‏ Luke 1

1 ^aEni akaukavu vaivaikala ano 'o ulai noxine, nini tila Teopilo. Tei, la ta mitema tapiena mitovo avo'a sou mikaukavunu a'alo sou mimii ane Lataua mumomomosou muxali no nixi noxixe. 2Ane'i mimulinu vaikala noxi'a ta mitema ane'i e mimaisou mimii ane ne no ie'i no voxo ane mimii ne musoko muxali. Ane'i ta mitema ane ne, mixolu lexe ane'i ta mitema sou xaixai sou vaikala noxou Iesu. La sou ane'i milosixe a'alo sou mimii ane ne. 3Loxo ne, la sou eni kalumo emasaxa lexe akaukavunu a'alo sou mimii ane ne mo asovanu ulai noxine. Eni exaxai maxuveeni musuku sou ekakamulinu mimii mukalusi ne tava'u laixe. Mo vaimomo 'o, eni ekaukavu laixe aloxo nesi, aloxo mimii ane ne muxali. 4Nini naitisou, la sou nalavu laixe lexe vaivaikala ane ane'i milosienixu ne, anu maninasi.

Elisaveti Mivo'onu Ioanesi

5No voxo ane Elodesi muxolu loxo tatananu tuala no xalee lia tila ne Iutaia, la aili'i vile muxoxolu lai ne, ualasou lexe Sakalia. Anu itema vile no anu la'oluxa'a ta Avia. Semau ne, ane Aloni mutu'u ovuxu e ualasie lexe Elisaveti. 6Ilou mixolu milapu no iou Lataua mo milavusou mimulinu vaivaikala noxou Lataua mo lapuloto noxou mukalusi, la isusu no iou uasi. 7Ia, ilou ta 'ili'a uasi, xo Elisaveti imomomosou ipalaa la uasi, mole ilou ta aululu mukalu ne.

8Alaxu vile, la la'oluxa'a noxou Sakalia milai mi'oxonu xaixai noxi'a sou i'elaxa'a ta sipsip no iou Lataua. 9 ^bLa ane'i mi'oxonu vila'i vile mimulinu 'ilixo noxi'a sou misosovosou vile noxi'a sou lexe u'unalai no taasou lalotu tatila noxou Lataua sou u'elaxu mimii ane tuma'u lailaixe. Xe mi'oxo aloxo ne, la misosovosou Sakalia. 10Voxo sou anu u'elaxu mimii ane tuma'u lailaixe muxali, la ta mitema tapiena mipita no ale sou milinga mulai noxou Lataua.

11La sou angelo vile noxou Tila muxali mupala'a noxou Sakalia. Muxali la mutulu no xalee tema no anu valovalo e i'elaxu mimii tuma'u lailaixe no anu. 12Anu mumaisou angelo ne, la mukuluke xe mumama'u. 13Ia angelo muvikalanu aloxo 'o, “Sakalia, na'ume mamu! Lataua mulomusou linga noxine ne. Ili'i, la semameni Elisaveti ivo'onu keakea mulu vile. La nini namoxo'u ualasou lexe Ioanesi. 14Ulai ili'i, la oponeni u'osa'osasou mo ta mitema tapiena kalumo i'osasou no voxo mine ivo'onu. 15 ^cXo anu uxali itema tila vile no iou Lataua. Anu umomomosou uiexu uaini mo lexa pekia'u uasi. Xo no mine anu uxolu noxie nenu opoone sio mo no anu maulixu ukalusi ne, la Uleenu Tavuna u'ana'ana noxou. 16Anu ulivulixa'a ta mitema tavu'alo ne Isilaeli ilivu ilai noxou Tila, anu Lataua noxi'a. 17 ^dAnu uno'u uleenu mo xavi noxou Eliasi sou uuli noxou Tila. Anu upitane'i ta mami'a ilo'a ta 'ili'a sou opone'i upita vilesisi mo uxiune'i ane'i ane ilomuxu vaikala noxou Lataua uasi mo ixali ta mitema sou ilavu no anu vote'i ane mulapusi. Anu ulalaaxine'i ta mitema sou ixomaiou Tila.”

