Luk 12 | AbmSC | STEP | Naji anɛ ɛgɔr bibal na atil woba agbalɔ ajɔl nyɛdɛ atɛm, Jisɔs agbɔ mba abong atɔg batɔnanjim abɛ, “Bababɛ ɛlina abangɛ yis yi anɛ ba Farasi. Ji ɛjogɔ arɛ anɛ ba nbri ɛbal.

Luke 12

Lirigi ɔbangɛ anɛ ba mbri ɛbal

1 Naji anɛ ɛgɔr bibal na atil woba agbalɔ ajɔl nyɛdɛ atɛm, Jisɔs agbɔ mba abong atɔg batɔnanjim abɛ, “Bababɛ ɛlina abangɛ yis ^{▼▼or leaven; ɛjom ji ɛlema brɛd ɛtora.} yi anɛ ba Farasi. Ji ɛjogɔ arɛ anɛ ba nbri ɛbal. 2 Ajiaji ji abolɔ ala riribi, nsɔl yi ɛreanɔ na libir ala lem anɛ akun. 3 Ajiaji ji ɔbongɔ na ɛjingi ala yog na ɛwerang, awawa ya ɔbongɔ na ɔnwɔlɛ bi njo, ala kɔn na libo ɛtɛk anɛ kpakpa ayog.”

Nɛ yɔ ɔla bɛ

Matiyu 10.28-31

4 Mɛ ntɔga wun, atɛm bama, wun ɔdɛ bɛ anɛ ba amal ayol ngoabiji anim mal akpɛ lem ɛseng anɔ. 5 Mɛ na teb nɛ yɔ wɔ ɔla bɛ, bɛ Ɔsɔwɔ, yɔ ala yol afɛngɛ abɛl ɛkɔ ji ala rɔ akag na lilol ngon. Wɛ yɔ arenɔ nɛ yɔ ɔla bɛ.

6 Anim gore ɛkpamban ɛrɔng na akpuga abal ɛ? Ɛjɔl Ɔsɔwɔ aka yenam ɛkpamban yirang. 7 Ɛjɔl nyu na ɛsi ɛja Ɔsɔwɔ agba fal. Ɔtɔb kpɛ bɛ wɔ ɔkpe liloba ɔseng ɛgbem akpamban.

Ɛfaba nyɔ na ɛtɛna Krayis

Matiyu 10.32-33

8 “Mɛ ntɔga wun, nɛ awiawi yɔ arengɔ mam na libri anɛ ɛnɔbnɔbɛ, Mɔn a Nɛnom atɔb arenge wɛ na libri bateb ɔteb Ɔsɔwɔ. 9 Nɛ awiawi yɔ atɛnɔ mam na libri anɛ mɛ ntɔb ntɛnɛ na libri bateb ɔteb Ɔsɔwɔ. 10 Nɛ awiawi yɔ abongɔ abe alom abangɛ Mɔn a Nɛnom Ɔsɔwɔ amal atum akarɛ. Nɛ awiawi yɔ abongɔ abe alom abangɛ Mbara Ɛtugi Ɔsɔwɔ anim ma tum akarɛ.

11 “Alɔ taba aji wa nama na ɛkpasega na libri atol na abakol ɛjiba, ɔdɛ bɛl ɛfegayɔ abangɛ ɛjom ji wɔ ɔla kɔ ɔladɛ ɛla naji ɔla bong. 12 Ateb Mbara Ɛtugi ala teb na ngara yifɔ ji wɔ ɔla bong.”

Ligan ɔbangɛ ɛdadab ɛfang nɛ

13 Nɛ wurang na ɛbɔngɛ abong atɔg Jisɔs arɛ, “Nteteba, tɔg mɔnyɛn ɔma arɛ ɛbanga nsɔl yi nsɔjira akpɔlɔ asa nanama.”

14 Jisɔs afanga, “Ntɛm ɔma, ba nɛ yɔ akarɔ mam ɛkɔ arɛ mɛ namabilam nig nfɛng njɔl mbanga nsɔl nkarɛ wun anɛ abal?” 15 Fɔyɔ abongɔ atɔg abɔ arɛ, “Kone ɛkpo! Babɛ ɛlina abangɛ nsɔl ntong; ateb likpen nɛ anim gara na nsɔl yi akpenɔ.”

16 Fɔyɔ Jisɔs atobɔ abɔ ligan lifa: “Ɛbɛl ɛfang nɛ wurang yɔ abimɔ ɛgbɛ na nɔba nde aful ateng a nsɔl. 17 Abong atɔg ɛlɛ, ‘Mɛ na lem nan? Mfom sang yi na bom nsɔl ɛma.’

