Luk 10 | AbmSC | STEP | Naji jifɔ ɛlɔ seng Tata arang anɛ atil ara na woba na abal atom abɔ na ɛtegla anɛ abal abal. Arɛ agbɔmba asɔng na bijiba na afom ya wɛ akɛrɛnɔ arɛ wɛ aji.

Luke 10

Jisɔs atom anɛ atil ara na woba na ɛbal

1 Naji jifɔ ɛlɔ seng Tata arang anɛ atil ara na woba na abal atom abɔ na ɛtegla anɛ abal abal. Arɛ agbɔmba asɔng na bijiba na afom ya wɛ akɛrɛnɔ arɛ wɛ aji. 2 Arigi abɔ arɛ, “Litom mfuga ɛjɔjɔg anɛ afangam. Bakag ɔrɔ ɔtu Ɔsɔwɔ atom balemantom akag na litom mfuga. 3 Ba sɔng wun ɔgbɔ nter arɛ ntoma wun mɔng abɔn ɔjɔra na lirɔng Abirambi. 4 Ɔtɔb tab ɛbam ɔtɔb tab akpagata, ɔtɔb tab na ɛbam, ɔtɔb yema ɔkag anɛ nyɔ na mba. 5 Ɔlɔ yara na ɛtɛk gbɔ mba bong, ‘Likɔna ɛjɔl na ɛtɛk ji fɔ!’ 6 Ɛlɔjɔl arɛ nɛ a likɔna are fɔ, likɔna ɛla jɔl na nɛ. nɛ a likɔna adɛnɔ jɔl fɔ likɔna ɛla tore ɛfɛngɛ na na. 7 Bajɔl na ɛtɛk jirang, ɔli ɔwɔ jiji ji akarɔ nɔ wun ateb arɛ, anɛ ba ntom akpe ntore. Wun ɔtɔb tob ɔsebi na bitɛk, bajɔl mfom yirang. 8 Ɛjiba ajiaji ji wun ɔyarɔ akpera wun, ba li jiji ji akarɔ wun. 9 Ba lem anɛ ba ayam anɔb, wun ɔfɛngɛ ɔtɔg abɔ arɛ, ‘Ɔtol Ɔsɔwɔ ɛgba kped.’ 10 Wun ɔlɔ fɛngɛ ɔyɛl na ɛjiba ji adɛnɔ wun kpera, ba sɔng na aba ɛjiba wun ɔbong arɛ, 11 ‘Ɛbubu ji ɛjiba ɛjina ji ɛlagɔ wur na ata ɛgba kom mɔng ndenge afɛm. Ba gbɔ nter arɛ, Ɔtol Ɔsɔwɔ ɛgba kped.’ 12 Mɛ ntɔga wa ndɛ ɔfo bilam, Ɔsɔwɔ ala teb ntakpa ndɔn na Sodɔm aseng ɛjiba ji fɔ.”

Bijiba bi ɛdɛnɔ bɛl ntamɛ

Matiyu 11.20-24

13 “Ɛla jɔl nkpɔgɛsi ɛjom ɛkara, Korasin! Ɛla jɔl nkpɔgɛsi ɛjom ɛkara Bɛtsayida! Arenɔ arɛ akpɔga ɛsi nsɔl ya alemɔ wa alemɔ na Taya na Sayidɔn, anɛ ba fɔ kin ateg ajɔl na nde, ayɔbɛ ajaga abɔma, awuri li bɔ atɔng, ateb arɛ ali gbɔ ndɔn na abe ɔfɛm abɔ. 14 Ɔsɔwɔ ala teb ntakpa ndɔn na ɔfo bilam na Taya na Sayidɔn aseng wun. 15 Mɔng wɔ Kapanum! Ɔsɛba arɛ ɔtab ɛla ɔyura na ɛjiba ɔtol? Ala wun rɔ akak na lilol ngon.”

16 Jisɔs abong atɔg batɔnanjim abɛ, “Nɛ awiawi-awiawi yɔ ayogɔ wa agba mam yog, nɛ awiawi-awiawi yɔ atɛnɔ wa agba mam tɛn, nɛ awiawi-awiawi yɔ atɛnɔ mam atɛn nɛ yɔ atomɔ mam.”

Batɔnanjim a Jisɔs afɛngɛ njim

17 Anɛ atil ara na woba na abal afɛngɛ njim na ntakpa ɛyɛbalitem abong arɛ, “Tata, nim agba wur yog ɛlɔ kog mbeng ɛya.” 18 Jisɔs afanga abɔ, “Mɛ nyɛn nim agbɔ ga mɔng nwangdo na libo. 19 Yonge atong mɛ ngba wa karɛ ɛkɔ, wɔ ɔmal ɔnyɛndɛ ɔnyɔ na anangta, ɔla bɛl ɛkɔ ɔseng anɛ ba ɔjing aba jisɔk wa nim ma lem. 20 Ɔdɛ bɛl ɛyɛbalitem arɛ ɛbe ɛtugi ɛgba wun yog,nɔngɛ ɛyɛbɛ wa litem arɛ mbeng ɛya agba yɛlɛ na ɛjiba ɔtol.”

