Luke 14

Jisɔs alem nɛnom ɔyam anɔb

1Ɔfo birang bi Ɛrɛdɛkɛr, Jisɔs ajil nsɔl niga na ɛtɛk ntakpa nɛ a Farasi, anɛ ajɔl wɛ babɛ ɛnɔbnɔbɛ. 2Ɛbɛl nɛnom wurang yɔ abɔ na ata alɔ tor. 3Jisɔs abib anɛ ba Farasi na anɛ ba anyinɔ ajing arɛ, “Njing anɔga adaga nɛ abɔ arɛ, alem nɛ ɔyam anɔb na Ɔfo Ɛrɛdɛkɛr afi adɛ wɛ lem?” 4Abɔ fɛb amalam abong jisɔk. Jisɔs afele nɛnom ɔfɔ alemɛ anɔb, atomɛ arɛ asɔng mba ɛyɛ.

5Fɔyɔ abib abɔ, “Arenɔ arɛ nɛ wurang fa akpe mɔn yɔ lom afi nfɔng yɔ agbɔlɔ ayɛl na libe na ɔfo ɛrɛdɛkɛr wɔ wɛ ɔnim tru ɔyege fɔtutu ɛ?” 6Abɔ wɛ amalam afanga.

Jisɔs ateb abangɛ ɛbudi ɛla

7Jisɔs ayɛn mɔng anɛ ba atebe abɔ likag ajɔl sɛb aji na ateng afom atob abɔ ligan lifa. 8“Alɔ tebe wa likag li libal ɔtɔb ji ɔjɔl na nyura mfom, ɛmal ɛjɔla arɛ agba tɔb atebe nɛ yɔ ajɔgɔ asenga. 9Nɛ yɔ atebɔ wun likag, amal aba tɔga arɛ nɔng nɛ yɔngɔ aba jɔl fa ɛla jɔl ɛjom ɛsɔnɛ ɛkara, wɔ ɔfɛng ɔji jɔl na mfom adɛlɔ bɛl ɔkponi. 10Alɔ tebe wa likag, sɔng jɔl na mfom yi adɛlɔ bɛl ɔkponi, na ngara yi nfɔngɛ a likag alɔ ba ala tɔg arɛ, ‘Ntɛm, sɔng jɔl na mfom yi akpenɔ ɔkponi.’ Na mba yifɔ wɔ ɔla bɛl ɔkponi na libri anɛ kpakpa ba atebɔ likag. 11Anɛ ba ataba liabɔ ala budi abɔ anɛ ba abudi liabɔ ala tab abɔ ayura.”

12Jisɔs abong atɔg nfɔngɛ likag arɛ, “Ɔla gɔ lem likag ɔtɔb tebe atɛm aba, abɔnyɛn aba, akone aya, ɔtɔb tebe afang anɛ, nɛ a biji ɔwa, ɔlɔ lem anɔ, abɔ ala tɔb atebe wa atore akpe wa mɔng ɔlemɔ. 13Ɔlagɔ lem likag tebe akpak, abuni na alaga amir, 14wɔ ɔla bɛl lifola, ateb abɔ wa anim ma kpe Ɔsɔwɔ ala wa kpe na ɔfo bi ɛnyimi na liku bi ateng anɛ.”

Ligan li ntakpa likag

Matiyu 22.1-10

15Nɛ wurang yɔ ajɔlɔ na ɛkpokoro na Jisɔs naji ayogɔ alom yafɔ wɛ abong atɔgɛ, “Lifola ɛjɔl na nɛ yɔ ala li na likag li Ɔtol Ɔsɔwɔ.”

16Jisɔs afanga: “Ɛbɛl nɛnom wurang yɔ ajɔl tore biji na ntakpa likag atebe agbem anɛ. 17Na ngara yi likag ɛrirɔ atom ndɔgalitom ɔwɛ atu anɛ ba wɛ atebɔ arɛ, ‘Baba, nsɔl ɛgba jɔl na nsɛrɛ.’

