Titus 1
1Eni Paulo, eni ekaukavu vaikala ane 'o mulai noxine Tito. Eni aposeli noxou Lataua mo amitema sou xaixai noxou Iesu Kalisito. Xo Lataua musosovosilo lexe a'oxonu pakia'usou muxamuxaxu tane'i noxi'a ta mitema e anu musosovosi'a lexe ta na'u, mo asu'uline'i sou ilavusou vaikala manina noxou Lataua, mo sou imulinu 'ili'iloxo ane Lataua mumasaxau. 2 aEni a'oxonu xaixai ane ne, sou lexe ane'i imolo tane'i no anu mauli ane kaluxu uasi. Mauli ane ne, Lataua e ulavusou ukalavoi uasi, musakii vaikala noxou tatei no mine Anu ukoinu mimii latala 'o uxali uao lexe Anu ulosi'a. 3Ia ili'i no anu, la vaikala noxou muxali lamana no voxo ane Anu musosovosou. Anu musosovosi'a ta mitema se'i sou mia'aloxu vaikala noxou. No anu vote'i ane ne, la Anu mu'oxonu vaikala noxou muxali mupala'a noxilo. La sou Lataua, Anu itema sou mapauli, muvikala pekia'u mune'e noxilo sou lexe eni aa'aloxu vaikala noxou.4 bAnu aloxo ne, la sou ane eni ekaukavu vaikala ane 'o mulai noxine Tito. Xo nini nemuxaxu taneni noxou Iesu Kalisito, la sou nini nexali loxo eni 'alixeni maninasou mo muxamuxaxu tanenge noxinge nengei ne, anu muxali vilesisi.
Eni alinga ulai noxou Lataua Maminge ilou Kalisito Iesu, Anu itema sou pamauli lexe ane'i i'ana'analixene no anu alauna mo i'oxonu oponeni uai se'isisi.
Xaixai Noxou Tito
5Tava'u xo eni e'italoneni nexolu no la'olu ne Kuleta ne, sou lexe nini namomosou xaixai pa'upa'usou e ukalu uao mo nasosovosi'a ta tatila noxi'a ta mitema noxou Lataua no tuatuala ukalusi ne Kuleta loxo eni evikalanenixu tei. 6 cNasosovosi'a, la nasosovosi'a ane'i e ilavusou i'oxonu susu no ie'i ta mitema uasi xe ta semai'a vilesisi. Mo ta 'ili'a ne, imuxamuxaxu tane'i noxou Kalisito, mo sou ane'i umomomo sou i'oxonu 'ili'ilixo sou vote'i mo itelo anaxa'ai'a ta neni'a ilo'a ta mami'a uasi. 7Xo nelavusou lexe tila sou usaxila'u xaixai noxi'a ta mitema noxou Lataua ne, anu u'oxonu xaixai noxou Lataua. La sou mamu sou ususu no ie'i ta mitema mo u'itinu ualasou mo opo ialuxu palea mo uiexu uaini tavu'alo mo ulavusou u'oto'oto xe ukalavoine'i ta mitema sou u'umenu lamoli'a ilou mi'ami'a. 8Ia laixe lexe anu itema sou usexelaxa'a ta mitema mo usu'uline'i mo umasaxau 'ili'ilixo laixe tavu'alo ukalusi mo anu molu usaxila'u muamua'ixu laixe. Anu itema sou umulinu 'ili'ilixo ane mulapu mo uxolu va'axu no anu 'ili'ilixo masumasua, 9mo anu utetelisou pekia'u vaikala manina e ane'i milosiouxu mo anu umuxamuxaxu tanu no anu. La sou anu umomomo sou uavutilixu opone'i ta mitema no anu vaikala manina sou lexe ane'i itulu pekia'u noxou Kalisito, mo sou umomosi'a ta mitema e imasaxa lexe imulinu vaikala manina uasi, la sou ane'i ilavu lexe ane'i mipolo va'axu.10 dXo ta mitema tavu'alo ane mipolo va'axu ne. Ane'i imasaxa lexe ilomuxu vaikala manina noxou Lataua uasi, mo ivivikala vitavitanisi xe ixovulaulaulixa'a ta mitema no anu vaikala noxi'a. Tavu'alo noxi'a ne, ane'i xooxoo mungaasi'a ne. 11 eAne'i i'oxo aloxo ne, sou lexe ikalavoine'i ta mitema sou i'umenu lamoli'a ilou mi'ami'a. Ane'i ixovulaulaulixu xavutalai'a ta mitema latala no tani vilevilesi. La sou navikalane'i pekia'u lexe mamu sou ane'i ivivikala aloxo ne. 12Itema sou palomatana vile noxi'a ane anu muvikala aloxo 'o, “Ta mitema ne Kuletasi ane ane'i ilavusou ikalakalavoi utotomu, ane'i ta mitema ta masua loxo ta mimii ta vova mo ta pauxee.” 13 fVaikala noxou ne, anu manina. La sou nini navikala pekia'u ulai noxi'a sou namomosou muxamuxaxu tane'i noxi'a noxou Lataua uxali manina, 14 gmo mamu sou ilomusou a'alo vitavitanisi noxi'a ta Iutaia mo lapuloto iouiou noxi'a ta mitema ane ilavusou ixiu tumali'au vaikala manina. 15'Ei ane mumulaxu tanu noxou Lataua, la mimii latala ne anu masua no anu uasi. Ia 'ei ane mususu manina mo umuxamuxaxu tanu noxou Kalisito uasi, la mii vile laixe noxou uasi. Xo xavutalau mo tanu ne, masua mukalu. 16 hAne'i ivikala lexe ane'i milavusou Lataua, ia 'ili'ilixone'isi mumaxa'u lexe ane'i mixiu tumali'a noxou Lataua. La sou anu umasaxai'a uasisi manina, xo ane'i imulinu uasi mo ane'i umomomo sou i'oxonu xaixai vile laixe uasisi manina.
Copyright information for
ATA