Mar 4 | ATA | STEP | Xe ili'i, la Iesu musukusou tuala mo tani e Anu muxoxolu no anu ne, io Anu musuku mulai no kupa ne Xalilaia sou musoko sou ulosieixu ta mitema lavulavu la. La ta mitema tavu'alo misevile mine'e mixali noxou mole mitaataasou, la sou Anu muili'e mutelai no uaxa sou mutalupexa no anu, ia ta mitema mita'olu no nano no kupa pa'umolu.

a 4:1Mak 3:7-9; Luk 5:1-3

b 4:2Mat 13:34; Mak 4:33-34

c 4:12Ais 6:9-10; Apo 28:26-27

d 4:19Mat 19:23-24

e 4:21Mat 5:15; Luk 11:33

f 4:22Mat 10:26; Luk 12:2

g 4:24Mat 7:2

h 4:25Mat 13:12, 25:29; Luk 19:26

i 4:29Ioe 3:13; Pal 14:15

‏ Mark 4

Vaikala Latilovo sou Itema Usu'a Ovu Ngiaxu

(Mat 13:1-9; Luk 8:4-8)

1 ^aXe ili'i, la Iesu musukusou tuala mo tani e Anu muxoxolu no anu ne, io Anu musuku mulai no kupa ne Xalilaia sou musoko sou ulosieixu ta mitema lavulavu la. La ta mitema tavu'alo misevile mine'e mixali noxou mole mitaataasou, la sou Anu muili'e mutelai no uaxa sou mutalupexa no anu, ia ta mitema mita'olu no nano no kupa pa'umolu. 2 ^bMulosi'a lavulavu no anu mii piena misevile. Lavulavu ane Anu mulosi'a ne, anu mulailixu no anu vaikala latilovo mukalusi. No nano no anu vaikala noxou ne, Anu muvikala aloxo 'o, 3 “Ngalomu! Itema vile mulai no xaixu sou usu'anu ovu ngiaxu, 4 la se'i mulapalapau no vote'i, la ta ngiala mine'e mi'ou mukalusi. 5 Xe se'i mulapalapau no lia lavolavo'o, la mupau palea xo lia ne muxolu se teitexisi. 6 Ia aso muiei, la muxalo alaxu vilesisi xo uli'uli'u ulai no lia manina uasi. 7 Se'i mulapalapau mulu'e no xuxua tanutanu, xe muleme la xuxua ne mukupokuponu mole unene'a ua. 8 Xe se'i ne, mulapalapau mulu'e no lia ane laixe, la muleme muxali tila sou munene'a. Se'i muxalixu ngiaxu mavulovexa tatalu, xe se'i itemaxu tatalu xe se'i la itemaxu ta'uve.”

9 Iesu muvivikala latilovo mulai noxi'a ta mitema aloxo ne xe mukalu, la sou Anu muvikalane'i aloxo 'o la, “Itema ane anu mulavu lexe anu sangalou a uxoxolu sou ulolomu no anu, la laixe lexe anu ulomusou vaikala ane ne no anu.”

10 Ta mitema milailai mukalu, ia Iesusi ilo'a ane'i e mavulovexa vile mo mulelia tamei xe ta mitema se'i e ilo'a ixoxolu ne, mine'e noxou sou mitali'isou lexe tava'u loxovaa la sou anu uvikala no anu vaikala latilovosi. 11 La sou Anu muvikalane'i aloxo 'o, “Ngingi ne, Lataua mulosiengixu laaxu vaikala mutalume sou saxisaxila'u noxou. Ia ta mitema va'axu ilomusou vaivaikala latala ne no anu vaikala latilovosi. 12 ^cMo sou,

‘ane'i imamalei ia imaisou mii vile uasi,
mo ilolomu ia ilavusou mii vile uasi,
mo ixiunu opone'i sou Lataua uxiu tumalouu 'ili'ilixo masua noxi'a uasi!’”
13 Xe Anu muavuti la muvikalane'i aloxo 'o la, “Vaikala latilovo e eni elemolu 'o, ulamana no xavutalamengi uasi? Ngingi nga'oxo aloxo ne, la ngalavu no anu vaikala latilovo se'i laaxu a loxovaa? 14 Vaikala latilovo e eni elemolu 'o, anu laaxu aloxo 'o. Itema sou xai e musu'anu ovu ngiaxu ne, anu musu'anu vaikala noxou Lataua. 15 Vaikala ane anu musu'anu xe mulapau no vote'i ne, anu aloxo ta mitema ane milomusou vaikala noxou Lataua, ia Satani mune'e muxexenu vaikala ane Lataua mutounu no opone'i alaxu vilesisi. 16 Xe vaikala ane anu musu'anu xe mulapau no lia ane lavolavo'o ne, anu aloxo ta mitema ane ilomusou vaikala noxou Lataua la ipasipaa sou ino'u xe i'osasou. 17 Ia tava'u xo uli'uli'a uasi, la vaikala ne uxoo maxuveni uasi. Xe no voxo ane loxo tu'utu'umaxu se'i uxali noxi'a xo ane'i mino'u Lataua vaikalau no opone'i, la ane'i ilapau alaxu vilesisi. 18 Xe vaikala ane anu musu'anu xe mulapau no xuxua tanu ne, anu loxo ta mitema ane ilomusou vaikala noxou Lataua ne, 19 ^dia ane'i ixavutala piena no anu mauli ilou xoluxolu no lia 'o, mo imasaxa lexe i'a lavuluti piena mo opone'i uisuisuxu mimii iouiou, la sou anu mimii ane ne uva'usou vaikalau Lataua la unene'a uasi. 20 Ia vaikala ane musu'anu xe mulapau no lia ane laixe ne, anu loxo ta mitema ane ilomusou vaikala noxou Lataua, la ino'u mo itetelisou la inene'a. Se'i muxalixu ngiaxu mavulovexa tatalu, xe se'i itemaxu tatalu, xe se'i la itemaxu ta'uve.”

