Jam 4 | ATA | STEP | Ia mose'i noxinge i'oxonu opo se'isisi noxi'a ta menexi'a uasi. Tava'u loxovaa la sou ngingi nga'oto'oto mo nga'oto'otosou anangenge ngatongato'o? Eni akoli aloxo 'o. Masaxa masua ane muxolu no opongengi mo u'oto'oto no anu xavutalamengi laixe ne, anu tava'u 'oto'oto no taiingengi ane.

a 4:1Rom 7:23

b 4:4Rom 8:7; 1Ioa 2:15

c 4:6Xav 3:34; 1Pi 5:5

d 4:7Ep 6:12

e 4:8Ais 1:16; Sek 1:3; Mal 3:7

f 4:10Iop 5:11; 1Pi 5:6

g 4:12Rom 2:1, 14:4

h 4:13Luk 12:18-20

i 4:14Lex 39:5, 11; Xav 27:1

j 4:17Luk 12:47

‏ James 4

Nga'italonu Maulingenge Ulai Noxou Lataua

1 ^aIa mose'i noxinge i'oxonu opo se'isisi noxi'a ta menexi'a uasi. Tava'u loxovaa la sou ngingi nga'oto'oto mo nga'oto'otosou anangenge ngatongato'o? Eni akoli aloxo 'o. Masaxa masua ane muxolu no opongengi mo u'oto'oto no anu xavutalamengi laixe ne, anu tava'u 'oto'oto no taiingengi ane. 2 Ngingi ngemasaxau mii vile manina, ia ngano'u uasi. Mo ngingi ngeisuxu ta menexinge mi'ami'a la ngave'a isoisoli, ia umomomo sou ngano'u mii ma'ia ane ngingi ngemasaxau uasi. La sou ngingi nga'otosou anangenge mo nga'oto'oto. Ia ngingi umomomo sou ngano'u uasi, xo ngingi ngalinga ulai noxou Lataua uasi. 3 No mine ngingi ngalinga ulai noxou Lataua, la ngano'u uasi. Xo xavutalamengi sou mii ma'ia ane ngingi ngelingau ne, laixe uasi. Ngingi ngelingau ne sou u'oxongengi nga'osa no anusi.

4 ^bNgingi ta mitema sou ngexiu tumalingeu Lataua! Ngingi ngalavusou mii ane 'o uasi? Anu manina lexe ngingi ngemasaxau 'ili'ilixo masumasua no lia 'o, la ngingi ngamasaxa ngamulinu 'ilixo noxou Lataua uasi. Mo 'ei ane umasaxau 'ili'ilixo no lia 'o, la anu uxali uluau Lataua.

5 Mo ngingi ngaxavutala lexe vaikala noxou Lataua ane 'o ne, mii vitanisi? anu muvikala aloxo 'o, “Lataua muisuxu uleenenge manina ane anu mu'italo noxinge.” 6 ^cIa anu uisuxu uleenengesi uasi. Anu mualaunasinge tatila manina. La sou vaikala noxou muvikala lexe, “Lataua uxiu tumaloui'a ane'i ane i'iti ualasi'a, ia anu ualaunasi'a ane'i ane mitaloxolixa'a.”

7 ^dLa sou eni akaitolongengi pekia'u aloxo 'o. Ngingi ngaxolu no laaxu Lataua mo ngatulu pekia'inge mo sou ngakusa'u Satani, la anu u'ume. 8 ^eMo ngingi ngalivu ngane'e 'alai noxou Lataua, mo sou Anu kalumo une'e 'alai noxinge. Ngingi nga'ui avonge xo ngingi ta mitema sou 'ili'ilixo masumasua. Mo ngaxavutalanu Latauasi, xo ngingi xavutalamengi mukalipala no anu 'ilixo sou lia xe 'ilixo noxou Lataua. 9 La sou laixe lexe opongengi tu'umaxu mo tangengingenge mo ngatama ngaelieli. Mo laixe lexe ngakeke uasi ia ngatama, xe nga'osa uasi ia ngalokungengi. 10 ^fNgingi nga'oxo aloxo ne mo ngataloxolingenge no iou Lataua, la Anu u'itinu ualasinge.

11 Ta vivilo ta mitema noxou Lataua, mamu sou ngalea anangenge noxinge ngatongato'o. Lexe vile noxinge uvikala masua noxou vimou mo utulusou no anu vaivaikala, la anu uvikala masua no anu lapuloto noxou Lataua mo muilevinu. No mine ngingi ngailevinu lapuloto noxou Lataua, la ngingi ngamulinu uasi ia ngeno'u tanixu lapuloto mo ngexolu sou ngailevine'i ta mitema. 12 ^gIa itema vilesisi Anu mulosinge lapuloto mo Anu sou uilevingesi Anu a uxoxolu. Anu umomomo sou upamaulinenge xe ukalusinge. Ia ngingi ne, ngingi 'ei sou ngailevine'i ta menexinge? Uasi.

Mamu sou Nga'itingengi

13 ^hIoxe, ngalomu noxilo. Ngingi ane ngavikala lexe, “Maasi uasi ne'iela, la nenge talai no tuala vile se 'ole, uasi. Talai la taxolu tauu ie vile mo ta'oxonu xaixai sou tano'u lamoli no anu.” 14 ⁱNgingi ngavikala aloxo ne, ia ngingi ngalavusou mii ma'ia ane uxali ne'iela uasi manina. Ia eni atovola'i maulingenge a loxovaa ane? Maulingenge ne aloxo umuumu ane uxalisi ka tasiauxu. 15 Ngingi ngavikala aloxo ne uasi, ia laixe lexe ngavikala aloxo 'o, “Lexe masaxa noxou Tila, la sou nenge taxolu mo ta'oxo'oxonu mimii ma'ia ane nenge temasaxau.” 16 Ngingi ngalavusou ngavikala aloxo ne uasi. Ia ngingi nga'itinu ualasinge lexe ngingi ngamomomo sou ngasaxila'u mimii ukalusi. 'Ilixo ane ne, anu masua. 17 ^jLa sou anu ane mulavusou mii ma'ia ane laixe lexe u'oxonu la u'oxonu. Ia anu mulavusou ia u'oxonu uasi, la anu mususu.