Luke 16
Vaikala Tovola'isou Itema sou Kalavoi Mu'oxonu Xaixai Laixe
1Mukalu, la Iesu muvikalane'i ta molomolo noxou aloxo 'o, “Itema vile sou usaxila'u lamoliu itema sou lavuluti vile mupaipalunu lamoliu tila noxou. La sou ta mitema mose'i milai mia'aloxu noxou tilasou ne. 2La sou tila noxou mu'avalou sou mutali'isou lexe, ‘Nini ne'oxo mii ma'ia, la sou ta mitema mia'aloxene noxilo? Nini naxolu loxo itema sou usaxila'u lamolixeni la uasi. Nini nakalu, io nini nakaukavunu a'alosou lamolixeni ukalusi mo nalosilo.’3La sou itema sou usaxila'u lamoliu tilasou ne, anu molu muvikala aloxo 'o, ‘Tila noxilo uxexeleli no anu xaixai ane anu mulosilo 'o, la eni a'oxonu mii ma'ia? Xo eni xavileli sou a'asi'asi uasi mo eni amaelasou alingalinga mimii noxi'a ta mitema. 4Anu ane, eni exalisou vote'i vile sou a'oxonu no mine tila noxilo uxexeleli no anu xaixai noxilo lai 'o, la ta mitema i'osasilo mo i'avalilo a'unalai no taasi'a.’
5Anu muxalisou vote'i vile aloxo ne, la sou anu mu'avali'a ta mitema vilevilesi e mino'u tilasou miumiu ia ikolinu uao. Ane'i mine'e, la sou mutali'isou vile noxi'a tei aloxo 'o, ‘Nini neno'u miumiu tila noxilo ta'ei sou nakolinu?’
6La anu mukolinu aloxo 'o, ‘Eni eno'u vata sou ovu olivu temanu lexaxu vexasou itemaxu ta'uve (100).’
La sou anu muvikala lexe, ‘Nano'u uoli voloxu e ekaukavunu mii ane nini neno'u ne, mo naxolu no lia palea sou naxiu mo nakaukavu mavulovexa ta'uve.’
7Mukalu, la mutali'isou tameisi'a lexe, ‘Nini neno'u ta'ei sou nakolinu?’
La anu mukolinu aloxo 'o, ‘Eni eno'u tiva sou uiti temanu itemaxu ta'uve.’
La anu muvikala lexe, ‘Nano'u uoli voloxu e ekaukavu mii ane nini neno'u ne mo naxiu uxali loxo itemaxu tami'a (80).’
8Anu itema sou kalavoi, ia mu'oxonu xaixai laixe no anu lavulavu noxou aloxo ne, xe tila noxou mulavusou, la mu'itinu ualasou. Xo ta mitema ane ilavusou Lataua uasi no lia 'o, iuaulixa'a ane'i ane milavusou Lataua no anu xaixai sou lialia 'o. 9La sou eni avikalangengi ta molomolo noxilo lexe, ngaxaxai laixe no anu mimii sou lialia 'o sou ngamolo ta menexinge ane imaxa'u 'ili'ilixomengi, mo sou ili'i xe mimemimengi ne ukalu, la Lataua u'avalinge ngalai ngaxolu no tuala ane kaluxu uasi.
10 aAloxo ne, la sou lexe itema vile umomomo sou usaxila'u mii ane kitu'a laixe, la anu umomomo sou usaxila'u mii ane tatila laixe kalumo. Ia lexe itema vile umomomo sou usaxila'u mii ane kitu'a laixe uasi, la anu umomomo sou usaxila'u mii ane tatila laixe uasi kalumo. 11La sou lexe ngingi ngamomomo sou ngasaxila'u mimii ane sou lia 'o laixe uasi, la 'ena'ei u'italongengi sou ngasaxila'u mimii ane maninasou? 12Mo lexe ngingi ngamomomo sou ngasaxila'u itema vile miumiu laixe uasi, la 'ena'ei uitimengi mimii sou ngasaxila'u?
13 bMo eni avikalangengi kalumo lexe, itema sou xaixai vile umomomo sou uxaxai noxi'a ta tatila noxou tamei uasi. Xo maasi, xe xavutalau ukalipala, la anu umasaxau vile uasi, io umasaxau ane vile. Xe anu uxaxai noxou vilesi, ia tanu vulusiou ane vile. Aloxo ne, la sou ngingi ngamomomo sou ngaxaxai noxou Lataua xe ngaxaxaisou lamoli kalumo uasi.”
14Ta Palisaio ane tane'i uxolu no anu lamoli musuku milomusou Iesu muvikala aloxo ne, la ane'i mipilikeu. 15 cLa sou Iesu muvikalane'i aloxo 'o, “Ngingi ta mitema sou ngatoongenge lexe ngingi ta mitema ta laixe no ie'i ta mitema, ia Lataua mulavusou mii ma'ia ane muxolu no tangengi ne. La sou 'ena'ei ane ta mitema i'itinu ualasou ne, Lataua umasaxau uasisi manina.”
