Luke 13

Gbɔ ndɔn anɔ arig ɔkpɔ

1Na ngara yifɔ anɛ ajɔl fɔ ba atɔgɔ Jisɔs abangɛ anɛ ba Galili ba Payilet alɔ yol naji ajɔl lem nsira akarɛ Ɔsɔwɔ. 2Jisɔs afanga, “Wun ɔkɛrɛ arɛ anɛ ba Galili ba fɔ ba agalɔ jɔl anɛ ba abeɔfɛm aseng anɛ ba Galili bangɔ ateba arɛ abɔ ayɛn ligan ɛriga ji fɔ ɛ? 3Mɛ ntɔga wun ndɛ anɔ arig, Ndɛg wun ɔgbɔl ndɔn wun titi ɔtɔb ɔkpɔ. 4Anɛ liko na ara ba libole li Silom ɛgbɔlɔ ɛbole abɔ, wun ɔkɛrɛ arɛ abɔ ba agalɔ jɔl abe anɛ na Jɛrusɛlɛm ɛ? 5Mɛ ntɔga wun ndɛ, anɔ arig: ndɛg wun ɔgbɔl ndɔn wun titi ɔtɔb ɔkpɔ.”

6 Fɔyɔ Jisɔs atob abɔ ligan lifa. “Nɛnom wurang abim ɔjuju na ɛgbɛ akabante ɛjɛ, ajil abiri akab arɛ abɔng na ɔte bifɔ, ayɛnam nkab ayiayi. 7Abong atɔg nbabɛ ɛgbɛ akabante, ‘Nya ɛra yi fa yi mɛ njɔga nbaga nsɛba akab ɔjuju ndɛ mɛ nbɔng nim njɔga nyɛna. Gbɛg tob na nde, bɛ ɛjom ji arungi nde?’

8“Nbabɛ ɛgbɛ akabante afanga, ‘Nsɔjama njo, da abɔ ɛkpɛ jɔl liya trang,mɛ na rim ntob nsibi nkag nsɔl yi ɛla lem ɛkab. 9Ɛlɔ fɛngɛ ɛkab na njim a liya ɛnɔba, ɛdɛgɔ fɛngɛ ɛkab wɔ ɔmal ɔgbɛk ɔtob na nde.’”

Jisɔs alem mbuni anɔb na Ɔfo Ɛrɛdɛkɛr

10Na Ɔfo Ɛrɛdɛkɛr, Jisɔs ajɔl teb na ɛkpasega. 11Ɛbɛl nɛ nkal wurang yɔ ɛbe ɛtugi ɛlɔ wɛ lem agbɔ ɔbuni na nya liko na ɛra, agudi njim amalam ajɔ tini ɛlɛ 12Naji Jisɔs alɔ wɛ yɛn akogɛ atu na ɔsi abong atɔgɛ, “Nɛnkal, ala fungi adabɔ na ɔyam ɛba.” 13Wɛ atab ɔbɔ akone wɛ, fɔ tutu atore atini, akuma ntiga Ɔsɔwɔ.

14Ntakpa nɛ a ɛkpasega abɛl ɛraga litem na Jisɔs na ji alɔ lem nɛ anɔb na Ɔfo Ɛrɛdɛkɛr. Ntakpa nɛ a ɛkpasega abong atɔg anɛ, “Ɛre mfo ɛragra na ɛrida yi nɛ alema litom. Ba, alema wɔ ɔnɔb na afo afɔ, na Ɔfo Ɛrɛdɛkɛr arig.” 15Tata afanga wɛ, “Wun anɛ ba nbri ɛbal wun ɔnim jɔga ɔfungi anyinya afi nfɔng ɛya na ɛga ɔtu wɛ arɛ aji wɔ alib na Ɔfo Ɛrɛdɛkɛr ɛ? 16Nɛnkal, mɔn yɔ kal yɔ Ɛbram, yɔ Nim alɔ wɛ lem agbɔ ɔbuni na nya liko na ɛra, ɛbejom ji arɛ anɔb na Ɔfo Ɛrɛdɛkɛr ɛ?”

17Na nfanga ɛyɛ, anɛ ba ajing abɛ abɛl ɛsɔnɛ, anɛ ajɔl na ɛyɛbalitem na kpakpa akpɔga ɛsi a nsɔl ya alɔ lem.

