‏ Luke 11

'Ilixo sou Talinga Ulai Noxou Lataua

(Mat 6:9-13, 7:7-11)

1No voxo vile, la Iesu mulai no tuala vile sou mulinga mulai noxou Lataua. Mulinga mukalu, la vile noxi'a ta molomolo noxou muvikalanu aloxo 'o, “Tilasixe, nexi temasaxa lexe nini nalosiexixu 'ilixo sou talinga ulai noxou Lataua loxo Ioanesi mulosieixa'a ta molomolo noxou.”

2La sou Iesu muvikalane'i aloxo 'o, “No mine ngingi ngalinga ulai noxou Lataua, la ngingi ngavikala aloxo 'o,

‘Mamixe, nexi ta'itinu ualasine
mo talinga lexe saxisaxila'u noxine une'e.
3Naitinexe la'ilali sou voxovoxo ukalusi.
4Mo naxiu tumalineu 'ili'ilixo masumasua noxixe,
xo nexi kalumo taxiu tumalixeu 'ili'ilixo masumasua noxi'a
ane'i ane latala e i'oxonu 'ili'ilixo masumasua une'e noxixe.
Mo mamu sou nini naolenexi no anu tovotovo.’”
5Iesu muvikalane'i la aloxo 'o, “Lexe itema vile no taiingengei ne, menexu vile a uxoxolu. Ia no 'olovoxo lixinu manina, la mulai noxou menexu sou mulinga aloxo 'o, ‘Menexilo, eni emasaxau veleti tatalu. 6Xo tulaleli vile mumuamua'i xoo mole anu a mune'e muxali noxilo, ia eni xenixo la'ilali sou alosou uasi.’

7Ia lexe menexu ane uxoxolu no nano no tani ne, ukolinu vaikalau aloxo 'o, ‘Namolo'inasilo uasi. Xo nexi tetatu mo tesilikoo aitenga mukalu, mo nexi noxi'a ta 'alixe teai no luu mukalu. La sou eni amomomo sou atulu mo alosine mii vile uasi.’ 8Anu mulavusi lexe anu menexu vile, ia utulu mo ulosou mii vile uasi. Ia eni avikalangengi lexe anu ulinga pekia'u sio ulai noxou, la anu uavuti ka ulosou mii ma'ia ane anu ulingau.

9La sou eni avikalangengi aloxo 'o. Ngalinga ulai noxou Lataua, la Anu ulosinge. Mo ngakakamuli mii, la sou ngaxalisou. Xe ngapolopolo no aitenga, la Lataua ukisiinu aitenga. 10Xo itema ane ulingau mii vile, la anu uno'u. Mo itema ane ukakamuli mii vile, la anu uxalisou. Xe itema ane upolopolo no aitenga, la aitenga ukisi noxou.

11Loxovaa? Ngingi e ta 'ilinge, io ilingau sinana vile noxinge ngingi ta mami'a, la ngingi ngalosi'a sinana veveeni? Uasi. 12Mo lexe ta 'ilinge ilingau atolu vile noxinge, la ngalosi'a tanga vile? Uasi. 13Xo ngingi ne ta masua, ia ngelavusou ngalosi'a ta 'ilinge mimii lailaixesi. Ia Maminge lailaixe e uxolu no opo loxotolo ne, u'oxo aloxo ne, ia Anu muliuli manina sou ulosi'a ta mitema e ilingau Uleenu Tavuna noxou!”

Iesu Xe Velesevulu

(Mat 12:22-30; Mak 3:20-27)

14Ili'i, la Iesu ukukusau uleenu vile masua sou u'oxo ta mitema anaxa'a utomu ne muxolu noxou itema vile. Xe Anu mukusau mukalu, la itema ane anaxu mutomu ne, anaxu papaxe sou uvivikala. La ta mitema mimaisou aloxo ne, la mikuluke. 15 ^aIa mose'i noxi'a ta mitema ne, mivikala aloxo 'o Anu ukukusai'a ta ulee ta masumasua ne no anu xavi noxou Velesevulu e anu tila noxi'a ta ulee ta masumasua. 16 ^bXe mose'i mitovonu sou lexe u'oxonu sosovo vile no opo loxotolo sou umaxa'u lexe Anu uxaxai no anu xavi noxou Lataua.