Iesu Mulosi'a Lavulavu Mose'i La
16 dIesu muvikalane'i ta Palisaio la aloxo 'o, “Vaikala sou lapuloto noxou Mosesi mo vaivaikala noxi'a ta mitema sou palomatana mune'e mutalo noxou Ioanesi. Musoko no voxo ane ne, la eni esokou a'alo laixe sou saxisaxila'u noxou Lataua sou alutunoxu ulai no tuatuala. La ta mitema tapiena xavine'i sou imasaxa lexe i'una no anu. 17 eIa mimii latala teitexi no loxotolo mo lialia 'o, ili'i la ukalu. Ia vaikala sevile kitu'a no nano no 'a lapuloto noxou Mosesi ne, umomomo sou ukalu uasi.18La sou itema ukusaie semau, io u'uluxe sema vileli, la anu mususunoxu taula'i. Xe mulu vile ane uno'e sema e mulue musu'ane ne, la anu mususunoxu taula'i noxou kalumo.”
Itema sou Lavuluti Tapiena Ilou Lasaro
19Iesu musolo vaikala noxou la aloxo 'o, “Itema vile sou lavuluti tapiena muxoxolu. Ia utaa tokolomoxu lauoinu veveeni no ale, xe utaa ane keakea laixe no nano. Mo u'ou la'ilali lailaixesi no voxovoxo. 20Io, no aitengaxu taasou ne, la itema vile sou lingalinga ualasou lexe Lasaro e xalexalevi mutomunu vasimolu, anu a uxoxolu ne. 21Anu umasaxa lexe u'ou la'ilali 'utu'utuxu ane ulapau no luusou la'ilali noxou itema sou lavuluti piena ne. Ia ta a'aa ine'e la ixamexamesou xalexalevinu.22Ioxe, ili'i xe itema sou lingalinga ne musoli, la ta angelo mitavule mulai mipamotonu muxolu muvaisa'inu Avalaamu. Xe ili'i la itema sou lavuluti tapiena ne kalumo musoli, la mi'asixu. 23La mulai muxolu no tualasi'a ta mitema ane misoisoli la anu muxamulinu navunavu tatila. Xe iou mutelo, la mumaisou Avalaamu muxolu no paxa, ia Lasaro anu muvaisa'inu. 24La sou mu'ava mulai noxou aloxo 'o, ‘Ae, 'ilisuleli Avalaamu, eni examuli navunavu tatila no anu navu 'o. La sou nini tanenixo mo napalusou Lasaro utoo avolu simisou no lexa mo une'e umulaxu no levexo mo u'oxo lelemesou.’
25Ia Avalaamu muvikalanu aloxo 'o, ‘'Ilusuleli, naxavutala lexe no mine nini nemauli nexoxolu no lia, la nini neno'u mimii ane lailaixe. Ia Lasaro ne, anu muno'u mimii ane masumasuasi. Ia vaimomo 'o, la anu uxolu laixe mo u'osa 'o, ia nini a naxolu no anu navunavu ne. 26Xe kalumo xo, vanunu toxoxa'a anu a uxolu no nixi noxinge nenge'a, la sou evile lai 'o umasaxa lexe ulai noxine ne, la umomomo uasi, xe evile lai noxine ne, umasaxa lexe une'e noxixe 'o, la umomomo uasi kalumo.’
27La sou anu muvikalanu Avalaamu aloxo 'o, ‘Ioxe, la sou eni alingaine nini 'ilusuleli. Napalusou Lasaro ulai no tani noxou mamilo, 28xo eni ta vivilo ta'uve ane a ixoxolu no anu ne. La sou Lasaro upeletotosi'a, mo sou ane'i kalumo la ine'e no tuala sou navunavu 'o uasi.’
29Ia Avalaamu muvikalanu aloxo 'o, ‘Nalomu, lapuloto noxou Mosesi mo vaivaikala noxi'a ta mitema sou palomatana anu a muxolu ne sou ane'i ilomu no anu.’
30Xe anu muavuti la muvikalanu la aloxo 'o, ‘'Ilusuleli Avalaamu, navikala aloxo ne uasi. Xo lexe itema vile musoli, ia utulu mo ulai noxi'a la sou ane'i ixiu opone'i.’
31La Avalaamu muvikalanu aloxo 'o, ‘Lexe ane'i ilomusou lapuloto noxou Mosesi mo vaivaikala noxi'a ta mitema sou palomatana uasi, la ane'i imomomo sou ilomuxu itema vile e musoli ka mumauli ne sou ixiu opone'i uasi kalumo.’”
Copyright information for
ATA