James 2
Mamu sou Ngailoinge
1 aTa vivilo ta mitema noxou Lataua! Ngingi ngemulaxu tangengi noxou Tila noxinge Iesu Kalisito ane nenge ta'iti'iti ualasou utotomu, la sou mamu sou ngailoinge. 2Ioxe, no mine ngingi ngapita no taasou lalotu noxinge, la ta mitema tamei mi'una. Ilou mi'una, la vile noxi'a ilou mutaataa tokolomo iouiou lailaixe no vasimolu, ia tokolomo ne lamolisou toxotoxoxa'a. Ia vile noxi'a ilou ne, mutaa tokolomo masumasuasi. 3Ngamaisi'a aloxo ne, la ngataxanu ane mutokolomo lailaixe. La ngavikalanu lexe, “Nane'e mo naxolu no anu luu laixe 'o.” Ia ngavikalanu soxu e mutokolomo masumasuasi ne lexe, “Nalai natulu 'ole.” Xe uasi la, “Nane'e naxolu no lia no tava'ilo.” 4Lexe ngingi nga'oxo 'ili'ilixo aloxo ne, la ngingi ngailoinge manina ane mo ngailevine'i manina, xo xavutala masua muxolu noxinge.5 bTa vivilo ta mitema noxou Lataua e eni emasaxainge, ngalomusou vaikala noxilo aloxo 'o. Ngingi ngelavusou manina lexe Lataua musosovosi'a ta mitema ane'i ane i'a lavuluti uasi no lia 'o sou lexe ane'i ixali ta mitema sou lavuluti no iou Lataua, xo ane'i mimuxaxu tane'i noxou. Mo musosovosi'a sou i'unalai no anu saxisaxila'u noxou, xo anu musakii vaikala tei lexe anu upelemasaxane'i ane'i ane mimasaxa i'unalai. 6Ia ngingisi ngepamaelanu itema e iu lavuluti uasi. Ia 'ena'ei ane mi'oxo masuangengi? Mo 'ena'ei mimasaxa sou itulusinge no anu vaivaikala? Ane'i ane ta mitema sou lavuluti. 7Mo ane'i ivikala masua sou uala lailaixe noxou itema ane ngingi noxou.
8 cLexe ngingi ngamulinu lapuloto toxoxa'a muxolu no nano no anu Lavuku Tavuna teinu, la ngingi ngemu-linu 'ilixo laixe. Lapuloto toxoxa'a ne, mikaukavu aloxo 'o, “Ngamasaxai'a ta mitema aloxo ngingi ngemasaxainge.” 9 dIa lexe ngingi ngeixexa'a ta mitema, la ngingi nge'oxo 'ilixo masua. Xo ngingi ngamulinu lapuloto ane Lataua muvikalangengi lexe ngamulinu uasi. 10 eVaikala ane ne, manina. Xo anu ane umulinu lapuloto noxou Lataua latala ukalusi, ia ususu no anu mii vile la anu uno'u navunavusou xo anu mumamulonu lapuloto latala mukalu ne. 11 fXo anu ane muvikala lexe, “Mamu sou ngalai noxi'a ane'i ane mitautaula'i.” ne muvikala kalumo aloxo 'o, “Mamu sou ngavau itema usoli.” Lexe ngingi ngalai noxi'a ane'i ane mitaula'i uasi, ia ngevau itema musoli la ngingi ngemamulonu lapuloto mukalu.
12 gLa sou ngingi ngavikala mo nga'oxonu ma'ia, la ngaxavutala laixe. Xo Lataua utulusinge no anu vaivaikala sou lapuloto noxou ane anu ngapamaulinenge sou ngano'u navunavu uasi. 13 hXo lexe itema vile u'oxo alauna sou menexu vile uasi, la Lataua u'oxo alaunasou kalumo uasi. Ia itema vile u'oxo alaunasou menexu vile, la Lataua kalumo u'oxonu alaunasou no mine Lataua utulusou no anu vaivaikala.
