Mark 14
Sema Vile Minixi'u Ueli E Tuma'u Lailaixe noxou Iesu Kisou
(Mat 26:1-5; Luk 22:1-2; Ioa 11:45-53)
1Voxo tamei a uao no anu voxo ane isosovosou voxo e Lataua Mupolopepeene'i Ta Isilaeli xe voxo e Ixutuxu La'ilaliaxa'a Vitanisi, la ta tatila noxi'a ta aili'i ilo'a ta mitema sou lapuloto mikamuli vote'i sou lexe itetelisou Iesu mo ivau usoli. 2Miavuti la mivikala aloxo 'o, “Nenge ta'oxo mii ane nenge tevivikalasou 'o no nixi no anu voxo tila 'o uasi, xo loxo 'o io ta itema imaisinge la iavutinoxu 'oto'oto.”3 aAnu Iesu a mulai mo 'a mu'unalai no tani noxou itema vile ualasou lexe Saimoni. Saimoni ne, vulukali mu'oxonu. Iesu mu'unalai mo mulai mutalupexa sou lexe u'ani. Ia sema vile mino'u lavotoli vile ne sou ueli e tuma'u lailaixe. Lexa ane ne, lamoli sou tila misevile. Mino'u xe milai mixali noxou Iesu, la mixola'u anaxu ka minixi'u noxou Iesu kisou.
4Ta mitema se'i ane ilo'a Iesu mixoxolu ne, mimaisie la la'iaxa'a, la mivikalane'i ngato'o lexe, “Tava'u loxovaa ane, sema 'o ivila'isou ueli e tuma'u lailaixe loxo 'o? 5Lexe uaisi mo sou lexe ilotonu no anu Denalia itemaxu mavulovexa vile mo itemaxu ta'uve (300), la sou nenge taiti'a ta mitema ane i'a mimii uasi.” Tane'i la'iaxa'aie misevile la sou mivikala aloxo ne.
6Xe Iesu muavuti la muvikalane'i aloxo 'o, “Iengi uvaxaiesi. Loxovaa ane ngingi ngalosie tu'umaxu ane loxo ne? Mii ane ane mi'oxonu mune'e noxilo ne, anu laixe misevile. 7 bTa mitema ane i'a mimii uasi ne, anu voxovoxo piepiena 'a uxoxolu sou ngingi ngaiti'a mimii loxo ngemasaxau, xo ngingi ngongi'a ngaxoxolu. Ia eni ne, nenge nenge'a taxoxolu utotomu uasi. 8 cAne mi'oxonu mii ane ne, ane mumomomo noxie sou lexe i'oxonu. Ane minixi'u ueli e tuma'u lailaixe no vasimelo tei loxo ne, sou ulalaxi vasimelo sou mine ilai i'asixo. 9Eni avikalangengi manina aloxo 'o. No xalexalee tuatuala ne'ei ne'ei ne, lexe ilai ia'aloxu a'alo laixe, la mii e ane mi'oxonu ne, ane'i ia'aloxu kalumo la ixavutalane.”
10Xe Iudasi Isikarioti, anu vile noxi'a ta molomolou mavulovexa mo mulelia tamei ne, muavuti la mulai muxali noxi'a ta aili'i sou lexe anu u'italonu Iesu ulai no avo'a. 11Ane'i milomu noxou aloxo ne, la opone'i mu'osa manina, la sou ane'i misakii vaikala lexe ilosou lamoli. La sou Iudasi muavuti sou ukamuli vote'i sou u'italonu Iesu no avo'a.
