Matthew 18
'Ei Anu Tila no Anu Saxisaxila'u Noxou Lataua Teitexi no Opo Loxotolo
(Mak 9:33-37; Luk 9:46-48)
1 aNo anu voxo ane ne la ta molomolo noxou Iesu mine'e noxou la mitali'isou lexe, “'Ei anu mutila no anu saxisaxila'u noxou Lataua teitexi no opo loxotolo?” 2Xe Iesu muavuti la mu'avalou molomolo kitu'a vile mune'e la mitulusou no taine'i. 3 bLa muvikalane'i aloxo 'o, “Eni avikalangengi manina aloxo 'o, lexe ngingi ngaxiu mo ngaxali loxo ta molomolo ta kitukitu'a uasi la umomomo sou nga'unalai no anu saxisaxila'u noxou Lataua teitexi no opo loxotolo uasisi manina. 4La sou lexe 'ei ane utaloxolixu loxo molomolo kitu'a 'o la anu utila no anu saxisaxila'u noxou Lataua teitexi no opo loxotolo. 5 cMo 'ei ane u'osa sou usu'ulinu molomolo kitu'a vile no ualasilo aloxo 'o xo anu muxavutalaleli, la anu mu'oxonu noxilo. 6Ia lexe itema vile uolexu vile noxi'a ta molomolo e mimuxaxu tane'i noxilo ne isusu no anu 'ilixo masua vile, la anu laixe lexe isakii lavo'o kulu vile toxoxa'a no xolanu mo ileanu ulu'elai no lautu no luaki lixinu mo u'uo'uo. 7La sou ngingi ta mitema no lialia 'o ngasaxilainge laixe no anu tu'utu'umaxu ane sou uxali noxinge, xo mimii tavu'alo sou lialia 'o u'oxone'i la ilapau la i'una no anu susu. Anu susu ne uxali aloxo ne. 8 dIa lexe avone vile ilou tava'ine vile ususulixene, la naxotosou uxexee mo nasu'anu. Anu laixe lexe na'unalai no nano no anu tuala sou mauli no 'a tava'ine vilesisi xe avone vilesisi. Loxo 'o io avone ta tamei xe tava'ine ta tamei uxolu la ileaneni ulu'elai no anu navu e ukakaa utotomu mo kaluxu uasisi manina. 9Mo lexe ieni vile ususulixene la naluvunu uxexee mo nasu'anu. Anu laixe lexe nini na'unalai no tuala sou mauli no ieni vilesisi. Loxo 'o io ieni ta tamei uxolu la ileaneni ulu'elai no anu navu e ukakaa utotomu mo kaluxu uasisi manina.”Vaikala Latilovo sou Sipsip Tatananu Muxovulaunu
(Luk 15:3-7)
10 eIesu musolonu vaivaikala noxou la muvikala la aloxo 'o, “Ngasaxilainge laixe, loxo 'o io ngamaisi'a ta molomolo loxo 'o, loxo ta mii vitanisi. Uasi. Eni avikalangengi lexe teitexi no opo loxotolo ne ta angelo noxi'a ilavusou imaisou Mamilo iou utotomu teitexi no opo loxotolo. 11 f ‘La sou Itema 'Olu mulivunoxa'a ane'i ane mixovulaune'i mine'e sou mupamauline'i.’12Mo lexe itema vile usaxila'a ta sipsip itemaxu ta'uve ia uxovulaunu vile la, ngingi ngexavutala a loxovaa? Umomomo sou anu uitalone'i ta sipsip mavulovexa muxatele tami'a mo muxatele tami'a ne ixoxolu no laxa'ilu ne ia anu ulai sou ukamulinu ane muxovulaunu ne o? Ani. 13La sou eni avikalangengi manina aloxo 'o, no mine anu uxalisou sipsip vilesisi e muxovulaunu ne la anu u'osa manina. 'Osa sou sipsip vilesisi ne utila noxi'a ta sipsip mavulovexa muxatele tami'a mo muxatele tami'a 'ole. 14Anu iou vilesisi aloxo Maminge uxolu teitexi no opo loxotolo umasaxa lexe vile noxi'a ta molomolo ta kitukitu'a ne isusu ilai va'axu uasi.”
