‏ Luke 4

Tovotovo Noxou Iesu

(Mat 4:1-11; Mak 1:12-13)

1Ioxe, Iesu mu'ulo ne Ioridani mukalu xe xaviinu Uleenu Tavuna mu'ana'ana noxou, la mulivu no tualasou. Xe ili'i, la Uleenu Tavuna mulaixu no xalee lia vitanisi sou lexe Satani utovonu. Anu muxolu lai ne, la u'ani uasi mumomomo loxo voxo mavulovexa tami'a. Xe voxo mavolovexa tami'a mukalu, la muxamuli lexe Anu musolixu.

3Anu musolixu, la sou Satani muvikalanu aloxo 'o, “Lexe nini Lataua 'Olu, la navikalanu lavo'o vile 'o mo uxiu uxali veleti.”

4 ^aIa Iesu mukolinu aloxo 'o, “Vaikalau Lataua muvikala lexe ta mitema imauli no anu veletisi uasi, ia imauli no anu vaivaikala noxou Lataua kalumo.”

5Mukalu, la Satani mulutunoxu Iesu mutelonu no la'olu vile teitexi. Xe alaxu vilesisi 'o, la mulosiouxu tuatuala mukalusi no lia 'o. 6La muvikalanu aloxo 'o, “Eni alosine xavi sou nasaxila'u tuatuala ukalusi mo alosine mimii ukalusi no anu sou na'anini. Xo eni esaxila'u mimii ane ne, la sou eni alosou mitema 'ena'ei ane eni emasaxa sou alosou. 7La sou lexe nini napala'alixo lexe eni Lataua, la mimii ukalusi 'o ne, nini na'anini.”

8 ^bIa Iesu mukolinu aloxo 'o, “Vaikalau Lataua muvikala lexe ngingi ngalu'elailingenge sou nga'itinu Tila Lataua noxinge ualasou mo ngaxaxai noxousi.”

9Xe mukalu, la Satani mulaixu mulai ne Ielusalemu sou mu'italonu muxolu teitexi no tani tila noxou Lataua kisou. Ia muvikalanu Iesu aloxo 'o, “Lexe nini Lataua 'Olu, la naili'e lai 'o nalai no lia. 10 ^cXo vaikalau Lataua muvikala lexe Lataua upalusi'a ta angelo noxou sou ilooxene no avo'a lailaixe. 11Mo itetelisine no avo'a teitexi, mo sou mamu sou lavo'o vile uto'omolu tava'ine.”

12 ^dIa Iesu mukolinu aloxo 'o, “Vaikalau Lataua muvikala lexe mamu sou nenge tatovonu xavi noxou Tila, anu Lataua noxinge.”

13 ^eSatani mutovonu Iesu no anu tovotovo iouiou ne mukalu, ia Iesu ulapau uasi. La sou Satani mu'umesou sou ulai uxomaiou no anu voxo vile ili'i la.

14Ili'i no anu tovotovo, la xaviinu Uleenu Tavuna mu'ana'ana noxou Iesu sou mulivu no xalee lia tila ne Xalilaia. Anu mulivu, la ta mitema no xalee lia mukalusi ne mino'u a'alosou la, milavusou lexe Iesu Anu a mulivu mune'e ne Xalilaia. 15Xe Anu mulosi'a ta mitema lavulavu no taasou la lotu noxi'a ta Iutaia, la ta mitema mukalusi mi'itinu ualasou.

Ta Mitema no Tualasou Iesu La'iaxa'au Misevile

(Mat 13:53-58; Mak 6:1-6)

16Xe ili'i, la Iesu mulai ne Nasaleti. No mine anu kitu'axu sio, la muxolu no tuala ane ne mo muxali tila no anu. No voxo Tavuna vile, la Anu mu'unalai no taasou lalotu noxi'a ta Iutaia loxo Anu ulavusou u'unalai no anu. Xe Anu mu'unalai mukalu, la mutulu sou lexe uitisou vaikala noxou Lataua. 17La ane'i milosou lavuku e Aisaia anu itema sou palomatana mukaukavunu mipipinu muai. Anu muno'u ka muxavulalanu sou mukamuli vaikala vile muvikala aloxo 'o,

18 ^f “Uleenu Tavuna noxou IAUE, anu a uxolu noxilo 'o.
Xo anu IAUE musosovosilo sou lexe
eni aa'aloxu a'alo laixe noxou Lataua noxi'a ta mitema e i'a lavuluti uasi.
Anu mupalusilo sou lexe
eni alulusi'a ta mitema ane mixolu no anu taasou navunavu,
mo avikalane'i ane'i e ie'i seleselevenu lexe ie'i ukaa la.
Mo Anu mupalusilo kalumo sou lexe
eni akalusou tu'utu'umaxu noxi'a ta mitema
ane'i ane ta tatilasi'a mi'oxo masuane'i,
19mo avikalane'i no anu voxo sou IAUE ualaunasi'a ta mitema.”
20Iesu muitisou aloxo ne mukalu, la mupipinu mukalu la mulosou itema sou usaxila'u kaukavu ne. Io, Anu muxolu no lia, la ta mitema mukalusi mixolu no nano ne, mimatakisou. 21Ia Anu muavuti la muvikalane'i aloxo 'o, “Kaukavu ane eni eitisou 'o, anu a muxali manina vaimomo 'o loxo ngingi ngelomusou ne.”

22 ^gAne'i milomusou, la miitinu ualasou xe mikuluke no anu vaivaikalau lailaixe ne. Ia ane'i mixavutala piena, la mivikalane'i ngatongato'o aloxo 'o, “Anu ne, nenge telavusou lexe Anu Iosepu 'olu, ia loxovaa la sou Anu muvikala aloxo ne.”