Iesu Ilo'a ta Molomolou Mi'ani
(Mat 26:17-25; Luk 22:7-14, 21-23; Ioa 13:21-30)
12 dVoxo vilesou Ixutuxu La'ilalixa'a Vitanisi 'a muxali, la no voxo ane ne, ane'i ilavusou ive'a ta sipsip ta 'ili'a sou i'oxonu la'ilali sou ixavutalanu voxo ane sou Lataua Mupolopepeene'i Ta Isilaeli no anu. Xe ta molomolo noxou Iesu miavuti la mitali'isou aloxo 'o, “Nini nemasaxa lexe nexi talalaxii la'ilalixene sou voxo sou Lataua Mupolopepeene'i Ta Isilaeli 'ava?”13La sou Iesu mupalusi'a ta molomolo noxou tamei, la muvikalane'i aloxo 'o, “Ngalai no nano no tuala tila xe ngaxalisou itema vile utatavulenu lexa vexasou mutau lexa no anu, la ngamulinu. 14Ngongou ngalai xe ngaxali no tani e anu u'unalai no anu ne, la ngavikalanu tatananu tani ne aloxo 'o, ‘Itema sou ulosixe lavulavu mutali'i aloxo 'o. Tani kapiutuxu noxou ane sou nexi noxi'a ta'ani la'ilali sou tasosovosou voxo sou Lataua Mupolopepeene'i Ta Isilaeli no anu 'ava?’ 15La sou anu ulosiengixu kapiutu vile tatila muxolu teitexi. Valovalo mo luuluusou mo mimii se'i kalumo ne a mulalaxii mukalu. Ngongou ngalai, la sou ngalalaxiinu la'ilalinenge ane.”
16Ane'i ilou milai xe mi'unalai no tuala tila, la ilou mimaisou mimii ne aloxo Iesu mulemolu noxi'a ilou. La sou ilou milalaxi la'ilalixa'a ilo'a.
17Xe no 'olo'olovoxo, la sou anu Iesu ilo'a ta molomolo noxou mulelia tamei ne mixali. 18 eIlo'a mita'olu sou i'ani'ani, ia Iesu muavuti la muvikalane'i aloxo 'o, “Eni avikalangengi manina aloxo 'o, vile nonixi noxinge ne, ulai la anu u'italoleli alai no avo'a ta mitema. Anu 'a nexi noxou ta'ani'ani 'o.”
19Xe ane'i milomu aloxo ne, la opone'i tu'umaxu, la sou ane'i vilevilesi miavuti la mitali'isou aloxo 'o, “Male, eni uasi, ne?”
20“Itema ne anu vile noxinge ngingi mulelia tamei ne.” Anu mukoline'i aloxo ne. “Anu e loxo nexi noxou ta'uinu la'ilali no anu paku vilesisi. 21Itema 'Olu ne, ulaisi mo uulua aloxo vaivaikalasou mikaukavunu no anu Lavuku Tavuna teinu. Ia laixe lexe Lataua uvavaaxu itema e u'italonu Itema 'Olu ulai no avo'a ta mitema. Lexe ane nenu ivo'onu uasi, la anu laixesi.”
22Ilo'a i'ani'ani, ia Iesu mukasi mulu'e no anu veleti sou muno'u sou muvikala laixe musuku noxou Lataua xe mukalu, la muse'ise'inu sou mulosilosi'a vilevilesi la muvikalane'i aloxo 'o, “Ngano'u. Vasimelo ane.”
23Xe muavuti la mukasi vaxa no anu paku sou uaini, la muvikala laixe musuku noxou Lataua. Xe mukalu la mulosi'a sou ane'i latala ne miiexu.
24 fLa sou muvikalane'i aloxo 'o, “Sialuxo ano 'o. Eni asoli xe sialuxo unixi, la anu u'oxonu vaikala e nenge nenge'a Lataua tesakiinu 'o, uxali manina. Sialuxo ne, sou unixisi'a ta mitema tavu'alo sou upamauline'i.” 25Xe muavuti la muvikalane'i aloxo 'o la, “Avikalangengi manina. Umomomo sou eni aie la no anu uaini temanu uasi, ulai utalo no voxo ane sou eni aiexu ane alavua no tuala teitexi noxou Lataua.”
