2Cor 2 | AUY | STEP | Imáyáa éꞌa séꞌa aneká kentópaꞌa wéꞌa sáwíꞌo ontáféꞌa óraaka simátíménana tirunkó umbaí taifó séꞌa káféꞌa ímba kónaumne siyáumne.

‏ 2 Corinthians 2

1 Imáyáa éꞌa séꞌa aneká kentópaꞌa wéꞌa sáwíꞌo ontáféꞌa óraaka simátíménana tirunkó umbaí taifó séꞌa káféꞌa ímba kónaumne siyáumne. 2 Kentirumbó umbaí tátínkáanasamo ésa kesirumbó kaweꞌó uwásinkaiyawi ímba ménaawe. 3 Kentópaꞌa ímbo kuráundaraꞌa séꞌa aúfáífimba toráumai awánéꞌa sáwíꞌo ombá kaweꞌá uwátinkaiwae séꞌa kentópaꞌo kondá ímba sirunkó umbaí táíníye séꞌa mináúfáí agai-timéꞌa kaweꞌ-úmaimo méraantafena kesirunkó kaweꞌó índawi mináúfáí agai-tímakaumne. Kesirunkómó kaweꞌó ínanamo éna kentirunkówáráꞌá kaweꞌó índa mindá éraiꞌ-aain-iye. 4 Mináúfáí agai-timéwánda sirunkó umbaí tówaꞌa kentáféꞌa óraaꞌ-imayaa éꞌa áfááraumai ifiꞌá tátinkeꞌa tirunkó umbaí táíndasafeꞌa ímba mináúfáí agai-tímakaumpo Póro wenaruntá áfááraumai símakaiye síyantafeꞌa mináúfáí agai-tímakaumne.

Sáwíꞌo uráin-kwaasisafeꞌa enáái taíꞌáiye serómó siyáin-aai.

5 Kempínkémbá moórá-waasigo sáwíꞌo uráintafena ímba kempín-aantembanifo kembiwífínkémbá tuwímbaifimba umbai-tántááꞌá wéraiye. Seyaafápímbá umbai-tántááꞌá wéraiye-aai miyán-órááꞌ-ááí ímba sénae séꞌa tuwímbaifimba umbai-tántááꞌá wéraiye-aai súne. 6 Tímakaunda-aufai toráumai awánéꞌa símai moórá-aaiyaꞌ-maréꞌa fasiꞌaén-ááí minkwáásígómbá simánkeꞌa wení ewaaꞌá ímba méꞌa sáwíꞌo uráintafeꞌa mimbéyámbá améꞌa ímba fíꞌom-beyamba áméro. 7 Káféꞌa wentáfé séꞌa enáái taíꞌáiye séꞌa ímba anekaꞌá imáyáa úmae iyéꞌa aráfáéro. Kemó ámé-sawi-meyamba waéꞌwaeꞌa ínana séna ímba kanaa kaweꞌ-ámpáꞌá kónaumne séna ifátúwáífainifo 8 wentáfé séꞌa embá siruntá amúmpo kaweꞌ-úmai méraao seró-ááí óraaka súne. 9 Ááéma kentáfé séꞌa simátimunda-aai isánaa Ína isánááo séꞌa kentópaꞌa ímba wéꞌa mináúfáífímbá agai-tímakeꞌa timuꞌmakáumne. 10 Sáwíꞌo uráin-kwaasigontafe séꞌa wenáái taíꞌáiye séꞌa ímbo anekaꞌó imáyáamo ontembá kewáráꞌá miyá úne. Sáwíꞌo uráintafe séꞌa wenáái taíꞌáiye séꞌa ímba anekaꞌá imáyáa éꞌa Ísu Káráísitin-aúrankaꞌa kentáféꞌa imáyáa éꞌa miyá úne. 11 Waántáwankoni sáwí-kisaugoni áwáuma awánéta kentáá íyáákaifo séta sáwíꞌo uráintafeta anekaꞌá ímba imáyáa úmae iyéta séta wenááima taíꞌáiye súne.

Tóróasifaꞌa ména Póro óraaꞌ-imayaamo uráin-aai.

12 Ísu Káráísitin-aai ásé-aai kosimátimenae séꞌa Tóróasi-naopaꞌa komaéwánda minááímó isáíyantafena Fasiꞌaénkómó toꞌmayaa úmba awánéꞌa ásé-aai simátimenae séꞌo ówánda 13 kesí waásigon-awiꞌa Táítási kentí naaópakemba Tóróasi-naopaꞌa ímba téna kentáái tasimásímíntafeꞌa ayaafáí uwááeꞌa ímba awánéꞌa óraaꞌ-imayaa éꞌa séꞌa tiyuwéꞌa kónaumne séꞌa Máséndóniyaa-marafaꞌa tiyáumne.

Ísuni fasiꞌaéntámbá siyáántán-kwimái áfontaamo fáúnda-aai.

14 Maarán-ááísáféta Maníkómpáꞌá súwisa súne.

Ísu Káráísiti íyáákaraintafena Maníkó wentéta kááísasinkenasa óraaka sisatá siyáántán-kwimái áfonta fáúne. Maníkó siꞌmarówata Káráísitin-aai seyaafáꞌ-máráfáꞌá kosimátimunasasa ísááwana wenááigo asaa-wiyúnkáámbá úmaena seyaafáꞌ-máráfáꞌá wété wéiye. 15 Maníkó séna Ísu Káráísiti kentáféna imáyáa éna kesí kísaumo máímba asaa-wiyún-kánámó agáéntemba wéiye simbá miyámó intembá Ísu Káráísitin-aai simátimunanasa Maníkó kentáásáféna séna Ísu Káráísitimo intembá asaa-wiyún-kánámó agáéntemba owé wésiye. Maníkón-arááímo wáéwi minkwíyúmbá ísááwasa waántáwankon-arááímo wáéwi minkwíyúmbá ísáámba wéowe. 16 Waántáwankon-arááímo wáéwi puwésa Maníkóní némpaꞌa maéꞌmaeꞌo íyawi Ísu Káráísitin-aai simátimunda-aaisafesa ánkúkaamban-iye sewasá Maníkón-arááímo wáéwi minááísáfésa sésa asaa-wiyúnkáámbá wéiye sésa maéꞌmaeꞌa ónááwe. Maníkón-aai simátímén-aai óraa-kisaun-ifo waási aantemba ímba kanaaꞌá wémaewe. 17 Maníkó siꞌmarówata Káráísitini kísau-waasi méta wenaúrankaꞌa Maníkón-aai éraiꞌ-aai simátimeta ímba kaeꞌ-ááíwáráꞌ-wáásíyáántá únasasa méyámbáréwaꞌa óraaꞌ-ontamba maénae sésamo ontembá tuwímbai Maníkón-aai simátíménasasa méyámbá simíwae sésamo ontembá kesáá ímba miyásá éta Káráísitini kísau-waasi

méta Maníkón-aai éraiꞌ-aaisa simátimune.