Mat 12 | ATA | STEP | No voxo Tavuna vile la Iesu ilo'a ta molomolou mimuamua'i no nano no xai sou uiti. Ilo'a mimuamua'i milai la ta molomolou misolinga'a. Xe miavuti la mi'elexu uiti temanu se'i la mi'ou.

1 ^aNo voxo Tavuna vile la Iesu ilo'a ta molomolou mimuamua'i no nano no xai sou uiti. Ilo'a mimuamua'i milai la ta molomolou misolinga'a. Xe miavuti la mi'elexu uiti temanu se'i la mi'ou. 2 ^bXe ta Palisaio mimaisi'a la mitali'isou Iesu aloxo 'o, “Ae, loxovaa la sou ta molomolomeni mi'oxonu 'ilixo ane umomomo sou ta'oxonu no voxo Tavuna uasi 'o?” 3 ^cXe Iesu muavuti la mukoline'i aloxo 'o, “Xo loxovaa ngingi ngaitisou a'alo sou Deviti ilo'a ta mitema noxou e misolixa'a la mi'oxonu uasi? 4 ^dAnu mu'unalai no tani noxou Lataua la muno'u veleti e umomomo sou ta mitema vitanisi io'ou uasi ta aili'isi io'ou ne la ilo'a ta mitema noxou mi'ou. 5 ^eMo male ngingi ngaitisou vaivaikala muai no nano no anu lapuloto lexe ta aili'i ipupunu voxo Tavuna sou ixaxai no nano no tani sou lalotu uasi? Ane'i mi'oxonu aloxo ne la anu masua uasi. 6 ^fLa sou eni avikalangengi manina lexe vile anu tila no anu taasou lalotu ne anu a uxoxolu 'o. 7 ^gIa lexe ngingi ngelavusou vaikala 'o laaxu e muai no nano no anu Lavuku Tavuna teinu muvikala lexe, ‘Eni amasaxai'a ta mimii nga'elaxu sou uxexeenu susu noxinge uasi eni emasaxau alauna.’ Lexe ngalavusou vaikala ne laaxu la ngingi ngamomomo sou nga'oxo masuane'i ta mitema va'axu e xoluxoluxa'a laixe ne uasi. 8 Xo Itema 'Olu ne Anu Tila sou voxo Tavuna.”

Iesu Mupamaulinu Itema Avolu Musoli

(Mak 3:1-6; Luk 6:6-11)

9 Iesu muvivikalane'i ta Palisaio ne mukalu la musuku mulai no tuala vile la mu'unalai no taasou lalotu noxi'a ta Iutaia. 10 ^hAnu mu'unalai la mumaisou itema vile avolu musoli a uxoxolu no nano ne. Ioxe, ta mitema e mixoxolu no nano no taasou lalotu ne ikamuli vote'i sou lexe i'oxonu Iesu ususu, la mitali'isou lexe, “Loxovaa lapuloto noxinge muvikala lexe umomomo sou tapamaulinu itema vile no voxo Tavuna?” 11 ⁱIesu muavuti la mukoline'i aloxo 'o, “Lexe vile no taingengi ne sipsipu vile ulapau u'unalai no taxa no voxo Tavuna, la loxovaa, anu iou uvaxau uxoxolu ne, uasi ulapunu utelo? 12 Xo itema maulixu anu mii mutila mua'ulixu sipsip. La sou lapuloto muvikala lexe nenge ta momomo sou ta'oxonu 'ilixo laixe no voxo Tavuna sou tasu'uline'i ta menexinge.” 13 Xe Iesu muavuti la muvikalanu itema e avolu musoli ne lexe, “Namexiinu avone.” Xe anu mumexiinu avolu ne muatu la avolu ne laixe alaxu vilesisi loxo ane vile 'ole. 14 ^jXe ta Palisaio mimaisou aloxo ne la milaa vilevilesi, la milai mipita sou ikamuli vote'i sou lexe ivau Iesu usoli.

Itema sou Xaixai Noxou Lataua Ane Anu Musosovosou

15 Ia Iesu mulavusou aloxo ne la Anu musuku mulai no tuala vile la. Anu mulai la ta mitema tavu'alo mimulinu la Anu mupamauline'i. 16 ^kLa mutalosi'a lexe ane'i ia'aloxu mii ma'ia e ane'i mimaisou ne mamu xe ipala'alixu mamu. 17 Anu muvikala aloxo ne sou umomomo sou vaikala mulaa no anaxu Aisaia itema sou palomatana muvikala aloxo 'o,

18 ^{l
,} ^m “Itema sou xaixai noxilo e eni esosovosou ane,
mo emasaxau misevile xo opoleli u'osasou manina.
Eni a'ana'analixu no anu Uleenu Tavuna noxilo
la ua'aloi'a ta mitema no lia 'o ukalusi no anu 'ili'ilixo mulapu.
19 Anu umomomo sou ukaitolo mo uunga uasi,
mo umomomo sou ilomusou xolinu no vote'i uasi.
20 Visoviso anu mamalaxu sou uxola la uxola ia umomomo sou anu uxolau uasi
mo lalamo e uikisou masua la ukaa laixe uasi ne utausou mo usitanoxu uasi.
Anu u'oxonu aloxo ne ulai uxali no mine anu u'oxonu 'ilixo lailaixe
ane muuliuli manina.
21 La sou no anu ualasou la ta mitema no lia ukalusi 'o
imuxaxu tane'i noxou Lataua.”

