Phili 4 | ATA | STEP | La sou ta vivilo noxou Iesu e emasaxainge musuku. Ngingi ngatulu pekia'inge noxou Tila aloxo eni evikalangengixu. Eni talelingenge mo amasaxainge lexe amaisinge la. Xo ngingi nge'oxoleli e'osa. Ngingi ta menexilo ane amasaxainge misevile! Noxingesi la anu loxo kisivalu noxilo.

a 4:11Te 2:19-20

b 4:3Luk 10:20

c 4:5Eva 10:25; Iak 5:8-9

d 4:6Mat 6:25-34; Kol 4:2

e 4:7Ais 26:3; Ioa 14:27; Kol 3:15

f 4:9Rom 16:20

g 4:132Ko 12:10

h 4:152Ko 11:9

‏ Philippians 4

1 ^aLa sou ta vivilo noxou Iesu e emasaxainge musuku. Ngingi ngatulu pekia'inge noxou Tila aloxo eni evikalangengixu. Eni talelingenge mo amasaxainge lexe amaisinge la. Xo ngingi nge'oxoleli e'osa. Ngingi ta menexilo ane amasaxainge misevile! Noxingesi la anu loxo kisivalu noxilo.

Peletoto Noxou Paulo

2 Ioxe, eni avikala pekia'u ulai noxi'a Euotia ilee Suntoke lexe opone'i uxali vilesisi noxou Tila. 3 ^bAni, eni alingaine nini menexilo manina e nengei texaxai tepita lexe nini nasu'uline'i ta sema ta tamei ne. Xo ane'i ilou ilo'a Kulemeni mo ta menexilo mukalusi mitulu no pa'umelo sou noxi'a tea'aloxu a'alo laixe noxou Iesu. Ane'i ualasi'a ne, mikaukavunu mo muai no lavuku sou mauli.

4 Ngingi nga'osa noxou Tila no voxovoxo utotomu. Mo eni avika-langengi la lexe nga'osa.

5 ^cNgaxolu se'isisi mo ta mitema imaisou 'ilixo ane laixe noxi'a. Xo anu 'ala'alai sou Tila ulivu une'e. 6 ^dXavutalamengi utulu no anu mimii tavu'alo mamu. Ia ngaxolu se'isisi mo ngakilaka xe ngalingau mimii latala e ngingi ngemasaxau noxou Lataua. Mo utotomu ne ngalemo laixe noxou. 7 ^eXo opo se'isisi noxou Lataua anu tatila musuku. Nenge umomomo sou talamana no anu uasi. Xo tamulaxu tanenge ilou xavutalamenge ulai noxou Kalisito Iesusi.

8 Ta vivilo noxou Iesu, vaikala kaluxusou noxilo aloxo 'o. Ngaxavutalanu mimii ane maninasou. Mo 'ili'ilixo ane laixesi noxou Lataua. Mo ngaxavutalanu mimii ane mulapu, mo ane malemalenga, mo mimii ane i'osasingexu, xe ane itaxangengi no anu mo i'itingengi no anu mo mii ane'i imasaxau musuku. 9 ^fNga'oxonu mii ma'ia ane ngeno'u lavulavu no anu mo ngeno'u noxilo mo ma'ia ngelomusou eni evikalangengixu, xe ma'ia ane ngemaisilo e'oxonu. La nga'oxonu 'ilixo ane ne maninasou. Mo sou Lataua e mulosinge opo se'isisi ne uxolu noxinge.

Paulo Mulemolu Laixe no Anu Su'uli

10 Eni a'osa misevile noxou Tila xo ngingi ngemaxa'u tanengi mune'e noxilo. Mo ngingi ngesolonu sou ngesaxilailo. Ia vote'i vile sou ngamaxa'u uasi tei. 11 Eni avikalangengixu mii ma'ia ne xo anu loxo eni no nano no 'a ane ne uasi. Eni eno'u lavulavu sou no anu mimii ane noxilo mo mimii tavu'alo ane muxali. 12 Eni elavusou lexe axolu a loxovaa no voxo ane eni xeni mimii uasi. Mo elavusou lexe axolu a loxovaa no mine xeni mimii tavu'alo. Mo elavusou lexe axolu a loxovaa no mine xenixo 'ani tavu'alo xe no mine asolixo. Xe elavusou lexe axolu a loxovaa no voxo sou eni xeni mimii mu'oki xe eni xeni mimii uasisi manina. La eni eno'u lavulavu no anu mii ane uxali no anu maulixo ne. 13 ^gXo eni amomomo sou a'oxonu mimii latala no anu xavi noxou Kalisito ane Anu mulosilo.

14 Ia anu laixe lexe ngingi ngasu'ulileli no anu tu'utu'umaxu noxilo. 15 ^hNgingi ta Pilipai, ngaxavutalanu voxo ane eni esokou sou ea'aloxu a'alo laixe noxou Iesu. No voxo ane eni e'umesie Makedonia la ngingisi ta mitema ilotu noxou Iesu ne, ane ngesu'ulileli mo ngekolileli. Ia lalotu ukalusi isu'ulileli sou ukolileli uasi. 16 No voxo ane eni exolu ne Tesalonika, la ngingi ngesovanu mimii ane eni emasaxau mune'e noxilo alaxu mose'i mo. 17 Anu manina, ia eni amasaxa sou ano'u mimii ane lexe ngalosilo ne uasi. Ia amasaxainge lexe nga'oxonu lakolisou noxou Lataua utelo no latanu 'ili'ilixo laixe. 18 La sou vaimomo 'o eni eno'u mimii latala mose'i la. Ia vaimomo 'o eni eno'u mimii latala ane eni emasaxau. Xo Epapulotitosi musaxanu mii ma'ia lexe ngalosilo ne anu muno'u mune'e noxilo. Anu aloxo iaiama ane tuma'u lailaixe mielaxu mulai noxou Lataua. Anu mumasaxau mo opoo mu'osasou. 19 Lataua noxilo uxaxai no anu lavuluti lailaixe noxou Kalisito Iesu sou ulosinge ta mitema noxou mimii latala umomosinge ane ngingi ngamasaxau. 20 Ta'itinu Lataua Maminge ualasou utotomu mo kaluxu uasi. Manina.

Vaikala sou Sexela Noxou Paulo Kaluxusou

21 Ngasexelaxa'a ta mitema latala noxou Lataua no ualasou Kalisito Iesu. Ia ane'i ta vivinge noxou Iesu ane nexi noxi'a texolu 'o misovanu sexela noxi'a ulai noxinge kalumo. 22 Mo ta mitema latala noxou Lataua mo ane'i ane mixolu no nano no tani tila noxou Kaisari ^{▼▼4:22Namaisou ualauala laalaaxu.} lai 'o misova sexela mu'oki noxi'a ulai noxinge. 23 Alauna mo saxisaxila'u noxou Tila Iesu Kalisito uxolu noxinge. Manina.