Matthew 9
Iesu Mupamaulinu Itema Vile Vasimolu Musoisoli
(Mak 2:1-12; Luk 5:17-26)
1 aIesu mutelo no uaxa la mulai no kupa xalee levi la mulai muxali no tualasou ne Kapenaumu. 2La ta mitema mitavulenu itema vile vasimolu musoisoli muai no mo'esou la mine'e noxou Iesu. No mine Iesu mumaisou lexe ta mitema ne mimuxaxu tane'i manina la muvikalanu itema e vasimolu musoisoli ne aloxo 'o, “'Alixeni taneni utulu vilesisi. Eni exiunu tumalilou 'ili'ilixo masumasua noxine.” 3No mine Anu muvikalanu itema ne aloxo ne, la ta mitema sou lapuloto milomusou la xavutala muxali noxi'a lexe, “Itema ne muvikala masua noxou Lataua.” 4 bIa Iesu mulavusou xavutalai'a ne xe muavuti la muvikalane'i aloxo 'o. “Loxovaa la sou ngingi nga'oxonu xavutala masua u'oxoo masuanu tangengi 'o? 5Vaikala anevaa se'isisi sou eni alemolu, lexe eni avikala lexe eni exiunu tumalilou 'ili'ilixo masumasua noxine ne, uasi, avikala lexe natulu mo namuamua'i. 6 cEni emasaxa lexe ngingi ngalavu sou lexe Itema 'Olu muno'u xavi sou uxiunu tumalou no anu 'ili'ilixo masumasua noxi'a ta mitema.” Xe muavuti la muvikalanu itema e vasimolu musoisoli ne lexe, “Natulu mo nano'u mo'esine mo nalai no taasine.” 7La itema ne mutulu la mulivu mulai no taasou. 8Ta mitema tavu'alo mimaisou la mikuluke manina la mi'itinu Lataua ualasou no anu xavi ane Anu mulosou itema ne.Iesu Mu'avalou Mataio
(Mak 2:13-17; Luk 5:27-32)
9Xe Iesu mumuamua'i mulai la, la mumaisou itema vile ualasou lexe Mataio uxaxai no anu tanisi'a ta mitema sou inono'u lamoli. Iesu muavuti la muvikalanu lexe, “Nane'e mo namulileli.” Xe Mataio muavuti 'o la mumulinu. 10Xe ili'i no mine Iesu mulai sou u'ani no tani noxou Mataio, la ta mitema sou ino'u lamoli tavu'alo mo ta mitema sou 'ili'ilixo masumasua mine'e la Iesu ilo'a ta molomolou mi'ani mipita. 11 dNo mine ta Palisaio mimaisou aloxo ne, la mitali'isi'a ta molomolo noxou Iesu lexe, “Loxovaa la sou itema sou ulosinge lavulavu ilo'a ta mitema sou ino'u lamoli xe ta mitema sou 'ili'ilixo masumasua i'ani'ani 'o?” 12Ia Iesu mulomusou vaikala noxi'a ne la sou muvikalane'i aloxo 'o, “Ane'i ane mipipienasi ilavusou ilai noxou itema sou pamauli, ia ane'i ane ipipiena uasi, ilavusou ilai noxou itema sou pamauli uasi.” 13 eIa ngalai mo ngakamulinu vaikala ane 'o laaxu laixe, vaikala ne muai no nano no anu Lavuku Tavuna teinu noxou Lataua muvikala lexe, “Eni masaxa tatila noxilo lexe ngingi ngaalaunasinge ngatongato'o ia amasaxau mii e nga'elaxu uasi. Xo eni xaixai noxilo aloxo 'o, eni ene'e sou a'avali'a ane'i ane milapu uasi, ia eni ene'e sou a'avali'a ane'i ane i'oxo'oxonu 'ili'ilixo masumasua.”Talitali'i sou Pelemu
(Mak 2:18-22; Luk 5:33-39)
14 fAlaxu vile la ta molomolo noxou Ioanesi mine'e noxou Iesu la mitali'isou aloxo 'o, “Loxovaa la nexi noxi'a ta Palisaio ta pelemu ia ta molomolo noxine ilavusou ipelemu uasi 'o?” 15La sou Iesu muvikalane'i aloxo 'o, “Lexe maulu vile sou utaula'i alavua, la male ta menexu opone'i tu'umaxu uasi, xo no voxo ane anu ilo'a ixolu 'o uasi, ia ili'i ane'i inou itema ne ulai ukalu la anu ilo'a ta menexu ixolu la ua, la sou ane'i ipelemu sou no anu la'ilali. 16Lexe tokolomo veveeni vile teinu ukakaa la itema vile umomomo sou uno'u lavalava xasixu alavua ia ulai usimenu vaxa no anu uasi. Xo lavalava xasixu alavua ne ulapunu tokolomo veveeni ne la u'oxonu ukakaa tatila la. 17Mo itema vile umomomo sou usixolonu uaini alavua u'unalai no anu uaini vexasou teinu uasi, xo maasi la ukakaa la uaini unixi uatu la u'oxonu uaini xalusou ne ukakaa la masua avile. La sou inixi'u uaini alavua u'una no anu uaini alavua vexasou la anu uxali laixe.”Iesu Mupamauline Molomolo Vile Misoli Xe Sema Vile Mikasou Iesu Tokolomou
