Luke 12
Iesu Mupela'a ta Molomolo Noxou
(Mat 10:26-33)
1No mine Iesu uvivikalane'i aloxo ne, la ta mitema tavu'alo mine'e mipita noxou la tani mutomu manina mo tanixa'a uasi. La sou ane'i mimalomaloxou tava'a ngatongato'o. La Iesu muavuti sou mupela'a ta molomolo noxou aloxo 'o, “Ngingi ngasaxila'inge laixe no anu 'ilixo sou kalavoi noxi'a ta Palisaio, xo 'ilixo noxi'a ne uvasainge. 2 aMii ma'ia ane mivausou ne, ulai ili'i la upala'a no taatexa. Xe mii ma'ia ane mutalume ne, ulai ili'i la ane'i ilavusou. 3La sou mii ma'ia ane ngingi ngalemolu no isivoxo ne, ulai la ta mitema ilomusou no aso. Xe mii ma'ia ane ngingi ngamunumunusou no nano no tani tanu ne, ulai la ta mitema itulu teitexi no tani laxa'u sou ia'aloxu.4Ta menexilo, eni avikalangengi aloxo 'o. Mamu sou nga'ume'a ane'i ane ivau vasimenge mo usoli, ia ili'i la imomomo sou i'oxonu mii vile la noxinge uasisi. 5Ia eni alosiengixu 'ena'ei ane ngingi nga'umolu. Nga'umolu itema ane Anu xaviinu sou uvau vasimenge usoli mo uleanu uleengengi ulai no taxa sou navunavu. Eni avikalangengi lexe nga'umolu itema ane ne. 6Ngingi ngelavusou lexe ta mitema ilavusou ilotone'i ta ngiala ta kitukitu'a ta'uve no anu Asarioni ▼ tamei. Ia Lataua iou si'isi'a ta ngiala ta kitukitu'a ane ne uasi. 7 cXe kalumo Lataua mulavusou sou uitisou kisinge laxusou. La sou ngingi nga'ume mamu. Xo ngingi ne, ngatiatila noxi'a ta ngiala ta kitukitu'a moso ne.
8La sou eni avikalangengi aloxo 'o. 'Ena'ei ane uvikala lexe anu ulavusilo no ie'i ta mitema, la Itema 'Olu kalumo uvikala lexe Anu ulavusou no ie'i ta angelo noxou Lataua. 9Ia, 'ena'ei ane uvikala lexe anu ulavusilo uasi no ie'i ta mitema, la Itema 'Olu kalumo uvikala lexe Anu ulavusou no ie'i ta angelo noxou Lataua uasi. 10Xe 'ena'ei ane uvikala masua ulai noxou Itema 'Olu, la Lataua uxiu tumalouu vaikala masua noxou ne. Ia 'ena'ei ane uvikala masua ulai noxou Uleenu Tavuna, la umomomo sou Lataua uxiu tumalouu vaikala masua noxou ne uasi.
11 dXe lexe ta mitema ilailingenge no taasou lalotu noxi'a ta Iutaia, xe itulusinge no ie'i ta mitema sou isaxila'u tuatuala, la ngaxavutala piena sou nga'oxo latolosinge a loxovaa mo mii ma'ia ane ngingi ngalemo ulai noxi'a mamu. 12Xo no mine ngingi ngatulu sou ngavikala ulai noxi'a, la Uleenu Tavuna molu ulosiengixu vaikala ma'ia ane ngingi ngalemolu noxi'a ne.”
Vaikala Tovola'i sou Itema Vile Iou Lavuluti Tapiena Muxovulaulau
13Xe vile noxi'a ta mitema tavu'alo ne, muavuti la muvikalanu Iesu aloxo 'o, “Itema sou ulosixe lavulavu. Mamixe a musoli ne, ia eni emasaxa lexe navikala vivilo mo uvelu mimii e mamixe musolisou ne mo ulosilo mose'i.”14Ia Iesu mukolinu aloxo 'o, “Ae, 'ena'ei musosovosilo sou axali itema vile sou atulu no 'a vaikala sou no nixi noxinge nongou vivine ne?” 15 eLa Anu Iesu muvikalane'i aloxo 'o, “Ngasaxila'inge laixe! Xo loxo 'o io, iengi uisuisuxu mimii iouiou. Xo maulinenge a uxolu no anu mimemimengi ne uasi.”