18 “Wɛ abong arɛ, ‘Mɛ nyiyi ji mɛ na lem. Mɛ na mili bibonge ɛbama ntore nsi bi ɛjɔjɔg nkag nsɔl ɛma fɛb. 19 Fɔyɔ nagɔ tɔg ɛlama, “Wɔ ɔkpe ɛgbem ateng a nsɔl yi ɔlɔ tore na nya nya. Kɔ likpen bɛmbɛm; li, ɔwɔ, ɔfɛngɛ ɔrang.”’

20 “Fɔyɔ Ɔsɔwɔ abong atɔgɛ arɛ, ‘Wɔ ɛdadab! Alagtu yafa na tabɛ likpen ɛla. Ba nɛ yɔ ala kɔ nsɔl yifa yi wɔ ɔlɔ lem ɔbom ɛla?’

21 “Ana yɔ ɛla jɔl ɛkarɛ nɛ awiawi yɔ atorɔ nsɔl abom ɛlɛ are nkpak na nsɔl Ɔsɔwɔ.”

Ɔdɛ bɛl ɛfegayɔ

Matiyu 6.25-34

22 Fɔyɔ Jisɔs abong atɔg batɔnanjim abɛ: “Mɛ ntɔga wun ndɛ, ɔtɔb bɛl ɛfegayɔ abangɛ likpen ɛlina, ji wun ɔla li: abangɛ biji ɛba ji wun ɔla leba. 23 Ateb arɛ likpen ɛjɔg ɛseng nsɔl lili, biji ɛjɔg ɛseng ɛleba. 24 Bri ɛgbɔk nyam. Anim mbima nig afɛngɛ afufu, akpem njo ɛboma nsɔl na ɛbonge, Ɔsɔwɔ alɛga abɔ. Wɔ ɔjɔg ɔseng anyamfor. 25 Ɛfegayɔ ɛja ɛmamal ɛkpɛlɛ wa na ngara na likpen ɛla ɛ? 26 Naji wɔ ɔdɛk mal ɔlema asusuga nsɔl, ɛla lem nan ɔbɛl ɛfegayɔ abangɛ nsɔl yingɔ?

27 “Bri mɔng afɛm ante abenga. Litom anim lema nig ajum abɔma akarɛ liabɔ. Mɛ ntɔga wa, ndɛ ɛjɔl Ntola Solomɔn na afang ayɛ anim mal aleba ɛleba ɛnɔb mɔng abɔ. 28 Ɔsɔwɔ alɔ fɛngɛ aleba agbɛlɛ ya arenɔ ɛlɛl, ɛgɔ arɔ akag na ngon. Ateg aleba wun ɛgbem bileba. Wun anɛ ba nsusuga ntamɛ! 29 Ɛdɛ wa fege ayɔ na ɛjom ji wɔ ɔla li ɔfɛngɛ ɔwɔ; ɔdɛ bɛl ɛfegayɔ ɔbangɛ nsɔl yifa. 30 Anɛ ba adɛdɛ mɛngɛ Ɔsɔwɔ na ɛyeng jifa abɔ ba abɛna atɔna nsɔl yifɔ, Nsɔja anyinyi arɛ ɛfofoma arɛ wɔ ɔbɛl. 31 Bɛl nkanter na Ɔtol Ɔsɔwɔ, nsɔl yifa fɛb ɛla jɔl ɛkara titi.

Afang na libo

Matiyu 6.19-21

32 “Ɔtɔb kpɛ bɛ, nsusuga ɛbɔngɛ, ɛgba yɛbɛ Nsɔja arɛ wɛ akara ɛjiba ɔtol. 33 Gore nsɔl ɛya wɔ ɔkɔ akpuga yafɔ ɔkarɛ akpak. bɛl ɛbam ji ɛdɛ kol, wɔ ɔtore afang aya na ɛjiba ɔtol naji ɛdɛ teg ɛrɛda, ateb nwaju anim teg arir fɔ, ɛkpafudanfu sang ji ɛmal ɛrungi. 34 Ateb mfom yi ɔtorɔ afang aya, fɔyɔ litem ɛla ɛkonɔ.

Ɛkone ɛkpo

35 “Tore biji bi litom, bom ɛnwɔlɛ ɛja ɛlol, 36 mɔng barɔgantom ba asega ndɛ njo abɔ arɛ akuri na likag libal, na ngara yi alɔ kuri aba kud ala tum aji ribi wɛ mbo fɔtutu. 37 Ɛla jɔl ɛjom ɛyɛbalitem ɛkarɛ barɔgantom ba ndɛ njo ala kɔn abɔ naji asega wɛ arɛ akuri. Mɛ ntɔga wa ɛtete ala atore biji bi litom akog abɔ aba jɔl na ɛkpokoro wɛ ala aba arɔgɛ abɔ. 38 Ɛla jɔl ɛjom ɛyɛbalitem ɛkarɛ barɔgantom ba ndɛ njo ala kɔn abɔ naji alɔ tore biji, ɛjɔl abal na noma alagtu, ɛjɔl na ngara yi ɔforanfo ɛlagɔ kparɛ 39 Nɔng jifa ɛsara: Arenɔ arɛ nfɔn tɛk anɔgajɔga akuna ngara yi nwaju abaga, anim teg anɔngɛ aba wa njo ɛyɛ. 40 wɔ titi ɔtek ɔtore biji, ateb arɛ Mɔn a Nɛnom amal aba na ngara yi wɔ ɔdɛnɔ kone ɛkpo.”