18Sakalia mulomusou vaikala ane ne, la mutali'isou angelo aloxo 'o, “Loxovaa, la sou eni alavu manina lexe nini nevikala ne manina? Xo nexi noxie semaxeni ne, ta aululu manina.”

19 ^eLa angelo mukolinu vaikalau aloxo 'o, “Eni ualasilo lexe Xavulieli. Eni atutulu no talaxu Lataua. La sou Anu mupalusilo ene'e noxine sou avikala no anu a'alo laixe ane ne. 20Ioxe, nini nalomu. Usoko vaimomo 'o mo ulai utalo no voxo ane mii ane eni evikalanenixu 'o uxali manina, la nini anaxene utomu mo navikala uasi. Xo nini namuxaxu taneni no anu vaikala noxilo ane uxali manina no voxo ane Lataua musosovosou ne uasi.”

21Ta mitema mixomaiou Sakalia maxuveeni, la sou ane'i tane'i lili lexe tava'u loxovaa la sou anu muxolu maxuveeni no nano no tani tila noxou Lataua ne. 22Xe ili'i, la anu muuatu no ale, ia umomomo sou uvikalane'i uasi. La sou ane'i milavu lexe anu mumaisou mii vile loxo aipiepiena no nano no taasou lalotu tatila noxou Lataua. Anu mutovotovola'i no avolusi, ia uvikala uasi.

23Xe ili'i no mine voxo sou xaixai noxou mukalu, la mulivu mulai no tani. 24Ioxe, ili'i la semau Elisaveti opoone. La ane mixolixu no nano no tani mumomomo loxo so'io ta'uve. 25La mivikala lexe, “Tila tanuxo, la sou mu'oxonu mii ano 'o muxali noxilo sou ukalusou maela noxilo no ie'i ta mitema.”

Vaikala Lamana sou Xali Noxou Iesu

26So'io ta'uve mukalu xe muxatele vile sou muxali, la Lataua mupalusou angelo vile ualasou lexe Xavulieli muxali mune'e no tuala vile ne Naseleti no xalee lia tila ne Xalilaia. 27 ^fAnu muxali noxie sema vile vuanga misosovosie lexe i'uluxu itema vile ualasou lexe Iosepu, anu Deviti 'ilusunu vile. Sema ne, ualasie lexe Malia. 28Ioxe, angelo muxali noxie, la muvikala aloxo 'o, “Opoo se'isisi uxolu noxine. Lataua uxolu noxine mo ualusine.”

29Ia Malia milomusou vaikala ane ne, la tane lili no anu, la mixavutala lexe vaikala ano 'o laaxu a loxovaa? 30 ^gLa anu muvikalane aloxo 'o, “Na'ume uasi. Lataua tanuxene nini Malia. Nalomu, ulai ili'i la nini oponeni la navo'onu 'iline vile mulu. La namoxo'u ualasou lexe Iesu. 32 ^hUlai, la anu uxali tila mo ane'i ilemolu lexe Lataua teitexi manina 'Olu. La Lataua Tila usosovosou Iesu sou uno'u tanixu 'ilusunu Deviti. 33Anu sou usaxila'a Iakovo ta xaixasou ilo'a ta 'ilu'ilusunu utotomu mo saxisaxila'u noxou ne umomomo sou ukalu uasi.”

34Ia Malia mivikalanu angelo aloxo 'o, “Mii ane 'o uxali a loxovaa? Xo eni vuanga sio.”

35Angelo mukoline aloxo 'o, “Ulai, la Uleenu Tavuna uxolu noxine, la sou Lataua teitexi manina xaviinu uvausine. Aloxo ne, la sou nini navo'onu 'iline ne. La imoxo'u lexe itema vile malemalenge noxou Lataua mo Anu Lataua 'Olu. 36Namaisie tulaneni Elisaveti. Ane aululu mukalu, ia ane 'a opoone sou ivo'onu 'ilie mulu. Tei, la ane sema sou ipalaa uasi, ia so'ioxe sou opoone a muxatele vile sou. 37 ⁱMii vile pekia'u sou Lataua u'oxonu uasi.”