26Ilo'a mi'ani mukalu la milexe lexe vile sou ilo'a milaa milai no laxa'ilu ne Olivu.
Iesu Mutotokalasou Pita Lexe Usingisou
(Mat 26:31-35; Luk 22:31-34; Ioa 13:36-38)
27 gIlo'a milai xoo la Iesu muvikalane'i aloxo 'o la, “Ngingi latala 'o ne ulai, la nga'umesilo ukalusi. Xo vaikala vile mikaukavunu muxolu no anu Lavuku Tavuna teinu aloxo 'o,‘Ulai, la eni avau itema sou usaxila'a ta sipsip,
la ane'i ta sipsip ne i'ume ipaxele.’
28 hIa ili'i, eni atulu sou amauli, la eni auli alai ne Xalilaia.”
29Xe Pita muavuti la muvikalanu lexe, “Ulai, la latala 'o ne, i'ume'ume ukalusi, ia eni ne uasi.”
30Xe Iesu muavuti la mukolinu Pita vaikalau aloxo 'o, “Eni avikalaneni manina aloxo 'o, maasi no 'olovoxo 'o, la koko'a u'ava alaxu tamei uao, ia nini nasingisilo alaxu tatalu lexe nalavusilo uasi.”
31 iIa Pita ne, mutotoiti misevile. Xe muavuti la muvikala pekia'u aloxo 'o, “Eni umomomo sou asingisine lexe eni alavusine uasi, xo nenge nengei tasoli takei.” Ane'i Pita ta menexu ne, mivikala kalumo aloxo ne.
Iesu Mulinga ne Xetesemane
(Mat 26:36-46; Luk 22:39-46)
32 jIlo'a mimuamua'i xe milai mixali no lia xalee ilemolu lexe Xetesemane, la Iesu muvikalane'i ta molomolo noxou aloxo 'o, “Ngata'olu ano, ia eni alai alinga.” 33Muno'a Pita ilou Iakovo mo Ioanesi sou ilo'a milai, la Anu tanu lili xe opo tu'umaxu. 34 kIlo'a tatalu ne, milai la sou muvikalane'i aloxo 'o, “Ngaxolu ano mo ngautiti laixe. Xo eni opoleli tu'umaxu mo eni 'a 'ala'alai sou asoli.”35Musuku mulai sevile va'axu noxi'a mukalu, la sou mutangatulu mulu'elai no lia sou mulinga. Mulinga lexe voxo sou tu'umaxu ane ne uxexesou. 36 lMulinga la, la muvikala aloxo 'o, “Aba, ▼ Mamilo. Mimii latala ne, pekia'u noxine sou na'oxonu uasi. La sou eni emasaxa lexe naxexeenu soli noxilo uxexesilo. Ia namulinu masaxa noxilo uasi, namulinu masaxa noxinesi.”
37Mulivu mulai noxi'a ta molomolo noxou tatalu ne, la ane'i 'a iai, xe muavuti la muvikalanu Pita aloxo 'o, “Saimoni, nini 'a naai? Loxovaa, nautiti naxolu no aso iou taiinu vile uasi? 38Nautiti mo nalinga, mo sou tovotovo uxali noxine la utaloxolixene uasi. Manina musuku, itema uleenu umasaxa lexe uxaxai, ia vasimolu ne pekia'u uasi, mamalaxusi.”
39Iesu mune'e muvivikalane'i aloxo ne xe mukalu, la mulivu sou mulai mulinga la. Anu mulinga aloxo tei ne. 40Mulivu mune'e, la ane'i 'a iai sio, xo ie'i uvuvu sio. Xo tane'i tema uao, la sou ivikalanu no anu vaikala vile uasi.