17Iesu mulavusou xavutalai'a aloxo ne, la sou muvikalane'i aloxo 'o, “Tuala vile ta mitema sou ikalikalipalane'i sou i'oto'oto ngatongato'o noxi'a, la tuala ane ne, ta moosou ipaxele mo tuala ne usivu. Mo lexe ta temanu tani vile kalumo ne, ikalipalane'i ngatongato'o sou i'oto'oto noxi'a, la ta temanu tani ane ne ipaxele sou tani ne. 18Mo lexe Satani ilo'a ta mitemau ikalipalane'i ngatongato'o sou i'oto'oto noxi'a, la ane'i xavine'i sou itulu uasi. Eni avikalangengi aloxo ne, xo ngingi ngevikala lexe eni akukusai'a ta ulee ta masumasua no anu xavi noxou Velesevulu. 19Ioxe, lexe eni akukusai'a ta ulee ta masumasua no anu xavi noxou Velesevulu, la sou no anu xavi noxou 'ena'ei ane ta mitemamengi ikukusai'a no anu ne? Xavi ane ta mitemamengi ixaxai no anu ne, uvikalangengi lexe vaikalamengi ne ulapu uasi. 20Ia lexe eni akukusai'a ta ulee ta masumasua no anu xavi no avolu Lataua, la ngingi ngelavusou lexe saxisaxila'u noxou Lataua ne a mune'e noxinge 'o.

21La sou lexe itema vile xaviinu muno'u miumiu latala sou 'oto'oto, sou usaxila'u taasou, la evile uno'u miumiu uasi, uai laixesi. 22 ^cIa lexe itema vile anu xaviinu muuaulixu xavi noxou itema ane ne, une'e u'alivulanu mo ua'ulixu, la u'umenu misomisou 'oto'oto noxou e anu usosoa no anu xe mimii sou uvelunu noxi'a ta menexu.

23 ^dIo, itema ane uxolu noxilo uasi, la anu u'apixo, xe itema ane nexi noxou tapita uasi, la anu umolo vila'isilo.

24Xe no mine ulee vile masua muxolu noxou itema vile, ia ulaa la anu uxixaoxao no tani e lexa no anu uasi sou ukakamulinu tani e anu uma'ila no anu. Xe uxalisou uasi, la uvikala lexe, ‘Eni alivu no tani eni exolu no anu tei.’ 25Anu mulivu mune'e no tani ane ne, la mumaisou lexe ane'i misilapa tani laixe mo mita'olunu mimii sou tani no tanitanixu laixe. 26Ioxe, mumaisou aloxo ne, la mulai sou mu'avali'a ta ulee ta masumasua muxatele tamei e ane'i mimasua manina noxou. Mukalu, la sou ane'i ilo'a ilai i'unalai no tani ne mo ixolu avile ane. La sou xoluxoluxu itema ane ne, uxali masua no 'a xoluxoluxu ane tei.”

27 ^eIesu uao Anu uvivikala sio, io sema vile no taiine'i ne mi'ava mulai noxou aloxo 'o, “Lataua ualusie nenine e mivo'oneni mo misusuneni.”

28La Anu muvikalane aloxo 'o, “Uasi, ia Lataua ualusi'a ane'i ane ilomusou vaikala noxou mo imulinu.”