38Malia mivikalanu aloxo 'o, “Mii ane nini nelemolu ne, uxali noxilosi aloxo ne. Xo eni asema sou xaixai noxou Tilasi.” Angelo muvikalane aloxo ne mukalu, la mu'umesie sou mulai.

Malia Mixixaosie Elisaveti

39No voxo ane ne, la Malia miavuti sou mipalea minuna no xalee lia tila ne Iutaia, la sou mitelo no tuala vile muxolu no laxa'ilu vile. 40Mixali la mi'unalai no tani noxou Sakalia sou misexelaxe Elisaveti. 41No mine Elisaveti milomusou vaikala sou sexela noxie Malia, la keakea no nano no opoone ne, musuxulae. Xe Uleenu Tavuna mu'ana'ana noxie Elisaveti. 42La ane mi'ava tatila aloxo 'o, “Lataua mualusine laixe manina no taiine'i ta sema tavu'alo, mo mualusou 'iline e muxolu no oponeni ne kalumo. 43Eni asema ma'i, la sou Tila noxilo nenu mine'e noxilo 'o? 44Eni elomusou sexela noxine, la alaxu vilesisi 'o, la keakea muxolu no opoleli 'o, musuxulae sou mu'osa. 45Lataua ualusie ane ane mimulaxu tane no anu vaikala noxou lexe mimii e mulemolu ne, anu u'oxonu maninasou.”

Lexeie Malia

46 ^jXe Malia miavuti, la milexe aloxo 'o,

“Eni taleli u'itinu Tila ualasou,
47mo eni uleeleli kalumo u'osasou Lataua,
Anu itema sou pamauli noxilo.
48Xo Anu muxavutalaleli eni asema sou xaixai noxou vitanisi,
la sou ulai ili'i, la ta mitema tavu'alo ilemelo lexe Lataua mualusilo.
49Xo itema sou xavi mu'oxonu mimii tatila manina mune'e noxilo.
Anusi anu Lataua malemalenga manina mo anu loxo itema uasi.

50 ^kAnu ualaunaxa'a ane'i ane itoxonu utotomu mo kaluxu uasi.
51 ^lAnu mu'oxonu xaixai xaviinu no avolu,
mo mukusai'a ane'i ane me'a i'itinu ualasi'a no anu xavutalai'asi.
52 ^mAnu mulu'elainixi'a ta motu sou isaxila'a ta mitema
mo muxexene'i no puloulousi'a,
ia mutelailixa'a ane'i ta mitema vitanisi la mitelai mino'u tanixa'a.
53 ⁿAnu mu'ana'analixa'a ane'i ane misolixa'a no anu la'ilali laixe,
ia mukusai'a ane'i ane lavulutii'a tavu'alo ne, milai viatanisi.
54 ^oAnu musu'uline'i ta mitema sou xaixai noxou, ta Isilaeli.
Anu muxavutalane'i mo tanuxa'a.
55 ^pAloxo Anu muxavutalanu vaikala e Anu mulemolu noxou Avalaamu
ilo'a ta xaixasou mo ta 'ilu'ilusunu xe ta xaixasi'a ta maminge ilo'a ta 'ilu'ilusune'i ta maminge.”
56Malia ilee Elisaveti mixoxolu mumomomo loxo so'io tatalu, xe ili'i la ane milivu milai no tualasie.

Elisaveti Mivo'onu Ioanesi

57Voxo sou Elisaveti ivo'o muxali, la mivo'o 'ilie mulu vile. 58Xe ta tema tualasie ilo'a ta minemine milomusie xo mimaisie lexe Tila tanuxe musuku, la ane'i ilo'a mi'osa.