41Xe mulivu mulai sou mulinga xe mulivu mune'e noxi'a alaxu tatalusou, la ane'i 'a iai sio, la mutali'isi'a aloxo 'o, “Ngingi 'a ngaaisi sou ngama'ila? Mumomomo aloxo ne! Voxo 'a muxali. Ngamaisou! Ane'i ta mitema i'italonu Itema 'Olu no avo'a ta mitema ane ilavusou i'oxonu 'ilixo ane masumasua. 42Ngatulu mo nenge'a talai. Ngamaisou! Itema e u'italoleli no avo'a ta mitema ne, anu a uxali 'o.”
Mitetelisou Iesu
(Mat 26:47-56; Luk 22:47-53; Ioa 18:3-12)
43Iesu uvivikala 'o, ia alaxu vilesisi 'o, la Iudasi mune'e noxou. Anu vile noxi'a ta molomolou mulelia tamei. Anu ilo'a ta mitema tavu'alo mixali, ia ta mitema mitetelisou viso ilou kuluvololou. Ioxe, ta mitema ane ne, ane'i ta tatila noxi'a ta aili'i ilo'a ta mitema sou lapuloto mo ta tatila mipalusi'a mine'e.44Itema e mu'italonu Iesu no avo'a ta mitema ne, muvikalane'ixu sosovo vile tei aloxo 'o, “Lexe eni atimu no xaleenu, la Anu ane. Ngatetelisou mo ngalailixu, ia ngasaxila'u laixe.” 45Ioxe, Iudasi muxali, la alaxu vilesisi anu mulai noxou. Muvikalanu aloxo 'o, “Rabi”, la sou mutimu no xaleenu. 46Ane'i mimaisou Iudasi mutimu no xaleenu, la sou ane'i mikasi vaxa no avolu sou mitetelisou. 47Itema vile mutulu 'alai noxou Iesu mulavee viso ka muvali vaxa no sangalou itema sou xaixai noxou kisi'a ta aili'i. Sangalou ne, muxoto la mulapau.
48Iesu muvikalane'i aloxo 'o, “Ngingi ngeno'u viso xe kuluvololou sou ngene'e sou ngatetelisilo xo eni amitema sou aavutilixu 'oto'oto? 49 nNo voxovoxo 'o, nenge'a texoxolu no nano no taasou lalotu tatila noxou Lataua sou elosi'a ta mitema lavulavu, ia loxovaa la ngatetelisilo ua? Mii vile uasi. Xo vaikala muxolu no nano no Lavuku Tavuna teinu ne, muxali manina.” 50 oAne'i ta molomolo noxou latala milomu aloxo ne, la mi'ume sou milailai.
51Maulu vile e mumulinu Iesu ne, mutaa tokolomo maenaxu vilesisi. Ia ane'i ta mitema mitovo lexe itetelisou, 52la anu mu'ume mulai pangapanga'usi. Tokolomou ne, muluvu muai.
Iesu Mutulu no Anu Vaivaikala
(Mat 26:57-68; Luk 22:54-55, 63-71; Ioa 18:13‑14, 19-24)
53Xe ili'i, la ane'i ane mitetelisou Iesu ne, milailixu noxou kisi'a ta aili'i. Io, ta tatila noxi'a ta aili'i latala ilo'a ta tatila mo ta mitema sou lapuloto 'a ipita ixolu. 54Pita ne, anu mumulinu Iesu muili'i no paxa. Anu muxali no vimelusou tani noxou kisi'a ta aili'i, la mu'unalai sou ilo'a ta mitema sou isaxila'u tani mixolu sou mutu'e navu.55Ia, ta tatila noxi'a ta aili'i ilo'a ta tatila sou ipotosou tu'utu'umaxu noxi'a ta mitema latala ne, ikamuli susu noxou Iesu sou ivau usoli, ia ixalisou vile uasi. 56Ta mitema tavu'alo mitelo vaikala noxou, ia vaikalai'a ne vilesisi uasi.