Ligan li amuga mɔstadi na yis

Matiyu 13.31-33

18Jisɔs abib, “Ɔtol Ɔsɔwɔ ɛre nan? Bɛjom ji na kɔ ngara? 19Ɛre mɔng mɔstadi ya nɛnom akɔlɔ abim na ɛgbɛ ɛjɛ. Ɛbenga ɛyanga ɔte, anyamfor asi bijo na abɔ ayɛ.”

20Jisɔs akpɛ bib, “Bɛjom ji mɛ na kɔ ngara na Ɔtol Ɔsɔwɔ? 21Ɛre mɔng yis yi nɛnkal akɔlɔ akpɛlɛ na nsɔl yi akɔga alema brɛd yi ɛyɔbɔ na ɛkpeng aburi tɛtɛ ɛkuma ntora.”

Ntɔra mbo

Matiyu 7.13-14,21-23

22Naji Jisɔs ajɔl ji Jɛrusɛlɛm ajɔl seng na bijiba na akpa agbɛ ateba anɛ 23Nɛ wurang abibɛ, “Tata, nsak anɛ ba ala bɛl ɔnyangɛ?”

Wɛ afanga abɔ, 24“Kore biji wɔ ɔyɛl na ntɔra mbo, ateb ɛgbem anɛ ala nɔg arɛ ayɛl anim ma yɛl. 25Nfɔn ɛtɛk ala tum ayema abam mbo, wun ɔla yema na ɛtegla ɔkuda ɔfɛngɛ ɔgɔrɛ, ‘Nsɔjama njo, ribi wur mbo.’

“Wɛ ala fanga, ‘Mɛ wun nyim titi mɛ nyim mfom yi wun ɔjogɔ.’

26“Fɔyɔ wɛ ala bong arɛ, ‘Wur ɛjɔl li ɛfɛngɛ ɛwɔga na na, wɔ ɔjɔl kpele na aba ɛjiba ɛjira.’

27“Wɛ ala fanga arɛ, ‘Mɛ wun nyim na mfom yi wun ɔjogɔ. Batumam na libri wun anɛ ba abeɔfɛm!’

28“Wun ɔjɔ lul ɔjɔ li amin, naji wun ɔla yɛn Ɛbram, Asik na Jɛkɔb na bayɛn amir Ɔsɔwɔ na Ɔtol Ɔsɔwɔ, wun ba fɔnɛ ala wun rɔ na ɛtegla. 29Anɛ ala jog na ɔrɛda na ɔsi na njim aba kɔ nji na likag li ɛreanɔ na Ɔtol Ɔsɔwɔ. 30Anɛ ba agbɔlɔ mba ala kil njim, ba akilɔ njim ala gbɔ mba.”

Jɛrusɛlɛm afele Jisɔs ndɔn

Matiyu 23.37-39

31Na ngara yi fɔ anɛ ba Farasi abal na ji Jisɔs aba bong atɔgɛ, “Tum sɔng mfom yi ndɛga, ateba arɛ, Hɛrɔd asɛba arɛ ayola.”

32Jisɔs afanga, “Sɔng tɔg ɛbrambi jifɔ arɛ, ‘Mɛ na sɔra ɛsi njɔ yege abe atugi nema anɛ anɔb ayam ɛlɛl na ɛgɔ, na mfo ɛra mɛ na mal litom ɛlama.’ 33Na jɔl na mba, ɛlɛl na ɛgɔ na ɛtɔna ɔfo, na ɛtete, ateb nyɛna amir anim jɔga akpɔga na ɛtekla ndɛg na Jɛrusɛlɛm.

34“Jɛrusɛlɛm, Jɛrusɛlɛm wun ba ɔyolɔ ba yɛna amir ɔfɛngɛ ɔrɔga atal ɔtoba barɔgantom Ɔsɔwɔ ba atomɔ atu wun. Mɛ nkpe nkanter ndɛ ntur abɔn abina mbom mfom yirang, mɔng nkɔk abole abɔn abɛ na akponkpon, wun mam ɔnim nɔngɛ! 35Bri agba tɛn ɛtɛg ɛja. Wun mam ɔnim kpɛ yɛn, tɛtɛ wun ɔbong arɛ, ‘Lifola ɛjɔl na nɛ yɔ abalɔ na mbeng yi Tata ▼

▼Psalm 118 26

.’”