2 Thessalonians 1
1Kemá Póro maanááí maanáúfáífímbá agai-timúmpo ísáaro. Moóráwigon-awiꞌa Sáírásiye moóráwigon-awiꞌa Tímótiye keséꞌa méraayankaꞌa moórá-aai sénaumpo ísáaro. Tésáróníkaa-naopakewi Fasiꞌaénkóní waási ísáaro. Maníkó kentáásifowaeꞌa kááísamai Fasiꞌaénkó Ísu Káráísitiyeꞌo kááísamaimo méraawi ísáaro. 2Maníkó kentáásifowawe Fasiꞌaénkó Ísu Káráísitiyeꞌa úwoi wétuwaꞌnai-esarai faru uwátinkaayantafeꞌa inaí súne.3Kentáásí waásisono. Ááéma Maníkón-aaisafeꞌa timankúnkúmba éꞌa káféꞌa fasiꞌámai Maníkóeꞌa kááísamai méraawe. Ááéma moórá-mora kentirumbá tímakaamba isaꞌá káféꞌa kentirumbá tímaꞌmaeꞌa wégowe. Miyámó wéomba mindásafeta Maníkómpáꞌá súwisa símae wéiyeta inaisá súndasa kawetá úne. 4Ísu Káráísitini waási ontáfésa sáwíꞌa uwátinkesa tíꞌa iníꞌo uwátínkáámba Maníkómpáꞌá timankúnkúmba éꞌa ímbo aúwémba wentáféꞌa ísámai fasiꞌámai méraamba póta Maníkóní waási moórá-mora-naopimpaꞌo méraanta simátimeta kentúwíta mósá makáumne.
5Miyáumai fasiꞌámai méraamba pósa tíꞌa iníꞌo uwátínkáámba iséta séta Maníkó arupíse-meyamba timínda póna kawetóníꞌa uwátinkena wégarawiyiye súne. 6Maníkó arupíse úmai méraiwai sáwíꞌo wéuwatinkaawi sáwí-meyamba tiména 7kentí umbai-tántááꞌé kentáásí umbai-tántááꞌésá taíꞌásiyuwainiye. Fasiꞌaénkó Ísu wíyómpakembo kumíndaraꞌa wení fasiꞌaén-kísáú-wáásíwáráꞌá iyaráámbó kúraꞌmae kumíndaraꞌa kentí umbai-tántááꞌé kentáásí umbai-tántááꞌé Maníkó taíꞌásiyuwenasa 8Maníkómpáꞌó ímbo tésamo nénkaꞌo méraawi sáwí-meyamba tiména Fasiꞌaénkó Ísuni ásé-aai ímbo taawiyafíyawi sáwí-meyamba timíníye. 9Miwítí sáwí-meyamba maarán-iye. Sáwí-meyambo waéꞌwaeꞌo índa-aempaꞌa aasiyaasí maéꞌmaeꞌa íyana Fasiꞌaénkó aambá fáítinkainasa wenópaꞌa ímbo iyíyamba wení fíꞌora-fasiꞌaemba ímba awánánááwe. 10Minkánáá kumíndaraꞌa wení waási wenááisafesa timankúnkúmbo owí wenáwíꞌa óraaꞌa uwánkesa áwíꞌa mósá marésa aamoí ónááwe. Ísun-aai simátimewanata kembiwíwáráꞌá éraiꞌe séꞌa wempáꞌá timankúnkúmba uráamba póꞌa miyá ónááwe.
11Mindásafeta kembiwí túwaꞌnai eta maarán-ááí inaisá símae wéiyune. Maníkó wení waási-iꞌa uwátinkaindasafena táántena kawetóníꞌo uwátinkaindasafeta inaisá súne. Maníkó fasiꞌaémbá timínaꞌa kentí imáyáafinkemba kawe-kísáú maimaé iyíyantafeta inaisá súne. Maníkó fasiꞌaémbá timínaꞌa wempáꞌá timankúnkúmba fasiꞌámai íyamba póꞌa kawe-kísáú maíyantafeta inaisá súndasa póꞌa 12kembiwífímbá Fasiꞌaénkó Ísun-awiꞌa óraaꞌa íyana Ísu wení waási-iꞌa ontáféna kentúwíꞌa maimaéna iyíníye. Kentáásí Maníkóe Fasiꞌaénkó Ísuweꞌa úwoi túwaꞌnai íyamba póꞌa Fasiꞌaénkó Ísun-awiꞌo mósá maráíyantafeta inaisá súne.
Copyright information for
AUY