Sosovo Noxou Iona

(Mat 12:38-42; Mak 8:12)

29 ^fTa mitema laoluxa'a musuku ixali ipita noxou Iesu sio, la Anu muvikalane'i aloxo 'o, “Ta mitema vaimomo 'o, ane'i ta mitema ta masumasua. Xo ane'i imasaxa lexe imaisou sosovo vile silo lexe Lataua mupalusilo a ene'e 'o. Ia umomomo sou ane'i imaisou sosovo vile uasi. Sosovo vilesisi anu a noxou Iona nesi. 30Xo aloxo Iona ne, anu sosovo noxi'a ta Ninive, la Itema 'Olu kalumo ne Anu sosovo noxi'a ta mitema vaimomo 'o. 31 ^gNo voxo ane sou Lataua utulusi'a ta mitema no anu vaivaikala, la sema vile ane tatananu tuala ne Seva ilo'a ta mitema ane vaimomo 'o, itulu. La ane itelo vaikala noxi'a ta mitema sou vaimomo 'o. Xo ane mele no lia pa'umolu nopaxa, ia milutu mine'e sou milomu no anu vaikala sou xavutala laixe noxou Solomoni. Ia vaimomo 'o ne, itema vile Anu mutila noxou Solomoni a ututulu 'o. 32 ^hXe no voxo ane ne, la ta mitema sie Ninive kalumo iavuti itulu sou itelo vaikala noxi'a ta mitema sou vaimomo 'o. Xo ane'i milomusou Iona mua'alo mulai noxi'a, la ane'i mixiu opone'i. Ia vaimomo 'o ne, itema vile Anu mutila noxou Iona a ututulu 'o.”

Ienge Anu Telu sou Vasimenge

(Mat 5:15, 6:22-23)

33 ⁱIesu musolonu vaikala noxou aloxo 'o la, “Itema vile u'elaxu telu, ka utalumeu no nano no kaveutu kitu'a uasi, mo utulu pupunisou uasi. Ia utulusou teitexi no valovalo, mo sou ta mitema ane i'una no tani ne, la imaisou lamana ane ne. 34Ngingi iengi ne, anu telu sou vasimenge. Xo lexe iengi ne laixe, la anu ulosinge lamana. Ia lexe iengi ne masua, la anu ulosinge isivoxosi. 35La sou ngasaxila'inge laixe, mo sou lamana no nano no tangengi ne, uxali isivoxo mamu. 36Aloxo ne, la sou lexe iengi laixe xe ulosinge lamana, io pa'usou isivoxo uasi, la anu lamana usavelesi loxo telu ukaasinge.”

Iesu Mukaitolone'i ta Palisaio Ilo'a ta Mitema sou Lapuloto

(Mat 23:1-36; Mak 12:38-40; Luk 20:45-47)

37Iesu muvikalane'i ta mitema ne aloxo ne mukalu, la Palisaio vile mu'avalou sou lexe ilou ilai no taasou sou i'ani. La sou Iesu mulai mu'unalai no taasou, la muxolu no luusou la'ilali sou lexe u'ani. 38Ia Palisaio ne, mumaisou Iesu mine u'uinu avolu tei ka u'ani uasi, la mukuluke.

39Tila mumaisou aloxo ne, la sou muvikalanu aloxo 'o, “Manina lexe ngingi ta Palisaio nga'uinu paku ilou latotope, la nga'uinu no alesi. Ia no nano no anu paku ilou latotope ne, 'ili'ilixo sou isuisu mo 'ili'ilixo sou xavutala masumasua a mu'ana'ana no nano no anu ne. 40Ngingi ta mitema sou xovulaulau! Anu manina lexe itema ane u'oxonu mimii vasimolu no ale, la anu u'oxonu no nano kalumo. 41Ia ngalosi'a mimii ane uai no nano no paku ilou latotope ne ulai noxi'a ta mitema ane xa'a la'ilali uasi. Nga'oxo aloxo ne, la sou mingemingenge latala ne, uxali malemalenga.

42Ngingi ta Palisaio ne, ili'i la Lataua ulosinge navunavu. Xo kamakamakala latala e tuma'u lailaixe ukalusi no xaingenge ne, ngingi ngelavusou sou ngakalipalanu la ngalivunoxu mavulovexasou ulai noxou Lataua. Ia ngingi ngexolu va'axu no anu 'ili'ilixo lailaixe ane Lataua mumasaxau ulai noxi'a ta menexinge mo ngexolu va'axu no anu 'ilixo sou ngamasaxau Lataua. Ia emasaxa manina lexe ngingi nga'oxonu 'ili'ilixo ane ne, mo sou tangengi vulusiou lapuloto sou ngalosou mavulovexasou mimii ulai noxou Lataua uasi.

