Philippians 3
'Ilixo Mulapu Maninasou
1Ioxe, ta vivilo noxou Iesu. Eni avikalangengi aloxo 'o. Nga'osa noxou Tila! Vaivaikala ano 'o, ngingi ngelomusou ia eni atotosa sou akaukavunu la uasi, xo anu sou usu'ulingengi.2Ngingi ngasaxila'inge laixe noxi'a ta mitema loxo ta a'aa mo ngasaxila'inge noxi'a ane'i ane i'oxo'oxonu 'ili'ilixo masumasua ilo'a ane'i ane ikalavoi sou ixotoxotosou vasime'asi. 3 aIa nengesi xooxoo mungaasinge manina. Xo nenge talotu noxou Lataua no anu Uleenu, mo nenge ta'itinu Kalisito Iesu ualasou xe nenge tamulaxu tanenge no anu mii ma'ia ane nenge ta'oxonu uasi. 4 bIa eni amulaxu taleli no anu mii ma'ia ane eni a'oxonu. Ia mimii tavu'alo no lia 'o a uxolu sou amulaxu taleli no anu.
Ia lexe evile uxavutala lexe mimii se'i a uxolu sou anu umulaxu tanu no anu, la anu umomomo noxilo uasi. Xo noxilo ne, tavu'alo manina. 5 cVile aloxo 'o. Nenilo mivo'oleli xe voxo muxatele tatalusou, la xooxoo mungaasilo. Mo tameisou aloxo 'o. Eni itema Isilaeli no anu mata Beniamini xe eni Evalaio maninasou. Eni Palisaio vile mo emulimulinu lapuloto noxou Mosesi mukalusi. 6 dXe eni emasaxau Lataua misevile la exaxai pekia'u, sou e'oxo masuane'i ta mitema ilalotu noxou Iesu mo evile uxalisou susu vile noxilo no anu lapuloto noxou Mosesi uasisi.
7 eIa eni ekalavoi lexe mimii ane ne toxoxa'a musuku noxilo, ia uasi. Vaimomo 'o eni elavu lexe mimii ne anu mii vitanisi noxou Kalisito. 8Mimii ane nesi uasi ia mimii latala mukalusi ne, eni elavusou lexe anu kalumo mii vitanisi. Xo eni elavusou mii ma'ia ane toxoxa'a musuku no mine eni elavusou lexe Kalisito Iesu anu Tila noxilo. Noxousi, la eni esu'anu mimii ane ne mukalu. Xo eni elavusou lexe mimii ane ne mii vitanisi loxo mosomoso. La sou eni esu'anu, mo sou ano'u Kalisito, 9 fmo sou nexi noxou taxolu tapita. La Lataua umoxo'ilo lexe eni itema mulapu, xo xavileli sou emulimulinu lapuloto noxou Mosesi uasi, ia eni emulaxu taleli noxou Kalisito la sou Lataua mumoxo'ilo lexe eni itema mulapu. 10 gMo eni emasaxa lexe alavusou Kalisito mo xavi no anu tulu noxou no anu soli xe nexi noxou tapita tano'u tu'utu'umaxu vilesisi mo eni asoli loxo Anu musoli. 11Mo eni eloopala manina lexe eni kalumo atulu no anu soli.
Paulo Xaviinu sou Ukalusou Saisale Noxou
12 hIa eni avikala lexe ano'u mii ane ne uao. Mo eni axali itema laixe manina uao. Ia eni xavileli sou ano'u mii ane ne ane Kalisito Iesu musosovosilo lexe eni ano'u. 13La sou ta vivilo noxou Iesu. Eni ne, melo axavutala lexe ano'u ukalusi uasi, ia mii vilesisi eni a'oxonu. Eni talelivulusiou mii ma'ia ane ili'i no tumalilo ia ieli uuli mo a'atusilo sou ano'u mii ma'ia ane uai no talaxosi. 14 iMo eni xavileli sou alai axali no anu sou ano'u lakolisou iave. Lakolisou iave ne, Lataua musosovosilo sou nexi noxou taxolu teitexi loxo Kalisito Iesu muxolu noxilo.15 jLa sou nenge latala ane xavutalamenge muxali pekia'u manina, la taxavutala loxo eni elemolu ne. Mo lexe se'i xavutalai'a vilemo la Lataua ulamanalixu no anu xavutalai'a. 16Ia mii tila manina ne aloxo 'o. No anu xoluxolu ilou muamua'inenge, la tamuli xoluxolu aloxo nenge teno'u tei ne.
17 kTa vivilo noxou Iesu, ngingi ngapita mo ngamulileli no anu mii ma'ia ane eni a'oxo'oxonu. Mo ngamalei laixe noxi'a ane'i ane imulimulinexi. 18Xo ta mitema tavu'alo iulua no anu soli noxou Kalisito no ovu valautu loxo eni evikalangengixu lalalaxu tei. Mo vaimomo 'o kalumo atamasi'a, la avikalangengixu la. 19 lAne'i ta mitema ane loxo ne, ili'i la iulua no 'a navu. Mo masaxa sou vasime'a ne muxali tila noxi'a. Mo ane'i i'itinu ualasi'a no anu mii ma'ia ane ane'i i'oxo'oxonu. Ia ili'i la imaela. Xo xavutalai'a ne, mu'ana'ana no anu mimii sou no lia 'osi. 20 mIa nenge ne tualasinge no lia 'o uasi, tualasinge manina 'a uxolu teitexi no opo loxotolo. Nenge taxolu taxomaiou itema sou pamauli teitexi molu no opo loxotolo une'e, Anu Tila Iesu Kalisito. 21 nAnu ne, xaviinu musuku la umomomo sou usaxila'u mimii latala ukalusi. La sou no anu xavi ane ne, Anu uxiunu vasimenge ane usoli xe u'ui la uxali lailaixe manina loxo anu noxou.
Copyright information for
ATA