‏

UOLI VOLOXU ANE PAULO MUKAUKAVU MULAI NOXOU PILIMONI

Vaikala lamana

Pilimoni ne anu itema tila vile. Male anu temanu lalotu vile ne Kolosi. Itema sou xaixai vitanisi vile noxou ualasou lexe Onesimosi mu'ume la mulai muxolu to tuala tila vile. Ia no mine anu mu'ume mulai muxolu ne la muxalisou Paulo. Xe Paulo musu'ulinu la anu muno'u Kalisito no anu maulixu, la muxali itema vile noxou Kalisito.

No voxo ane ne, anu Paulo muxolu no anu sakisaki, la umomomo sou ulai umaisou Pilimoni ne uasi. Ia anu mukakavunu uoli voloxu 'o, la mulosou anu Onesimosi sou muno'u mulailixu noxou tilasou ne. No nano no anu uoli voloxu ne, la anu muvikalanu Pilimoni ne lexe ulavixu itema sou xaixai vitanisi ne mamu. Xo anu Onesimosi ne muxali itema vile noxou Kalisito ne. La sou laixe lexe anu usexelaxu mo uno'u ulivu loxo anu vimou maninasou.

A'alo muai no nano aloxo 'oVaikala lamana 1-3Vaikala sou 'osa'ila xe lakilaka 4-7Linga noxou Paulo mulai noxou Pilimoni sou Onesimosi 8-22Vaikala kaluxusou 23-25

‏ Philemon

1Eni Paulo, ane'i misakisakileli mo eni a axoxolu no taasou navunavu, xo eni amitema sou xaixai noxou Kalisito Iesu.

Nexi noxou Timoti, anu loxo vivinge noxou Iesu Kalisito, tekaukavu kaukavu ane 'o mulai noxine Pilimoni, nini menexixe maninasou ane nexi temasaxau xe nini itema sou xaixai noxixe vile. 2 ^aEni ekaukavu mulai noxine Apia kalumo, nini loxo vivixe sema xe mulai noxine Akipasi kalumo, nini loxo itema sou 'oto'oto noxixe, xo nini nexaxai noxou Kalisito Iesu loxo itema sou 'oto'oto loxo nenge nengei texaxai no anu. Mo eni ekaukavu mulai noxi'a ta mitema noxou Lataua kalumo ane ane'i ilavusou ipipita no tani noxine.

3Nexi talinga lexe alauna mo opo se'isisi noxou Lataua Maminge ilou Tila noxinge Iesu Kalisito uxolu noxinge.

Linga Noxou Paulo

4No mine eni alinga ulai noxou Lataua noxilo, la eni axavutalaneni mo avikala laixe ulai noxou uto-tomu. 5Xo eni elomu lexe nini namuxamuxaxu taneni noxou Tila noxine Iesu mo namasaxai'a ta mitema noxou Lataua ukalusi. 6Nenge nenge'a tamuxamuxaxu tanenge noxou Lataua, la sou eni alinga lexe nini namaxa'u no anu maulixene loxo nini nemuxaxu taneni noxou Lataua manina. La sou nini nalavu manina no anu mimii latala laixe ane nenge teno'u noxou Kalisito. 7 ^bNini loxo vivilo, nini nemasaxai'a mo nesu'uline'i ta mitema noxou Lataua sou imuxamuxaxu tane'i pekia'u ulai noxou Kalisito, la sou eni e'osasine misevile mo nini neavutilixo sou opoleli muai se'isisi.

Lingasou Onesimosi

8Eni amomomo sou avikalaneni pekia'u no anu mii vile sou lexe nini na'oxonu, xo nini loxo vivilo noxou Kalisito. 9Ia, eni atali'isinexu aloxo ne uasi. Atali'isine se'isisi xo eni elavu lexe nini itema sou namasaxai'a ta mitema noxou Lataua. Eni aululu mukalu, ia ane'i misakisakileli mo a axoxolu no taasou navunavu. 10 ^cIa eni Paulo atali'isinexu Onesimosi, anu muxali loxo 'alixeni. Xo anu mumulaxu tanu noxou Iesu no mine eni exoxolu no taasou navunavu. 11Tei, la anu ulavusou u'oxonu xaixai laixe sou usu'ulineni uasi, ia vaimomo anu mumomomo sou u'oxonu xaixai laixe sou usu'ulinenge nengei.

12La sou eni apalusou ulivu ulai noxine. Anu ne, e'eleli manina ane. 13No mine eni exoxolu no taasou navunavu, la emasaxa lexe anu uxolu noxilo sou uno'u tanixene mo usu'ulileli sou aa'aloi'a ta mitema a'alo laixe noxou Iesu Kalisito. 14Ia lexe nini napelemasaxaleli uasi, la eni umomomo sou amulinu masaxa noxilo uasi. Lexe nini nasu'ulileli sou nalivunoxu Onesimosi ulivu noxine, la nini na'oxonu mii ane ne, no anu masaxa noxinesi. Eni avikala pekia'u noxine, la sou nini na'oxonu aloxo ne uasi. 15Tava'u xo anu Onesimosi mu'umesine se kitu'a ne, male nini nalivulixu une'e noxine mo sou uxolu noxine utotomu. 16 ^dAnu ulivu une'e uxolu noxine, la anu loxo itema vitanisi sou napalupalusou uasi. Anu muxiu mo muxali loxo vivine e nenge temasaxau. Eni emasaxau, ia nini kalumo nemasaxau misevile, loxo itema sou ipalupalusou mo nenge vivinge noxou tila, ia anu noxine kalumo.

17La sou lexe nini menexilo sou nengei ta'oxonu xaixai noxou Tilasinge, la na'avalou Onesimosi une'e noxine loxo nini na'avalilo. 18Xe lexe anu mususu noxine mo ukolinu lamolimeni uasi, la eni akolinu. 19Xo eni Paulo melo ekaukavu ano 'o. La sou eni melo akolinu lamolimeni. Ia eni avikalaneni lexe nini nakolinu xaixai e eni e'oxo mulai noxine sou nemuxaxu taneni noxou Kalisito 'ole, uasi. 20Vivilo. Eni emasaxa manina lexe nini nasu'ulileli, xo nenge nengei tamuxamuxaxu tanenge noxou Tila noxinge. Nini na'avalou Onesimosi une'e sou uxolu noxine, la eni opoleli u'osasou Kalisito. 21Eni ekaukavu aloxo ne, xo eni elavu lexe nini nalomuxu linga noxilo mo nini na'oxonu xaixai se'i e eni atali'isinexu uasi.

22 ^eAvikalangengi no anu mii vile la. Eni alingainge sou ngingi ngakilakasilo ulai noxou Lataua, mo sou eni alai noxinge. La sou eni emasaxa lexe nini napaipounu tani kapiutuxu vile sou lexe eni ane'e, la aai no anu.

23 ^fEpapalasi musova aso laixe mulai noxine. Anu kalumo ne, ane'i misakisakiinu mo nexi noxou texolu no taasou navunavu, xo anu kalumo mua'aloxu Kalisito Iesu ualasou. 24 ^gMo ane'i ane nexi noxi'a taxaxai tapita no anu xaixai noxou Lataua, ualasi'a lexe Maluko mo Alisitaluko mo Temasi ilou Luka, ane'i kalumo misova aso laixe mulai noxine.

25Eni alinga lexe alauna noxou Tila Iesu Kalisito uxolu noxine.