23La Iesu musolonu vaikala sou muvikalane'i aloxo 'o la, “Eni elavu manina lexe ulai ili'i, la ngingi ngalemolu vaikala vile tatei mikaukavunu lexe, ‘Itema sou pamauli, nini mene napamaulineni.’ Mo ngavikalaleli lexe mimii e eni e'oxonu lai ne Kapenaumu ne, eni a'oxonu lai no tualasilo 'o.

24 ^hEni avikalangengi manina musuku. Ta tema tualasou itema sou palomatana vile ne imomomo sou i'osasou uasi. 25 ⁱEni avikalangengi manina musuku. No anu voxo e Eliasi muxaxai loxo itema sou palomatana, xe tauu aso toxoxa'a mo tausoli kalumo muxolu ne no tuatuala mukalusi mumomomo loxo tauu ie tatalu mo so'io muxatele vile. La ta sema ta vaalu tavu'alo mixolu ne Isilaeli, 26 ^jia Lataua upalusou Eliasi ulai noxie vile noxi'a ne uasi. Mupalusou mulai noxie vaalu vile ne Sareputa no xalee lia ne Saidoni. 27 ^kXe no anu voxo e Elisa muxaxai loxo itema sou palomatana sie Isilaeli, la pipiena vulukali mu'oxone'i ta mitema tavu'alo ne Isilaeli. Ia vile noxi'a une'e noxou Elisa sou umauli uasi. Naamani e ne Siliasi a mulai noxou Elisa sou mumauli.”

28Ioxe, ta mitema mukalusi no nano no taasou lalotu noxi'a ta Iutaia ne, milomu aloxo ne, la la'iaxa'a manina. 29Xe ane'i miavuti la mikusau Iesu mulai no ale sou milaixu no maea kisou e tuala tila muxolu no anu sou lexe ivau usoli. 30Ia, uasi. Anu musixa no taiine'i ta mitema, la mulai avile.

Iesu Mukusau Ulee Vile Masua

(Mak 1:21-28)

31Ioxe, ili'i la Iesu mulu'elai no tuala ne Kapenaumu e ne Xalilaia. Muxolu ne sou musoko sou ulosieixa'a ta mitema lavulavu no voxo Tavuna. 32 ^lXe ta mitema milomusou vaivaikala noxou, la ane'i mikuluke, xo vaikalau ne xaviinu. 33Io, no voxo vile la itema vile muxolu no taasou lalotu noxi'a ta Iutaia ne, ulee vile masua muxolu noxou. La anu mu'ava'ava tatila misevile. 34La muvikalanu Iesu aloxo 'o, “Ae, nini Iesu sie Nasaleti! Nene'e 'o sou na'oxonu ma'i noxixe? Nini nene'e 'o sou na'oxonu masuanexi? Nini ne, eni elavusine. Nini itema mulapu noxou Lataua.” 35Ia Iesu mulomu sou aloxo ne, la mukaitolonu ulee masua ne aloxo 'o, “Naxoo tasiau! Mo naxexesou itema ne!” La ulee masua ne, mulovelixu itema ne mulu'e no talaxa'a mukalu, la sou muxexesou mulai. Ia u'oxonu masuanu itema ne uasi. 36Ta mitema mimaisou aloxo ne, la mikuluke la mivikalane'i ngatongato'o aloxo 'o, “Iu, nenge vaikala mii ma'ia ane loxo! Itema 'o mukaitolone'i ta ulee ta masumasua no anu xavi noxou, la ane'i milomuxu mo milaalaa.” 37Loxo ne, la sou a'alosou mimii e Iesu mu'oxonu ne, mulai no tuatuala tavu'alo e muxolu 'ala'alai ne Kapenaumu.

Iesu Mupamauline'i ta Mitema Tavu'alo

(Mat 8:14-17; Mak 1:29-34)

38Iesu mulutu no taasou lalotu noxi'a ta Iutaia sou mulai no tani noxou Saimoni. Ia Saimoni leuanu ne mipipiena, mo vasimele ialuxu misevile. La ane'i mitali'isou Iesu lexe upamauline. 39La sou Anu mutulu 'alai noxie sou muvikala pekia'u lexe pipiena ne uxexesie. La ialuialuxe ne mukalu. Io, alaxu vilesisi la ane mitulu sou mixuxutuxa'a la'ilali.

40Ili'i no 'olo'olovoxo, la ta mitema mine'ene'i ta minemine'i e pipiena iouiou mu'oxone'i ne noxou Iesu sou Anu mumulaxu avolu noxi'a vilevilesi, la ane'i mimauli. 41 ^mXe ta ulee masumasua kalumo milaalaa noxi'a ta mitema tapiena. La i'ava'ava aloxo 'o, “Nini ne, Lataua 'Olu.” Ia Anu mukaitolone'i lexe mamu sou ivikala. La ane'i milomuxu Iesu, xo milavu lexe Anu Kalisito.

42'Olovoxo mukalu xe kakau, la Iesu mulutu sou mulai no xalee lia vile ane ta mitema ixolu no anu uasi. Ia ta mitema mikakamulinu xe mixalisou, la miapixu lexe ilo'a ixolu 'o. 43Ia Anu muvikalane'i aloxo 'o, “Eni ene'e 'o sou aa'aloxu a'alo laixe sou saxisaxila'u noxou Lataua no tuatuala se'i va'axu kalumo. Xo Lataua mupalusilo sou xaixai aloxo nesi.” 44 ⁿLa sou Anu muxixaoxao no tuatuala ne Iutaia sou mua'alo no taasou lalotu noxi'a.