Iesu Xe Velusavelu

(Mak 3:20-30; Luk 11:14-23, 12:10)

22 Ane'i milailixu itema vile uleenu masua vile muxolu noxou la mu'oxonu iou seleveenu xe anaxu mutomu mune'e noxou Iesu, sou lexe Anu upamaulinu mo sou anu uvikala xe umalei. 23 Anu mupamaulinu itema ne la ta mitema tavu'alo mikuluke la mivikalane'i ngatongato'o lexe, “Loxovaa itema 'o anu Deviti 'olu?” 24 ⁿIa ta Palisaio milomusi'a ilelemolu la mivikalane'i aloxo 'o, “Anu itema anu 'o ukusai'a ta uleenu ta masumasua no anu xavi noxou Velusavelu anu tila noxi'a ta molosila.” 25 Ia Iesu mulavusou xavutalai'a la muvikalane'i no anu vaikala latilovo aloxo 'o, “Lexe tuala xalee tila vile ta mitemasou ikalipalane'i sou i'oto'oto ngatongato'o noxi'a, la tuala ne umomomo sou utulu pekia'u uasi. Mo tuala tila vile xe ta mitemasou tani vile ikalipala xe i'oto ngatongato'o la ane'i imomomo sou ixolu laixe uasi. 26 La sou loxovaa Satani umomomo sou ukusau Satani la? Lexe Satani ilo'a ta mitema noxou ikalipala xe i'oto'oto ngatongato'o la anu xaviinu uasisi. 27 Mo lexe eni akusai'a ta uleenu ta masumasua no anu xavi noxou Velusavelu, la sou no anu xavi noxou 'ei ane ta mitema noxinge ikusai'a ta uleenu ta masumasua no anu ne? La sou ta mitema noxinge ivikalangengi lexe vaikala noxinge ne temanu uasi. 28 ^oIa lexe eni akusai'a ta uleenu ta masumasua no anu xavi Uleenu Lataua, la sou ngingi ngalavusou lexe saxisaxila'u noxou Lataua ne a mune'e noxinge 'o. 29 Mo lexe itema vile umasaxa lexe u'unalai no taasou itema la'ia vile ne mo utaxusou mimii noxou la anu laixe lexe usakisakiinu itema ne tei 'o. Xe ukalu la sou anu u'unalai no tani sou upakalinu miumiu. 30 ^p'Ena'ei ane noxilo uasi la anu u'apixo mo 'ei ane usu'ulileli sou upitane'i ta mitema uasi ne la anu sou ukusai'asi.” 31 ^qMo Iesu muavuti la muvikalane'i la aloxo 'o, Eni avikalangengi manina lexe Lataua umomomo sou uxiu tumalou 'ili'ilixo masumasua mo vaikala masumasua noxi'a ta mitema ane i'oxonu ulai noxou. Ia anu ane uvikala masua ulai noxou Uleenu Tavuna ne, la Lataua umomomo sou uxiu tumalou uasi. 32 Mo 'ena'ei ane uvikala masua noxou Itema 'Olu la Lataua umomomo sou uxiu tumalou. Ia lexe 'ei ane uvikala masua ulai noxou Uleenu Tavuna ne, la Lataua umomomo sou uxiu tumalou uasisi manina. Vaimomo 'o xe ili'i la susu noxou ne uxolu avile.

Ovu Ilou Ngiaxu

(Luk 6:43-45)

33 ^rLexe ngingi natounu ovu laixe la ngingi nga'elexu ngiaxu laixe. Ia lexe ngingi ngatounu ovu masua la ngingi nga'elexu ngiaxu ne masua kalumo. Xo ovu ne nenge tatongonu no anu ngiaxu kalumo. 34 ^sNgingi lasile molosila ta 'olu, la sou ngingi ngamomomo sou nga'oxonu vaikala laixe a loxovaa e ngingi 'ilixo masumasua mu'ana'ana noxingesi 'o? Xo mii ma'ia ulaa no anangenge ne upala'alixu mii ma'ia ane mu'ana'ana no nano no opongengi la sou anu mulaa muatu ne. 35 No anaxu itema laixe la ulaanu mii ma'ia lailaixe ane mukopinu muai no nano no tanu. Xe no anaxu itema masua la ulaanu mii ma'ia masumasua e mukopinu muai no nano no tanu. 36 La sou eni avikalangengi manina aloxo 'o, ulai ili'i no anu voxo sou tatulu no anu vaivaikala la ane'i ino'u ulusou vaikala masumasua e mulaa no anaxa'a ne. 37 Xo no anu vaivaikala noxine molu upalalixene lamana no mine tatulu no anu vaivaikala. La sou no anu vaivaikala noxinesi ne molu upala'alixene lexe nini itema laixe xe itema masua.”