Telu Utulu Teitexi no Valovalosou sou Ukaa

(Luk 8:16-18)

21 ^eXe Anu muavuti la muvikalane'i aloxo 'o la, “Loxovaa, ngingi ngane'enu telu sou ngatalumeiou no anu pupuni? Mo ngamulaxu no luu laaxu? Uasi, ngatulusou teitexi no valovalosou sou ukaa. 22 ^fXo mii ma'ia ane mutalume ne, ulai ili'i la upala'a. Xe mii ma'ia ane misu'asou mo mitalumeiou ne, ulai ili'i la upala'a. 23 Lexe itema ane mulavu lexe anu sangalou a uxolu sou anu ulolomu no anu, la laixe lexe anu ulomusou vaikala ane ne no anu.”

24 ^gAnu musolonu sou muvikalane'i aloxo 'o la, “Vaikala ma'ia ane ngalomusou ne, ngalomusou laixe mo ngaxavutala no anu laixe. Mo mii ma'ia ane ngingi ngalosi'a ta mitema ne, ulai ili'i la ikolinu sou ilosinge, mo ilosinge se'i uai utelo no latanu la. 25 ^hXe 'ei ane iu mimii tavu'alo uai, la ilosou se'i uai utelo no latanu la. Ia 'ei ane iu mimii se kitu'asi, la ixexeenu noxou.

Vaikala Latilovo sou Ame Ngiaxu Muleme Laixe

26 Xe muavuti la muvikalane'i aloxo 'o la, “Saxisaxila'u noxou Lataua ne, anu aloxo itema vile utapunu ame ngiaxu no lia. 27 No 'olovoxo, la anu uai xe no kakau la anu utulu sou u'oxonu xaixai se'i no aso, ia ame ngiaxu e anu mutapunu ne, mupau mo muleme. Ia anu itema ne ulavusou lexe ame ngiaxu ne mupau mo muleme a loxovaa uasi. 28 Lia molusi mu'oxonu ame ngiaxu ne muleme, la sou munene'a. Ame ngiaxu ne muleme, la sou mumuxaxu aiinu xe ngiangiaxu, xe ili'i la sou temanu. 29 ⁱIa ili'i xe anu lingamo, la sou anu itema ne ulai u'elexu sou upitanu xo voxosou a muxali ne.”

Vaikala Latilovo sou Masitati

(Mat 13:31-32; Luk 13:18-19)

30 Xe Iesu muavuti la muvikala aloxo 'o la, “Nenge talemolu saxisaxila'u noxou Lataua lexe anu a loxo ma'ia mo tatilovosou no anu vaikala ma'ia?” 31 La sou muvikalane'i aloxo 'o, “Saxisaxila'u noxou Lataua ne, aloxo mii e ilemolu lexe masitati ngiaxu. Masitati ne, ngiaxu kitu'a manina, itotou ulu'elai no lia tanu. 32 Ia loxo itounu xe uavuti utelo la uleme toxoxa'a misevile, la uuaulixu la'ilali iouiou ane mitounu no xai ne. Avoavolu ne toxotoxoxa'a mo uialaiala ulai no ale mole ta ngiala ine'e sou ita'ota'olu no maimaixu.”

33 Iesu muvikalane'ixu vaikala noxou Lataua no anu vaikala latilovo tavu'alo aloxo 'o ane mumomomo no 'a xavutalai'a. 34 Uvikalane'ixu vaikala vile vitanisi uasi, uvivikalane'i ne uvikalane'i no anu vaikala latilovosi. Ia loxo anu ilo'a ta molomolo noxousi, la sou Anu ululusou vaivaikala laaxu noxou ne laixe ukalusi ulai noxi'a.

Iesu Mukaitolonu Atume Toxoxa'a

(Mat 8:23-27; Luk 8:22-25)

35 Xe no 'olo'olovoxo no voxo ane ne, la Anu muvikalane'i ta molomolo noxou aloxo 'o, “Nenge'a talai loxo no kupa xalee ane vile.” 36 Xe ta molomolo noxou ne, miavuti la mi'umesi'a ta mitema te mine'e mipita sou milolomu vaivaikala noxou ne mixolu. Ia ane'i milai mitelo noxou Iesu no uaxa ane Anu uxoo no anu. Uaxauaxa se'i kalumo a ilo'a milai no voxo ane ne. 37 Ilo'a milalai xoo xe ili'i, la atume toxoxa'a muxalisi'a, la xasi mu'oki'oki tani mole lexa mu'unalai no uaxa tanu la 'ala'alai sou u'ana'ana. 38 Ia Iesu ne, mulai mutixala no anu tixalasou mo muai no uaxa ta'u. Xe ta molomolo noxou miavuti, la mitulusou la mivikalanu aloxo 'o, “Itema sou ulosixe lavulavu, nenge asou ta'uo'uo, loxovaa taneninenge uasi?”

39 Xe Anu muavuti la mutulu sou mukaitolonu atume ne, xe muvikalanu xasi lexe, “Naxoo tasiau! Mo naai se'isisi!” La atume ne, tasiau xe xasi ne, muai se'isisi.

40 Xe muavuti la muvikalane'i ta molomolo noxou aloxo 'o, “Loxovaa ane ngingi nge'ume malaxo loxo 'o? Loxovaa ngingi ngamuxamuxaxu tangengi noxilo uasi?”

41 Ia ane'i ne, mi'ume misevile mole itali'isi'a ngatongato'o lexe, “Itema ano 'o ne, itema ma'i loxo 'o? La sou atume ilou xasi milomuxusi 'o!”