59 ^qXe mivo'o mo voxo muxatele tatalu sou, la ane'i mine'e mipita sou xooxoo mungaasou xe sou lexe imoxou ualasou sou momu Sakalia. 60Ia nenu mivikala aloxo 'o, “Uasi! Tamoxou ualasou lexe Ioanesi.”

61Ia ane'i mivikalane aloxo 'o, “Ta minemineni vile ualasou loxo ne uasi.” 62La sou ane'i milosi no avo'a mulai noxou momu lexe umoxo'u 'olu ualasou a loxovaa? 63Anu mutovola'i sou lexe ino'u ovu alelaxu sou ukaukavu no anu. Xe milosou mukalu, la anu mukaukavu no anu aloxo 'o, “Ngamoxo'u ualasou lexe Ioanesi.” Ane'i mimaisou uala ane ne, la mikuluke manina. 64Alaxu vilesisi 'o, la Sakalia anaxu e mutomu ne, utomu la ua. Anu umomomo sou uvikala la. La sou muvikala sou mu'itinu Lataua ualasou. 65Xe ta tema tualasou mimaisou aloxo ne, la mimama'u misevile. La sou a'alosou mimii latala e muxali ne, mulutu la mulai no tuatuala e no anu laxalaxa'ilu sie Iutaia. 66Ta mitema latala milomusou a'alo ane ne, la ane'i tane'i lili no anu. La sou mivikala lexe ili'i, la anu keakea ne uxali itema a loxovaa? Xo milavu lexe xavi noxou Tila a muxolu noxou ne.

Lexeu Sakalia

67Ioxe, Uleenu Tavuna mu'ana'ana noxou Ioanesi momu e Sakalia ne, la sou anu muvikala mupalomatana aloxo 'o,

68 ^r “Nenge ta'itinu Tila ualasou, anu Lataua noxinge nenge ta Isilaeli,
xo Anu mune'e sou mulivulixa'a ta mitema noxou.
69 ^sNo nano no taiine'i ta xaixasou ilo'a ta 'ilu'ilusunu,
Deviti e itema sou xaixai noxou.
la Anu muxalixu itema vile xaviinu sou upamaulinenge.
70Aloxo, tatei la Anu mulemo noxi'a ta mitema sou palomatana noxou e
Anu musosovosi'a.
71 ^tAnu upamaulinenge no avo'a ta uluamenge
mo no avo'a ta mitema ukalusi ane imasaxainge uasi.
72 ^uAnu tanuxa'a ta xaixasinge ilo'a ta 'ilu'ilusunenge,
mo muxavutalanu vaikala noxou e Anu musakiinu tatei,
73 ^vnoxou Avalaamu, Anu 'ilusunenge.
74Sou lexe Anu upamaulinenge no avo'a ta uluamenge
mo sou lexe nenge tamama'u mo ta'ume uasi,
75 ^wia nenge taxaxai noxou, la nenge taxolu va'axu no anu 'ili'ilixo masumasua
mo tamulinu 'ilixo ane mulapu no voxovoxo utotomu.
76 ^xMo nini 'alixeni 'o, ulai ili'i la imoxoine lexe nini itema sou palomatana noxou Lataua teitexi manina.
Xo nini naulaxunu Tila sou namomosou vote'isou,
77 ^ymo sou ta mitema noxou ilavusou lexe
Anu uxiu tumalou 'ili'ilixo masumasua noxi'a mo upamauline'i
78 ^zxo Anu tanuxa'a musuku. Mo no anu alauna noxou,
la Anu usovanu lamana sou tuala teitexi une'e noxinge,
79sou ukaasi'a ta mitema ane'i e mixolu no isivoxo
mo mimuamua'i no vote'i ane masua sou soli uxalisi'a no anu,
mo sou upamuxanenge no anu vote'i sou opo se'isisi.”
80Ili'i, xe molomolo ne muxali tila, la uleenu tavuna mu'ana'ana noxou. La mulai muxolu no xalee lia vitanisi, mutalo no voxo sou anu mupala'a no ie'i ta Isilaeli.