16La Anu muvikala tovola'i vile noxi'a aloxo 'o, “Itema vile sou lavuluti ne, xaixu munene'a mu'oki. 17La anu muxavutala aloxo 'o, ‘Eni a'oxo a loxovaa? Xo eni silo tani vile umomomo sou apitanu la'ilalixo no anu uasi.’
18La muvikala aloxo 'o, ‘Mane, eni a'oxo aloxo 'o. Eni amamulonu tani kitukitu'a sou la'ilalixo mo atulusou apitanu tani ta tatilasi sou la'ilalixo xe lavulutixeni. 19Mo sou eni melo taleli uvikalaleli aloxo 'o, “Eni ne, mixomixo tavu'alo misevile manina. Umomomo sou uai no anu tauu ie tavu'alo. La sou eni ama'ila laixe mo a'ani mo aie mo axolu a'osa'osasi.” ’
20Ia Lataua muvikalanu aloxo 'o, ‘Kisine muxovulaulau manina! Vaimomo no 'olovoxo 'o si, la nini nasoli avile. La mixemixene ane nelalaxii muai no tani ne, 'ena'ei uno'u ne?’
21 f'Ilixo ane loxo ne, uxali noxi'a ta mitema ane ipitanu mimii sou no lia 'o. Ia no iou Lataua, la ane'i ta mitema vitanisi mo i'a lavuluti uasi.”
Ngaxavutala Piena Mamu
(Mat 6:25-34)
22Iesu muvikalane'i ta mitema mukalu, la sou muvikalane'i ta molomolo noxou aloxo 'o, “Aloxo ne, la sou ngaxavutala piena no anu maulingenge mamu. Mo mamu sou ngavikala lexe, ‘Nenge ta'ou mii ma'ia xe tasakii mii ma'ia sou vasimenge?’ 23Xo maulinenge ne, anu mutila no anu la'ilali xe vasimenge ne anu mutila no anu tokolomo. 24Loxo ngaxavutalane'i ta 'ola. Ane'i ilavusou itotou no xai mo imolo la'ilali uasi. Kalumo ane'i si'a tani sou ipitanu la'ilalixa'a no anu uasi. Ia Lataua molu ulosi'a la'ilali. Io, ngingi ne, loxo ta ngiala uasi. Ngingi ngatatila manina musuku noxi'a mo ngauaulixa'a! 25Ia lexe vile no nixi noxinge ne uxavutala piena sou maulixu uxolu maxuvee sevile, la anu umomomo sou molu usukunu maulixu ulai sevile la? Uasi manina. 26Lexe ngingi ngamomomo sou nga'oxonu mii se ane kitu'a ne uasi, la tava'u loxovaa la sou ngaxavutala piena no anu mimii ukalusi la?27Ngaxavutala lexe kungalo seseenu ne uleme a loxovaa? Anu uxaxaisou u'oxonu tokolomou uasi. Ia avikalangengi lexe Solomoni ne muno'u mimii lailaixe no lia 'o mukalusi, ia kungalo seseenu muuaulixu tokolomoxu ne. 28Ia lexe Lataua utokolomo sese seseenu ane uleme vaimomo 'o xe ne'iela la ta mitema ixotosou sou i'elaxu, la anu utokolomongengi laixe manina musuku uuaulixu sese seseenu ne. Ae, ngingi ta mitema ane ngeuaulixu ne, ngemulaxu tangengi noxou Lataua ne kitu'asi. 29Aloxo ne, la sou mamu sou ngingi ngaxavutala piena no anu mii ma'ia sou nga'ou mo ngaiexu. 30Xo ta mitema ane ilavusou Lataua uasi no lia 'o ne, ane'i ixavutala piena sou ikakamulinu mimii ane ne. Ia Maminge mulavusou lexe mimii ane ne, anu laixe sou ngingi ngano'u. 31La sou laixe lexe ngingi ngakamulinu saxisaxila'u noxou Lataua tei, la sou Anu ulosinge mimii ane ne.