'Ilixo sou Namomosou Vivine Mususu
(Luk 17:3-4)
15 gIesu muavuti la musolonu vaivaikala noxou la aloxo 'o, “Lexe vivine vile u'oxo masuaneni, la nini nalai noxou mo ngingisisi ngongou ngamomosou. Lexe anu ulomuxene la nini nelivunoxu. 16 hIa lexe anu ulomuxene uasi, la nalai nano'u itema vile xe uasi la ta tamei la ine'e sou imomosou. Aloxo ne mo sou no anaxa'a ta mitema ta tamei xe tatalu la imomomo sou ivalaxu vaikala. 17Ia lexe anu ulomuxa'a ta mitema ne uasi, la nalai nano'a ane'i no anu lalotu ine'e imomo sou. Ia lexe anu ulomuxa'a ta mitema sou lalotu la ne uasi, la ane'i ta mitema ane ane'i ta Iutaia uasi mo loxo itemasou uno'u lamoli noxi'a ta mitema.18 iEni avikalangengi manina lexe, mii ma'ia ane ngingi ngasakiinu no lia 'o, la anu usakii teitexi no opo loxotolo. Xe mii ma'ia ane ngingi ngalulusou no lia 'o, la Anu ululusou teitexi no opo loxotolo. 19 jMo eni avikalangengi la aloxo 'o, lexe ta mitema ta tamei noxinge no lia 'o imasaxau mii vile mo opone'i vilesisi no anu xe ilingau la Mamilo uxolu teitexi no opo loxotolo Anu ulosi'asi. 20Xo ta mitema ta tamei xe tatalu ipita no anu ualasilo la eni kalumo a axolu no taine'i.”
Vaikala Latilovo sou Itema sou Xaixai Tanuxu Menexu Uasi
21Xe no voxo ane ne la Pita mune'e noxou Iesu, la mutali'isou aloxo 'o, “Tila, alaxu ta'ei eni alulusou susu noxou vivilo vile mu'oxonu mune'e noxilo? Alaxu muxatele tamei?” 22 kIesu muavuti la mukolinu aloxo 'o, “Eni avikalaneni aloxo 'o, lexe nini namasaxa nalulusou susu noxou vivine, la nalulusou alaxu muxatele tamei uasi. Nini nalulusou alaxu mavulovexa muxatele tamei alaxu muxatele tamei (70 x 7). 23La sou saxisaxila'u noxou Lataua teitexi no opo loxotolo ne anu aloxo tatananu tuala vile mune'e sou uno'u lakolisou mii ma'ia ane anu mulosi'a ta mitema sou xaixai noxou. 24No mine anu musokou sou mumomomo sou la itema e muno'u (10,000 taranito) ia ukolinu uasi mune'e noxou. 25Ia anu itema ne umomomo sou ukolinu lamoli ne uasi. La sou tila noxou itema ne muavuti la muvikala lexe, ngano'a ilee semau mo ta 'olu xe ta miumiu ukalusi ne mo ngasovane'i, la sou lamolisi'a une'e ukolinu lamoli noxilo. 26Ioxe itemasou xaixai ne mulomu sou vaikala ne la mulapau mulu'elai muxola'u tava'u vo'uxu no tava'u tatananu tuala ne la mukatunu lexe, ‘Nini tanenixo mo nalosilo voxo se'i la, la sou eni akolinu lamoli ne ukalusi.’ 27Tila noxou itemasou xaixai ne mumaisou aloxo ne la anu tanuxu. La sou anu muavuti la muvikalanu lexe, umomomo sou nakolinu uasi la mupalusou mulai. 28Ioxe itema ne mulai no ale la mumaisou menexu vile e muno'u lamoli se'i (100 Denalia) noxou ia ukolinu uasi la mukasi noxou la mukapilaxu pekia'u la muvikalanu lexe, ‘Nini napalea nakolinu lamoli noxilo.’ 29La sou itema ne menexu muavuti la mulapau mulu'elai la muxola'u tava'u vo'uxu no lia la mukatunu la muvikalanu lexe, ‘Nini tanenixo mo nalosilo voxo se'i la, la sou eni akolinu.’ 30Ia itema ne ulomuxu menexu ne uasi, la mulai mumuxaxu menexu ne no taasou navunavu umomomo anu ukolinu lamoli noxou. 31No mine ta menexu mimaisou 'ilixo e menexi'a mu'oxonu ne la opone'i tu'umaxu manina. Xe miavuti la milai mia'aloxu noxou tilasi'a. 32Tatila noxou itema ne mulomusou aloxo ne la mu'avalou itema ne mu'una la muvikalanu lexe, ‘Nini itema sou xaixai masua. Tei la nini netama noxilo la eni e'oxonu 'ilixo laixe noxine la nakolinu lamoli toxoxa'a noxilo uasi. 33Loxovaa la nini tanenixu menexine ne loxo eni e'oxonu noxine ne ua.’ 34 lLa sou tila noxou ne lai'axu la sou mulai mumulaxu no taasou navunavu ulai uxali no mine anu ukolinu lamoli ne ukalusi. 35 mLa sou mamilo uxolu teitexi no opo loxotolo u'oxonu 'ilixo iou vilesisi aloxo ne noxinge. Lexe ngingi ngaxiunu tumalingeu susu noxi'a tavivinge no nano no opongengi manina.”
Copyright information for
ATA