18“Abɔ fɛb akuma mbonga, ngbɔgamba abong arɛ, ‘Mɛ ngona nde mɛ nteg nji yɛn, ɛtiti nim ma ba.’

19“Yɔngɔ arɛ, ‘Mɛ ngona nfɔng woba, fa nde na mba nfe nji gara abɔ ɛtiti nim ma ba.’

20“Yɔngɔ akpɛ bong arɛ, ‘Mɛ nkpe nɛnkal nkɔga nim ma ba.’

21“Ndɔgalitom afɛngɛ njim aba tɔra fɛb atɔg nsɔjɛ njo. Nsɔjɛ njo arag litem atɔg ndɔgalitom ɔwɛ arɛ, ‘Subi sɔng na aba na atɔra aba ya bijiba wɔ ɔba na akpak, abuni na alaga amir.’

22“Ndɔgalitom abong atɔgɛ arɛ, ‘Nsɔjama njo, ji ɔbongɔ ngba lem ɛyaga ɛkpere ɛgbem ɛgbem.’

23“Fɔyɔ Nsɔjɛ njo atɔg ndɔgalitom ɔwɛ arɛ, ‘Sɔng na aba na aba bigbɛ wɔ ɔkɔ anɛ ɔba kag naji ɛtɛk ɛjama ɛla ror. 24Mɛ ntɔga wa, ɛjɔl nɛ wurang na anɛ ba mɛ ntebɔ san yɔ ala yonge likag ɛlama.’”

Ji ɔla lem ɔjɔl ntɔnanjim a Jisɔs

Matiyu 10.37-38

25Ntakpa ɛbɔngɛ anɛ ajɔl tɔna Jisɔs, akpede abri abɔ abong arɛ. 26“Nɛ awiawi yɔ alagɔ jɔl ntɔnanjim ɔma ateg atɛn ndɛ na nyɛn, nkal na abɔn, na abɔnyɛn abɛ ba lom na ba kal ɛjɔl likpen ɛlɛ. Anɔ arig wɛ anim ma jɔl ntɔnanjim ɔma. 27Nɛ awiawi yɔ adɔgɔ tab krɔs ɛjɛ atɔna mam anim ma jɔl ntɔnanjim ɔma.

28“Arenɔ arɛ nɛ wurang fa alagɔ si libole. Wɛ anim tɔg jɔl akɛrɛ ɔkon nsɔl mɔng akpuga ya alɛ benga amal litom lifɔ ɛ? 29Ɔlɔ rim alub atana ɔbɔm ɛtɛk ɔdɛmal ɔsi fɛb anɛ ba ayɛna ajɔ yɔla. 30Ajɔ bong, ‘Nɛ ɔfa abɔm nsiga amalam asi ɛmal.’

31“Arenɔ arɛ ntol alag tum bita na ntɛm ntol, anim tɔg jɔl akɛrɛ arɛ wɛ amamal akɔ anɛ ɛgɔr atil abal na woba anɔg na ntol yɔ akpenɔ anɛ ɛgɔr atil arɔn ɛ? 32Adɛlɔ mal, ala tom ndɔgalitom atu ntɛm ntol naji akpenɔ re na ndabamba arɛ abɔ alem likɔna. 33Na mba yi fɔ nɛ awiawi yɔ adɔgɔ dabɔ na nsɔl kpakpa yi akpenɔ anim ma jɔl ntɔnanjim ɔma.

Abe akang

Matiyu 5.13; Mak 9.50

34“Akang anɔnɔb, alɔ tanɛ liyɛbɛ ɛlɛ, ɛla lem nan ɛkpɛ yɛbɛ. 35Akpɛlam nɔb akarɛ nde na ɛkukur, ala wuri ngɔ. Nɛ awiawi yɔ akpenɔ atong, nɔngɛ wɛ ayog!”