(Mak 5:21-43; Luk 8:40-56)
18No mine Iesu uvivikalane'i ta molomolo noxou Ioanesi, la itema sou usaxila'u taasou lalotu mune'e muxola'u tava'u vo'uxu mulu'elai no talaxu Iesu la muvikalanu lexe, “'Alixeni sema misoli 'alalaese 'o la sou nane'e mo namulaxu avone no vasimele mo sou ane imauli la.” 19Xe Iesu muavuti la mumulinu la ta molomolou kalumo mimulinu. 20 gAne'i mimuamua'i milai la sema vile ne sialu ulu'e noxie tauu ie mavulovexa mo mulu'e lia tamei mimuamua'i mine'e no talou Iesu la mivikala no tane lexe, “Lexe eni akasou tokolomousi la eni laixeleli.” La sou ane milutu milai mikasou tokolomou. 22Ia Iesu iou muxiu la mumaisie sema ne la muvikalane lexe, “'Alixeni, taneni utulu vilesisi xo muxamuxaxu taneni noxine si'a mupamaulineni.” La sema ne laixene ane 'alalaenesi. 23Xe no mine Iesu mulai mu'unalai no tani noxou itema sou usaxila'u lalotu, la mumaisi'a ta mitema itautaunu vei xe ta mitema e mine'e mipita sou soli ne itatama, la nalolomu uasisi manina. 24Anu muavuti la muvikalane'i aloxo 'o, “Ngalailai. Molomolo ne isoli uasi ane miai ane.” Ia ane'i milomusou aloxo ne la mikekeiou. 25Xe ili'i no mine ta mitema milailai no ale mukalu, la Anu mulai mukasi vaxa no avole molomolo ne, la mutulusie la ane mitulu. 26La a'alosou mii ma'ia ane Iesu mu'oxonu ne mulai no xalee tuatuala mukalusi.Iesu Mupamauline'i ta Mitema Tamei Ie'i Seleveenu Xe Vile Anaxu Mutomu
27 hIesu musuku no tuala ane ne sou mumuamua'i mulai ia ta mitema tamei ie'i seleveenu mimulinu la mi'ava aloxo 'o, “Nini Deviti 'ilusunu, nini taneninexe noxou.” 28Anu mu'unalai no tani la sou ta mitema tamei e ie'i seleveenu ne mine'e noxou, la Iesu mutali'isi'a ilou aloxo 'o, “Loxovaa ngingi ngongo'u ngemuxamuxaxu tangengi lexe eni amomomo sou a'oxo mii ane 'o?” La ane'i ilou mikolinu vaikala lexe, “Aani Tila.” 29La sou Iesu mukasivaxa no ie'i ilou la muvikalane'i aloxo 'o, “Ngingi ngongo'u ngemuxamuxaxu tangengi noxilo aloxo ne la sou mii ane ne anu uxali noxinge ngongo'u.” 30 iLa ie'i ilou mukaa mo lamana laixe. La Iesu muvikalane'i ilou pekia'u aloxo 'o “Ngongou ngaa'alo mo evile ulavu no anu mii ane 'o uasisi manina.” 31Ia ane'i ilou milai la mia'aloxu mii ma'ia Iesu mu'oxonu noxi'a ilou la a'alo ne mulai no xalee lia tila mukalusi. 32No mine ane'i ilou miuatulai la itema vile uleenu masua mua'aisou mo ulavusou uvivikala uasi mino'u mi'unanu noxou Iesu. 33 jLa Iesu mukusau uleenu masua ne la itema e uvivikala uasi ne muvikala. Xe ta mitema mimaisou la mikuluke manina, la mivikala lexe, “Mii vile aloxo 'o uxali mo tamaisou tatei ne Isilaeli uasi.” 34 kIa ta Palisaio mivikala lexe, “Anu ukusai'a ta uleenu ta masumasua no anu xaviinu Velusavelu ane.”Ta Mitema sou Xaixai ta Ta'eisi
35 lIesu mulai muxixaoxao no tuala ta tatila xe no tuala kitukitu la mu'unalai no taasou lalotu la mulosi'a lavulavu, xe mua'aloxu a'alo lailaixe sou saxisaxila'u noxou Lataua. Mo mupamauline'i ta mitema pipiena iouiou mu'oxone'i. 36 mIa no mine Anu umaisi'a ta mitema tavu'alo la tanuxa'a xo ane'i mixolu ne mixovulaulausi, xe mixolu masua loxo ta sipsip tatanane'i uasi. 37 nLa muvikalane'i ta molomolo noxou aloxo, “Xai lingamo mukalu ia ta mitema sou ikokoli tapiena uasi. 38La sou laixe lexe ngingi ngalinga noxou Tila sou xai ne mo upalusi'a ta mitema sou xaixai la sou ine'e ikokoli no xai ne.”
Copyright information for
ATA