Sosovo Vile La Uasi, Noxou Ionasi

(Mak 8:11-12; Luk 11:29-32)

38 ^tLa sou ta Palisaio ilo'a ta tisa sou lapuloto miavuti la mivikalanu Iesu aloxo 'o, “Tisa, nexi temasaxa lexe nini na'oxonu sosovo vile mo nexi tamaisou.” 39 ^uIa Anu muavuti la mukoline'i aloxo 'o, “Ta mitema sou susu mo ta mitema ilavusou i'oxo'oxonu 'ili'ilixo sou vote'i vaimomo 'o, ne imasaxa lexe imaisou sosovo vile. Ia umomomo sou imaisou sosovo vile uasi. Ia anu sosovo vilesisi ane noxou itema sou palomatana Iona nesi. 40 ^vLa sou anu iou vilesisi a loxo Iona muxolu voxo tatalu xe 'olovoxo tatalu no nano no opoonu sinana tatila ne, la Itema 'Olu kalumo uai voxo tatalu xe 'olovoxo tatalu no nano no lia tanu. 41 ^wNo anu voxo sou Lataua utulusi'a ta mitema no anu vaivaikala la ta mitema ne Ninive iavuti la ilea anaxa'a ulai noxi'a ta mitema e mipaa vaimomo 'o. Xo ane'i no voxo ane Iona mulai xe mua'aloxu vaikala noxou Lataua mulai noxi'a la ane'i mixiunu opone'i. Xo vaimomo 'o itema vile anu ualasou uaulixu Iona. 42 ^xMo no anu voxo ane ne kalumo la tatananu tuala ne Seva (ane sema) ilo'a ta mitema e mipaa vaimomo 'o itulu no anu vaivaikala. La ane'i iteloo vaikala noxi'a ta mitema e mipaa vaimomo 'o. Xo ane'i me'a no paxa no lia pa'umolu no xalee muto'o 'ole, ane'i milutu mine'e sou milomu no anu vaikala sou lavulavu noxou Solomoni. Ia vaimomo 'o ne Itema vile anu mutila noxou Solomoni 'a uxoxolu 'o. 43 Ioxe Iesu muavuti la musolonu vaivaikala la aloxo 'o, Lexe uleenu masua vile ulaa uatu noxou itema, la anu ulai uxixaoxao no tani 'esi'esi sou ukakamuli tanixu sou lexe uxolu mo uma'ila no anu la uxalisou uasi, 44 la anu molu uvikalanu lexe, ‘Alivu mo alai no tani e e'umesou 'ole.’ Ia anu une'e xe umalei lexe tani no nano ne misilapanu malemalenge mo mimii ne muta'olu laixe, ia evile uxolu no nano no anu uasi. 45 ^yIa ulai ukasi noxi'a ta uleenu ta masumasua muxatele tamei e 'ilixone'i masumasua manina mua'ulixu 'ilixo noxou ne. La ilo'a ilai ixolu no nano no tani ne. La sou xoluxoluxu itema ne uxali masua no anu xoluxoluxu tei. Anu iou vilesisi aloxo ne uxali noxi'a ta mitema sou i'oxo'oxonu 'ili'ilixo masumasua e mipaa vaimomo 'o.”

Iesu Nenu Ilo'a ta Vimovimou

(Mak 3:31-35; Luk 8:19-21)

46 No mine Iesu uao uvivikalane'i ta mitema o la nenu ilo'a ta vimovimou mine'e mitulu no ale sou imasaxa lexe ivikala noxou. 47 La sou itema vile muvikalanu lexe, “Nenine ilo'a ta vivine 'a itutulu no ale sou imasaxa lexe ivikala noxine.” 48 Xe Anu muavuti la mutali'isi'a lexe, “Nenilo 'ei ne, mo ta vivilo ta 'ei ne?” 49 Xe muavuti la mutolosou avolu mulai noxi'a ta molomolo noxou la muvikala lexe, “Ngamaisi'a nenilo ilo'a ta vivilo ane'i ane? 50 ^zXo 'ena'ei ane umulinu masaxa noxou mamilo teitexi no opo loxotolo la anu vivilo xe vivilo sema xe nenilo ane.”