxaxu tangengi noxou Lataua ia utaloxolingengi uasi la Anu umaxa'u lexe ngingi xavingengi sou ngatulu pekia'inge no anu. 4Ia lexe ngingi nga'oxonu aloxo ne utotomu, la 'ili'ilixomengi uxali laixe la. La sou ngingi ngaxali pekia'inge manina mo ngaxali laixe, ia 'ilixo vile pa'usinge no anu uasi. 5 dIa lexe vile noxinge iu lavulavu laixe uasi, la anu ulinga ulai noxou Latauasi. Xo Anu u'osasou ulosiouxusi, ia ulavusou uapisou uasi. 6Ia no mine anu ulinga, la anu umuxaxu tanu noxou Latauasi. Ia mamu sou anu uxavutala tapiena, xo anu ane uxavutala piena la anu loxo xasi no luaki ane sivo utausou la ulai une'e. 7Itema ane loxo ne, la mamu sou anu uxavutala lexe Tila ulosou mii ma'ia ane anu mumasaxau. 8Xo anu itema sou xavutala tamei mo nenge umomomo sou tamulaxu tanenge no anu mii ma'ia ane anu u'oxonu uasi.9Aloxo ne, la sou itema vile noxou Lataua ane iu mimii uasi ne, laixe lexe anu u'osa. Xo anu mumulaxu tanu noxou la anu mu'itinu ualasou.
10 eMo laixe lexe itema sou lavuluti kalumo u'osa no mine Lataua uxexeenu lavulutiu la mutaloxolixu ualasou. Xo itema loxo ne, ukalu vitanisi loxo ia'eia'e seseenu. 11Aso utelo xe atume utavule ialuxu, la uxutuxu ia'eia'e seseenu. La sou ia'eia'e seseenu lailaixe ne, uxali masua mo uxalo la ulapau. Aloxo ne, la sou itema sou lavuluti kalumo ukalu vitanisi no mine anu uxaxaisou lavulutiu ne.
12Ia Lataua ualusou anu ane utulu pekia'u no anu tovotovo, xo no mine anu muaulixu ne la Lataua ulosou kisivalu sou mauli aloxo anu musakii vaikala tei lexe ulosi'a ane'i ane mimasaxau.
13Lexe tovotovo uxali noxou itema vile, la mamu sou uvikala lexe tovotovo ane ne molu noxou Lataua. Xo evile umomomo sou utovonu Lataua, mo sou u'oxonu 'ilixo masua uasi. Mo Lataua kalumo utovonu evile sou u'oxonu 'ilixo masua uasi. 14Ia vote'i sou tovotovo u'oxonenge vilevilesi ne aloxo 'o. Masaxa masua sou visimenge muxolu tei, la sou anu molu ulapunenge sou nenge ta'oxonu 'ili'ilixo masumasua. 15Xe ili'i, la masaxa masua mumauli no oponenge. Xe ili'i, la anu muxali muuatu sou ta'oxonu 'ili'ilixo masumasua. La sou 'ili'ilixo masumasua ne, muxali mu'oki, la sou neneaxu ane soli ne si.
16Ta mitema noxou Lataua e eni emasaxainge! Mamu sou ta mitema i'oxoo lolongenge. 17Xo mimii latala molu teitexi noxou Lataua ne lailaixe manina, ia mii vile masua uasi molu teitexi noxou Maminge e anu mukoinu lamana no opo loxotolo. Ia anu uxiuxiu loxo xaleenenge uasi. 18 fAnu musosovosinge lexe nenge texali ta 'olu no mine nenge temulinu vaikala manina. La sou Lataua uno'inge tei no anu mimii latala e anu mukoinu mukalusi.
Talomusou La Ta'oxonu
19La sou ta mitema noxou Lataua e eni emasaxainge, ngingi ngaxavutalanu vaivaikala ane 'o laixe. Eni emasaxa lexe ngingi ngavikala tapiena uasi, ia ngalomungenge ngatongato'o. Mo emasaxa lexe ngingi ngaxavutala laixe tei ka sou ngavikala, ia mamu sou la'iangenge palea. 20 gXo ngingi la'iangenge ngatongato'o, la 'ilixo ane ne umomomo sou usu'ulingengi sou nga'oxonu 'ili'ilixo ane Lataua mumasaxau uasi. 21 hLa sou ngaxiu tumalingeu 'ili'ilixo masumasua mo 'ili'ilixo ane u'oxo masuane'i ta mitema, ia nga'osa sou ngano'u vaikala noxou Lataua mo ngaxaxaisou no anu maulingenge. Vaikala noxou ne, Lataua mutounu no opongengi loxo ta mitema mitounu ovu ngiaxu no xai sou upamaulingengi.22 iIa ngalomusou vaikalasi uasi, ngamulinu mii ma'ia ane anu mulemolu. Ia ngamulinu uasi, la ngingi menge ngakalavoingengi. 23Xo vaikala ane ne manina, anu ane ulomusousi ia umulinu uasi, la anu loxo itema e mumaisou xaleexu no anu titilo. 24Ia anu mumaisou mukalu, xe mulai ia alaxu vilesisi la iou si'isou lexe anu iou a lovoxaa. 25 jIa lexe itema vile umalei lailaixe no anu lapuloto ane mululusi'a ta mitema muxali maninasou noxou Iesu mo u'oxonu aloxo ne utotomu, la anu umomomo sou tanu vulusiou mii ma'ia ane anu mulomusou ne uasi, ia anu u'oxonusi. La sou itema ane loxo ne, Lataua ualusou no anu mii ma'ia ane anu u'oxonu.
26 kLexe itema vile uvikala lexe anu itema sou lalotu ia anu usaxila'u vaivaikalau laixe uasi, la anu molu mukalavoinu. No anu 'ilixo noxou ane ne, la lalotu noxou ne mii vitanisi. 27Lalotu ane Lataua Maminge u'osasou ne, anu lalotu maninasou mo kalavoi vile no anu uasi. Lexe itema vile uvikala lexe anu itema sou lalotu maninasou, la anu usaxila'a ta oloxola ilo'a ta sema ta vaalu no anu tu'utu'umaxu noxi'a. Mo anu usaxila'u no anu 'ili'ilixo masumasua noxi'a ta mitema ane ilavusou Lataua uasi, mo sou 'ili'ilixo masumasua noxi'a ne uxoo masua uasi.
Copyright information for
ATA