32Ngingi moosou e loxo ta sipsip la'oluxa'a sevile kitu'a ne, nga'ume mamu. Xo Maminge mu'osa lexe Anu ulosinge sou ngasaxila'u tuala ane anu usaxila'u. 33 gLa sou ngingi ngalosi'a ta mitema lavulutimengi sou ilotonu. Xe ngano'u lamolisou, la ngalosi'a ta mitema ane'i i'a lamoli uasi. Io ngano'u tiva sou lamoli ane ulavusou ukakaa uasi sou ngataa mimii lailaixe no anu, mo ngamulaxu teitexi no opo loxotolo e mimii ukukasou uasi. Xo no tuala ane ne, la ta mitema sou pakali ilai 'alai no anu uasi mo ta totoxae ixotosou uasi. 34Xo no tuala ane mimii lalaixe noxinge uai no anu ne, la tangengi a uxolu lai ne kalumo.”
Ngaxolu sou Ngautiti
(Mat 24:45-51)
35 hIesu muvikalanu la aloxo 'o, “Ngasakiinu malomengi ataxu mo ngautupokoxu sou ngalalaxii sou xaixai mo nga'elaxu telusinge ukaakaa loxo ta mitema ane ixomaiou tila noxi'a molu no anu la'ilali tila sou taula'i mine ulivu une'e. No voxo ane anu une'e xe upolopolo no aitenga, la ane'i ikisiinu aitenga noxou alaxu vilesisi. 37Anu laixe lexe tila noxi'a une'e la uxalisi'a ta mitema sou xaixai noxou mine ane'i ixoxomaiou. Eni avikalangengi manina musuku. Anu molu usakiinu maloxu ataxu mo utupokoxu ka uvikalane'i lexe ixolu no anu luu sou la'ilali mo Anu molu ulosi'a la'ilali. 38Mo anu laixe lexe tila noxi'a une'e, la uxalisi'a ta mitema sou xaixai noxou no 'olovoxo lixinu, uasi la no maxasesela mine ane'i ixoxomaiou. 39 iIa ngalavusou aloxo 'o. Lexe moosou tani ulavusou voxo ngiou ane itema sou pakali une'e no anu, la anu umomomo sou upelemasaxanu itema sou pakali ne u'una no taasou uasi. 40Aloxo ne, la sou ngingi kalumo ngaxolu sou ngautitisi, xo Itema 'Olu une'e no anu voxo ngiou ane ngingi ngaxavutala lexe Anu une'e uasi.”41Pita mulomu aloxo ne, la mutali'isou Iesu aloxo 'o, “Tilasixe, nini nevikala tovola'i une'e noxixesi, uasi ulai noxi'a ta mitema ukalusi kalumo?”
42Tila mukolinu aloxo 'o, “Ioxe, moosou tani mu'italone'i ta mitema sou xaixai noxou no avolu itema vile noxou sou usaxila'a. Ia anu itema ne, anu uvikala lexe u'oxonu mii vile, la anu u'oxonu manina mo u'oxonu laixe ukalusi. Anu ulosi'a ta mitema sou xaixai la'ilalixa'a no aso iou e moosou tani musosovosou, la 'ena'ei ane itema laixe sou u'oxonu xaxai ane loxo ne? 43Anu laixe lexe moosou tani ulivu une'e, la uxalisou itema sou xaixai noxou ne u'oxo xaixai aloxo ne. 44 jEni avikalangengi manina musuku lexe moosou tani ne, anu u'italonu mimii noxou ukalusi no avolu sou anu usaxila'u. 45Ia lexe itema sou xaixai noxou moosou tani ne, uxavutala lexe, ‘Tila noxilo ne ulivu palea uasi.’ La sou anu uavuti sou uve'a ta mulu mo ta sema sou xaixai noxou moosou tani xe u'ani'ani mo uie xoo mole u'oxovulaulau. 46Xe tila noxou itema sou xaixai ne, ulivu une'e no anu voxo e anu uxavutala lexe anu une'e no anu uasi mo no voxo ngiou ane ulavusou uasi, la anu ulosou navunavu tatila misevile mo uxexee ulai upita noxi'a ta mitema ane ilavusou Lataua uasi.