Muxamuxaxu Tanenge Noxou Lataua ne, Uxalixu 'Ili'ilixo Lailaixe
14Ta vivilo ta mitema noxou Lataua! Lexe itema vile uvikala lexe anu umuxamuxaxu tanu noxou Lataua ia 'ili'ilixo ne laixe uasi, la sou muxamuxaxu tanu noxou Lataua ne upamaulinu a loxovaa? Uasisi manina. Anu umomomo sou upamaulinu uasi. 15 iIoxe, eni atovola'i sou ulamanalingenge aloxo 'o. Lexe vile noxinge noxou la'ilali mo iu tokolomo uasi, 16ia vile noxinge uvikalanu lexe, “Lataua ualusine. Nalai na'ani laixe mo nataa tokolomomeni sou u'oxo vasimene ialuxu.” Ia ulosou mii vile sou usu'ulinu vasimolu uasi, la vaikala ne usu'ulinu a loxovaa? Uasisi manina. 17Aloxo ne, la sou muxamuxaxu tanenge noxou Latauasi ia menexu 'ili'ilixo laixe uasi, la muxamuxaxu tanenge ne musoli loxo itema.18 jXe itema vile muvikala lexe, “Ta mitema mose'i imuxamuxaxu tane'i noxou Lataua xe se'i i'oxo 'ili'ilixo laixe.”
Ia eni avikalanu aloxo 'o, “Nini natovo namaxa'u loopalasi noxine noxou Lataua ia menexu 'ili'ilixo laixe uasi une'e noxilo. Ia eni, la amaxa'u loopala noxilo noxou Lataua no anu 'ili'ilixo laixe noxilo ulai noxine. La sou ta mitema imaisou.” 19Ngingi ngemuxaxu tangengi lexe Lataua vilesisi a uxoxolu. La anu mii vile uasi. Ia ta ulee ta masumasua kalumo mimulaxu tane'i aloxo ne la i'olo'olo.
20Ngingi ngexovulaulau misevile. Muxamuxaxu tangengi noxou Latauasi ia menexu 'ili'ilixomengi laixe uasi, la muxamuxaxu tangengi ne, mii vitanisi. Ia ngingi ngamasaxa ngalavu laixe no anu? 21 kTatei, la mutu'u ovunenge Avalaamu muaisou 'olu Aisaki no valovalo sou ulosou Lataua. Xe no mine anu mu'oxonu aloxo ne, la Lataua mumoxo'u lexe anu itema mulapu. 22 lNgingi ngelavu lexe anu umuxaxu tanu noxou Latauasi uasi, anu mumulinu vaikala noxou Lataua mo mu'oxonu. La sou 'ilixo ma'ia ane anu mu'oxonu ne, anu mumaxa'u lexe Avalaamu mumuxaxu tanu noxou Lataua manina. 23 mLa kaukavu vile no nano no Lavuku Tavuna teinu ne muxali manina. Kaukavu ne aloxo 'o, “Avalaamu mumuxaxu tanu noxou Lataua, la sou Lataua mumoxo'u lexe anu itema mulapu.” La sou ane'i mimoxo'u lexe anu Lataua menexu. 24La sou ngingi ngelavu aloxo 'o. Itema vile umuxaxu tanu noxou Latauasi uasi, ia anu u'oxo'oxonu 'ili'ilixo laixe, la Lataua umoxo'u lexe anu itema mulapu.
25 nAnu aloxo noxou Avalaamu, Lataua mumoxo'e Reebu ane sema sou vote'i kalumo lexe ane sema milapu? Xo ane misu'uline'i ta mitema e Iosua mupalusi'a la mi'ume milai no vote'i vileli. 26La sou nenge telavusou aloxo 'o. Itema vile umuxaxu tanu noxou Lataua ia u'oxonu 'ili'ilixo laixe uasi, la muxamuxaxu tanu ne anu musoli loxo itema uleenu uxolu noxou uasi.
Copyright information for
ATA