41 Pita abib “Tata ɔtoba wur ligan lifa afi anɛ kpakpa?”

42 Tata afanga, “Ba nɛ yɔ arenɔ ɛteng na nwak ndɔgalitom yɔ ndɛ njo ala tob ɛjum barɔgantom bangɔ arɛ abanga nsɔl lili akarɛ abɔ na ɛteng ngara? 43 ɛyɛbalitem ɛla jɔl na ndɔgalitom yɔ ndɛ njo alɔ wɛ yɛn alema anɔ naji wɛ alɔ kuri. 44 Ntɔga wa ɛtete ala da abɔ nsɔl ɛyɛ fɛb akarɛ. 45 Ɛlɔ fɛng ɛjɔl arɛ ndɔgalitom ala bong atɔg ɛlɛ, ‘Nsɔjama njo anim kuri batek,’ akuma nduga barɔgantom, abakal na abalom, aliga awɔga agbɔ njɔk 46 Ndɛ njo yɔ ndɔgalitom ala ba na ɔfo bi ala dɛ kone ɛkpo na ngara yi wɛ ala dɛ kun, ala wɛ ja krikri akarɛ mfom na anɛ ba adɛnɔ mɛngɛ Ɔsɔwɔ.

47 “Ndɔgalitom yɔ anyinɔ ji ndɛ njo asɛba arɛ alem, adɛ kore biji alem alɛ du nkora lidu. 48 Fɔyɔ ɛreanɔ arɛ ndɔgalitom yɔ adɛnɔ gbɛra ji ndɛ njo asɛbɔ, afɛng alem ji alɛ du ndɛ njo alɛ du sed. Nɛ yɔ akarɛ wɛ ɛgbem nsɔl ala wɛ bib ɛgbem nɛ yɔ akarɔ wɛ ɛgbemɛgbem nsɔl arɛ abri alɛ bib ɛgbemɛgbem nsɔl.

49 “Mɛ mbal ndɛ mɛ mba kɔrɛ ngon na ɛyeng, kin ɛkuma nola 50 Ɛkpe ɛwura alib ji mɛ na bɛl, mɛ na jɔl na ntakpa ɛfegayɔ tɛtɛ ɛmal. 51 Wun ɔkɛrɛ arɛ mɛ mbal na likɔna na ɛyeng ɛ? Ii, likɔna arig, mbal na ɛyabanjim. 52 Bɔm ɛlɛl sɔng ɔsi nub anɛ arɔn ala yab atɛm, ara ala yap abal, abal yab ara. 53 Ndɛ ayab na abɔn balom abɛ, abɔn titi ayab na ndɛ abɔ, ba nyɛn ayab na abɔn ba akal, abɔn ba akal ala yab na ba nyɛn abɔ,ba nyɛn a yab na akal abɔn abɔ, akal abɔn yab na ba nyɛn alom abɔ.”

54 Jisɔs abong atɔg ɛbɔngɛ anɛ “Wun ɔlɔ yɛn alib alɔ nyak na nkɛ yi njol alima, fɔ tutu wun ɔla bong arɛ, ‘Alib alag na,’ akur na na ɛtete. 55 Naji nfɛb alɔ lem na ɔrɛda, wun ɔbong arɛ, ‘ɛfobe ɛla lelem,’ ɛlem. 56 Anɛ ba nbri ɛbal! wun ɔmal ɔbri libo na nde ɔkuna ji ɛlagɔ lem. Ɛla lem nan wun ɔdɛ mal ɔbon ngara yi batig?

Tɔba na Nɛ Ɔjing ɔwa

Matiyu 5.25-26

57 “Bɛjom ji wun ɔdɛk lam ɛlina ji ɛreanɔ ɛtete? 58 Naji ɔjiga na nɛ ɔjing ɔwa na mfom a balamabilam, ba nɔg wun ɔkɔna na mba, anɔ arig ala da abɔ akarɛ namabilam, nama bilam ada wa abɔ akarɛ abrusi ba ala rɔ akag na ngbakɔbɔ. 59 Mɛ ntɔga wa, wɔ ɔnim teg ojok tɛtɛ wɔ ɔkpe nkulsi akpuga.”