57Se'i mitulu sou mikalavoisou Iesu aloxo 'o, 58 p “Nexi telomusou muvikala aloxo 'o, ‘Eni akisilalanu tani tila noxou Lataua ane'i ta mitema mitulusou no avo'a, ia ili'i no anu voxo tatalusou la atulusou ulivu la, ia atulusou no avolo loxo ta mitema itulusou uasi.’” 59Ia vaikala noxi'a ne kalumo vilesisi uasi.
60Ioxe, kisi'a ta aili'i mutulu no talaxa'a ta mitema, la mutali'isou Iesu aloxo 'o, “Nini namasaxa nakoli vaikalai'a ane mutelo noxine ne uasi? Nini naxavutala a loxovaa no anu vaikala ane mutelo noxine 'o?” 61Ia Iesu mutaloxa'asi. Anu ukolinu vaikalai'a vile uasi.
La kisi'a ta aili'i mutali'isou la aloxo 'o, “Nini Kalisito ane? Itema ane ualusinge, 'Olu ane nini 'o?”
62Iesu mukolinu aloxo 'o, “Eni ano. Ngingi ngamaisou Itema 'Olu uva'isa'inu no avo tema Itema sou xavi mo une'e ulu'e no anu umuumu molu no opo loxotolo.”
63Anu mulomusou Iesu muvikala aloxo ne, la mukakanu tokolomou, xo anu la'iaxu. Xe muvikala aloxo 'o, “Nenge tatali'isi'a ta mitema se'i sou ipala'alixu 'ilixonu la uasi. 64 qNgingi ngelomu lexe Anu muvikala masua mulai noxou Lataua. Ngingi ngaxavutala loxovaa? Nenge ta'oxo ma'ia ane noxou?”
Ane'i latala mikolinu aloxo 'o, “Anu mususu ane ne. Anu usoli.” 65Ane'i mivikala aloxo ne xe mukalu, la se'i misoko sou mituvesou. Misu'asou iou xe mivau. La mivikalanu aloxo 'o, “Nalemo lexe 'ei ane muvene?” Ia, ta mitema sou isaxila'u tani mino'u sou misavasavalou.
Pita Musingisou Iesu
(Mat 26:69-75; Luk 22:56-62; Ioa 18:15-18, 25-27)
66Ta mitema mi'oxo'oxonu Iesu aloxo ne, ia Pita ne, anu muxolu no nano no vimelusou tani, la sema sou xaixai vile noxou kisi'a ta aili'i, mine'e noxou. 67La mimaisou Pita uxoxolu utu'e navu, la sema ne mimatakisou la mivikalanu aloxo 'o,“Nini kalumo, ngingi ngongou Iesu sie Naseleti ngexolu ane.”
68Ia anu musingisou lexe, “Eni alavusou vaikala ane nini nelemolu ne, uasi.” Anu muvikala aloxo ne xe mukalu, la sou anu mulaa muuatulai no aitengaxu tani.
69Sema ne, mimaisou, la mivikalane'i ane'i ane itulutulu 'alai noxou aloxo 'o, “Anu ne, vile noxi'a ane.” 70Ia anu musingisou lexe uasi la.
Mixolu sevile kitu'a, la ta mitema ane mitulutulu 'alai noxou ne, mivikalanu aloxo 'o, “Manina, nini vile noxi'a ane, xo nini itema sie Xalilaia ane.”
71Ia Pita muvikala pekia'u aloxo 'o, “Manina teitexi, eni alavusou itema e ngingi ngalelemolu ne uasi. Lexe eni akalavoingengi, la laixe lexe Lataua ukalusilosi.”
72Anu muvikala aloxo ne, xe mukalu la alaxu vilesisi 'o, la koko'a mu'ava alaxu tameisou. La Pita muxavutalanu vaikalau Iesu lexe koko'a u'ava alaxu tameisou uao, ia anu usingisou alaxu tatalu lexe ulavusou uasi. La Pita ne, mutaloxu iii sou mutama.
Copyright information for
ATA