43Mo ngingi ta Palisaio ne, ili'i la Lataua ulosinge navunavu. Xo ngingi ngamasaxa lexe ngaxolu no puloulou ane lailaixesi uuli no nano no taasou lalotu noxi'a ta Iutaia, mo ngamasaxa lexe ta mitema ixalisinge no tilovolovo la itoxongengi xe isexelangenge.

44Mo ngingi ta Palisaio ne, ili'i la Lataua ulosinge navunavu. Xo ngingi loxo lousi'a ta mitema e mutalume, la ta mitema imaisou uasi la imuamua'i teitexi no anu.”

45Ioxe, itema vile noxi'a ta mitema ane milavusou lapuloto noxou Mosesi manina mulomu aloxo ne, la mukolinu Iesu aloxo 'o, “Itema sou ulosixe lavulavu, nini nevikalasi'a ta Palisaio aloxo ne, la nini netaloxolinexe kalumo.”

46La Iesu muvikalanu aloxo 'o, “Ngingi ta mitema ane ngelavusou lapuloto noxou Mosesi manina kalumo ne, ili'i la Lataua ulosinge navunavu. Xo ngingi ngalosi'a ta mitema tavala ane ane'i imomomo sou itavule ilutunoxu uasi. Ia ngingi ngamasaxa sou ngasu'uline'i mo ngakasi vaxa no anu tavala ne sevile uasi.

47Mo ngingi ne, ili'i la Lataua ulosinge navunavu. Xo ngingi ngapaipounu lousi'a ta mitema sou palomatana e ta xaixasinge ilo'a ta 'ilu'ilusungengi mive'a tatei. 48No anu 'ilixo ane ne, la ngingi ngevikala manina xe ngemaxa'inge kalumo lexe ta xaixasinge ilo'a ta 'ilu'ilusungengi mive'a ta mitema sou palomatana ane ngingi ngapapaipounu lousi'a ne. 49La sou Lataua mulemolu no anu xavutala laixe noxou aloxo 'o, ‘Eni apalusi'a ta mitema sou palomatana ilo'a ta mitema sou xaixaixeni ilai noxi'a ta mitema, la mose'i noxi'a ne ane'i ive'a xe mose'i noxi'a ne ane'i i'oxo masuane'i.’ 50La sou Lataua ulosi'a ta mitema ane'i ane vaimomo 'o navunavu, xo ane'i mive'a ta mitema sou palomatana mukalusi musoko no anu voxo ane Lataua mukoinu loxotolo ilou lia mo mune'e mutalo vaimomo 'o. 51Musoko sou mive'a ta mitema sou palomatana ne, musoko noxou Aveli mune'e muxali noxou Sakalia. Ane'i mivau Sakalia no nixi no anu valovalo sou i'elaxa'a ta sipsip no anu xe tani tila noxou Lataua. Ani manina, Lataua ulosi'a ta mitema sou vaimomo 'o navunavu.

52Ngingi ta mitema ane ngelavu manina no anu lapuloto noxou Mosesi, ili'i la Lataua ulosinge navunavu. Xo ngingi ngalavusou sou ngataluxu vote'i sou lavulavu noxou Lataua, la ta mitema ilavusou uasi. Mo ngingi kalumo ne, ngalavu no anu uasi, mo ngingi nge'apixa'a ta mitema ane imasaxa lexe ino'u lavulavu ane ne.”

53Iesu muvikala mukalu, xe mulaa muuatu. La ta mitema sou lapuloto ilo'a ta Palisaio la'iaxa'au manina, la sou misoko sou mitalitali'isou, 54sou lexe Anu ususu no anu tali'i noxi'a vile, la sou ane'i itetelisou.