21 Na ngara yi fɔ Jisɔs aror na ɛyɛba litem ji mbara ɛtugi abong, “Nsɔjama, Tata yɔ libo na nde mɛ na kag sam ateb arɛ, ɛjom ji ɔlɔ bir anɛ ba akpenɔ ɛkukuna ɔlikɔ ɔteb nkrikri. Tata wɔyɔ ɛkɔrɔ wa arɛ ɛjɔl anɔ. 22 Nsɔjama agba mam karɛ nsɔl fɛb, nɛ sang ayinɔnɔ mɔn ndɛg ndɛ, nɛ sang ayinɔnɔ ndɛ ndɛg mɔn na anɛ ba mɔn alɔ yege aribi ndɛ akarɛ abɔ.”

23 Fɔyɔ Jisɔs akpede abong na batɔnanjim na libir, “Lifola ɛjɔl na amir ya ayɛnɔ ji wɔ ɔlɔ yɛn. 24 Mɛ ntɔga wun ndɛ ɛgbemɛgbem bayɛn na amir na atol asɛba arɛ abɔ ayɛn ji wun ɔlɔ yɛn amalam ayɛn, akpɛ sɛb arɛ ayog ji wun oyogɔ amalam ayog.”

Ligan li nɔba nɛ a Sameriya

25 Ɔfo brang nteba ajing abal Jisɔs ngara akogɛ, “Nteteba, bɛjom ji mɛ na lem mbɛl likpen nsinsi?” 26 Jisɔs afanga wɛ, “Bɛjom ji ayɛlɔnɔ na nwɛr a Mosis? Ɛsar wa nan?” 27 Wɛ afanga wɛ, “Bɛl likɔrɔ na Tata Ɔsɔwɔ ɛba na litem ɛla fɛb na ɛtugi ɛja fɛb na ɛkɔ ɛja fɛb na nkanter ɛya fɛb. Bɛl likɔrɔ na nɛ a biji ɔwa mɔng wɔ nfɔnɛ ɔkɔra ɛla.”

28 Jisɔs afanga wɛ arɛ, “Wɔ ɔgba fanga na nsɛrɛ sɔng lem anɔ wɔ ɔbɛl likpen.”

29 Wɛ alag ro ɛlɛ yiyi akpɛlɔ bib Jisɔs, “Arɛ ba nɛ yɔ arenɔ nɛ a biji ɔma?”

30 Jisɔs afanga: “Ɛbɛl nɛnom wurang ajog na Jɛrusɛlɛm afenɔ Jɛriko aji kɔn ɛbɔngɛ awaju adu wɛ ajagɛ abɔma ayɛ atumɛ asa agbɔ liku. 31 Nemanjɔm Ɔsɔwɔ ajɔl tɔba asenga na mba yifɔ aba yɛn nɛ yɔfɔ agbaga aseng na nkɛ. 32 Lɛfit atɔb aseng na mba yi fɔ ayɛnɛ, atɔb agbaga aseng na nkɛ. 33 Nɛnom a Sameriya atɔb ajɔ seng fɔ atab a amir ayɛnɛ ndɔn afele wɛ. 34 Aji tabɛ aro wɛ bilɛm bifɔ, akagɛ aku na amum abɔbɛ ɛjag mbɔma. Atabɛ akone na ɛnyinya ɛjɛ, aba bomɛ na ɛtɛk ajɛn anɛ ababɛ wɛ. 35 Na ɛtɔna ɔfo, akarɛ mbaba mfom akpuga ^{▼▼akpuga Roman akoga arɛ Idenarus, yirang are na okon bi litom ɔfo} abal atɔgɛ arɛ babɛ wɛ jiji ɔlɔ rungi mɛ nɔ fɛngɛ nakakarɛ.”

36 Jisɔs akpede, “Abibɛ na anɛ ba fa ara ba nɛyɔ arɛ nɔ nɛ a biji anɛ yɔ awaju adulɔ?”

37 Nteba ajing afanga, “Nɛ yɔ abɛlɔ ndɔn na nɛ yɔ awaju adulɔ.”

Jisɔs atɔgɛ, “Tɔb Sɔng lem anɔ.”

Jisɔs areb Mata na Meri

38 Jisɔs na batɔnanjim abɛ ajil mba abɔ wɛ abal na ɛjiba ji nɛnkal wurang arenɔ yɔ akoga arɛ Mata akpera abɔ akag na ɛtɛk ɛjɛ. 39 Wɛ abɛl mɔnyɛn yɔ kal akoga wɛ arɛ Meri, yɔ ajɔlɔnɔ na ata ya tata ayonge atong ayoga mɔng ateba. 40 Mata abɛl ɛraga litem abangɛ nsɔl yi ajɔlɔnɔ lem, ajɛn aba naji Jisɔs abong arɛ, “Tata, wɔ ɔnim yɛna arɛ mɔnyɛn ɔma agbadabɔ na litom fɛb akam nanting ɛ? Tɔgɛ aba tɔbam.” 41 Tata afanga wɛ, “Mata, Mata, wɔ ɔbɛla ɛfegayɔ abangɛ nsɔl ɛgbemɛgbem.” 42 Ɛjom jrang ji asɛba, “Meri agba yege ji ɛnɔbɛ ɛseng wɛ anim teg atabɛ.”