47 kItema sou xaixai noxou tila vile ane anu mulavusou masaxa noxou tila noxou, ia ulalaxi mo u'oxonu mii ane tila noxou mumasaxau ne uasi, la upuapuasou alaxu tavu'alo manina. 48Ia 'ena'ei ane ulavusou masaxa noxou tila uasi, ia ususunoxu xaixai e umomomo sou tila noxou upuapuasouxu, la anu upuapuasou alaxu ta'eisi. Xo ane'i ane ta mitema milosi'a mimii tapiena ne, la ta mitema ilinga lexe ikolinu tapiena sio. Xe ane'i ane ta mitema milosi'a mimii tavu'alo noxi'a ne, la ta mitema ivikala lexe ikolinu tavu'alo la.”
Kalipala
(Mat 10:34-36)
49Iesu muvikalane'i la aloxo 'o, “Eni ene'e 'o sou alea navu ulu'e no lialia 'o. Mo eni emasaxa lexe navu ane ne, u'ani paleasi la eni a'osa. 50 lIa, ulai ili'i, la eni a'ulo no anu 'ulo sou soli. Mo vaimomo 'o, eni opoole tu'umaxu sio xo xaixai ane ne, eni akalusou uao. 51Loxo 'o io, ngingi ngaxavutala lexe eni ene'e 'o sou akalusou 'oto'oto no lia 'o. Uasi, eni avikalangengi lexe eni ene'e 'o sou akalikalipalane'i ta mitema. 52Vaimomo 'o mo ulai ili'i, la ta mitema ta'uve no tani vile ne, ikalipala mo ixali tamei. Tatalu i'oto noxi'a tamei xe tamei i'oto noxi'a tatalu. 53 mIkalipala, la mami'a u'oto noxou 'olu xe 'olu u'oto noxou momu, xe neni'a i'oto noxie 'ilie sema xe 'ilie sema i'oto noxie nenie, xe nenie i'oto noxie ua'a'ne xe ua'a'ne i'oto noxie.”Lavulavusou Imuxaxu Kila Sou Voxo Ngiongiou
(Mat 16:2-3, 5:25-26)
54Iesu muvikalane'i ta molomolo noxou mukalu, la Anu muvikalane'i ta mitema laoluxa'a aloxo 'o, “Lexe ngingi ngamaisou tamuxala utulu utelo no xalee ane aso u'una no anu, la ngingi ngapalea ngavikala lexe, ‘Uali asou usili.’ La anu usili manina. 55Xe no voxo ane atume uili molu lu'e no luaki utelo, la ngavikala lexe, ‘Vaimomo 'o, la tani ialuxu.’ La anu uxali manina. 56Ngingi ta mitema sou kalakalavoi! Ngingi ngelavusou voxo sou mimii ane uxali no lia 'o mo teitexi no loxotolo. Ia loxovaa, la sou ngingi ngalavusou mii ma'ia ane uxaxali no anu voxo ano 'o uasi 'o?57Ia tava'u loxovaa, la sou ngingi menge ngatilovosou mii ane laixe xe mii ane masua uasi 'o? 58No anu voxo ane ngingi nongou itema ane utelo vaikala noxine ngamuamua'i ngalai noxou itema sou utilovosou vaikalamengi, la natovonu peki'aine sou namomosou vaivaikala no mine ngingi nongou uao no vote'i io. Nini na'oxo aloxo ne uasi, la anu usu'aneni nalai noxou itema sou uvelunu vaikalamengi. La itema sou utilovosou vaikala u'italoneni nalai noxou itema sou xaixai noxou, la anu usu'aneni na'una no taasou navunavu. 59La eni avikalaneni aloxo 'o. Nini naxolu no anu taasou navunavu ne, utalo no anu voxo ane nini naleanu Leputa vile kaluxusou.”
Copyright information for
ATA