Tit 3 | ATA | STEP | Nini naavutilixu xavutalai'a ta mitema noxine, sou lexe ixolu no laaxa'a ta mitema ane isaxila'a ilo'a ta tatilasi'a mo ilomuxu vaikalai'a laixe mo ixolu iloo sou i'oxonu xaixai lailaixesi.

a 3:1Rom 13:1-7; 1Pi 2:13-14

b 3:31Ko 6:9-11; Ep 2:1-2, 5:8

c 3:52Ti 1:9; Eva 10:22

d 3:6Apo 2:17-18

e 3:92Ti 2:14, 16

f 3:10Mat 18:15-17

g 3:12Ep 6:21-22; Kol 4:7-8

h 3:13Apo 18:24; 1Ko 3:5-6

i 3:14Ep 4:28

‏ Titus 3

'Ili'ilixo Laixe Ane Tito Umulinu

1 ^aNini naavutilixu xavutalai'a ta mitema noxine, sou lexe ixolu no laaxa'a ta mitema ane isaxila'a ilo'a ta tatilasi'a mo ilomuxu vaikalai'a laixe mo ixolu iloo sou i'oxonu xaixai lailaixesi. 2 Ipela'a se'isisi mo i'oxonu 'ilixo lailaixe ulai noxi'a ta mitema tavu'alo ukalusi. Ia mamu sou ivikala masua noxou itema vile mo i'oto'otosou anaxa'a.

3 ^bXo tei, la nenge kalumo ne, xavutalemenge laixe uasi la talomuxu vaikala noxou Lataua uasi mo ane'i mikalavoinenge. Mo temulinu masaxa masua iouiou mo 'ili'iloxo sou vote'i, la anu musakinenge la umomomo sou talulusou uasi mo texolu no anu 'ili'ilixo masua sou oponenge masuai'a ta mitema mo teisunenge ngatongato'o, la sou ane'i imasaxainge xe nenge tamasaxai'a uasi. 4 Ia, no mine tanutanuxu ilou alauna noxu Lataua, Anu itema sou pamauli muxali mupala'a lamana noxinge, 5 ^cla Anu upamaulinenge no anu 'ili'ilixo laixe e nenge te'oxonu uasi. Anu mupamaulinenge no anu alauna noxousi, la mu'ulosinge no anu Uleenu Tavuna sou texali alavua la. 6 ^dLataua munixi'u Uleenu Tavuna mulu'e mu'ana'ana noxinge no anu xaixai noxou Iesu Kalisito, Anu itema sou pamauli. 7 No anu alauna noxousi, la sou anu Lataua umoxo'inge lexe nenge taxali ta 'olu ane mulapu no iou sou tano'u mauli ane kaluxu uasi e nenge tamolo tanenge no anu. 8 Vaikala ane ne, anu manina misevile. Mo umomomo sou nenge tamuxaxu tanenge no anu. La sou eni emasaxa lexe nini navikala pakia'u ulai noxi'a ta mitema no anu mimii latala e eni elemolu, mo sou ane'i ane imuxamuxaxu tane'i noxou Lataua ne, ixavutala laixe ka sou ilailixu maulixa'a no anu 'ili'ilixo laixesi. Mii ane eni elemolu tei ne lexe ane'i imulinu, la anu mii laixe sou usu'uline'i ta mitema.

9 ^eIa naxiu tumalineu talitali'i vitavitanisi mo nanasi'a ta 'ilu'ilusune'i ilo'a ta xasixasi'a mo 'oto'otosou anaxa'a vitavitanisi xe 'oto'oto no anu lapuloto noxou Mosesi. Xo mimii ane ne, umomomo sou usu'ulineni uasi mo anu mii vitanisi. 10 ^fIa lexe vile uxolu sou ukalipalane'i ta mitema noxou Lataua, la navikalanu sou namomosou xavutalau. Lexe na'oxonu aloxo ne alaxu vile xe tamei, ia ulomuxu vaikalameni uasi, la naxexeenu. 11 Nini nelavusou lexe itema ane loxo ne, anu mupolo va'axu avile mo u'oxo'oxo susu. Mii ane ne, mumaxa'u lexe anu mususu manina.

Vaikala Kaluxusou

12 ^gNo voxo ane lexe eni apalusou Atemasi, ia uasi la apalusou Tukiko ulai noxine, la nini napulili sou nane'e noxilo ne Nikopoli. Xo eni emasaxa lexe no voxo sou la'iua, la eni axoxolu 'ole. 13 ^hXe eni emasaxa manina lexe nini xavineni sou napalusi'a Sena ilou Apolosi. Sena ne, anu itema sou lapuloto ane. Nasu'uline'i ilou no anu mimii sou muamua'ixa'a, mo sou ane'i imuamua'i la ixamuli tu'umaxu no anu mii vile uasi. 14 ⁱTa mitema noxinge kalumo ino'u lavulavu sou ilailixu maulixa'a no anu xaixai laixe sou ixalixu mii ma'ia ane sou usu'ulinu xoluxoluxa'a no anu. Ia ipaupauxee mamu.

15 Ta mitema latala ane noxi'a texolu 'o, ane'i misova aso laixe mulai noxine. Mo milemo aso laixe noxixe ulai noxi'a ta mitema ane imuxamuxaxu tane'i noxou Iesu mo ane imasaxaixe.

Eni alinga lexe alauna noxou Lataua uxolu noxinge ngingi latala ne ukalusi.