Luke 19
Jisɔs na Sakiyɔs mfora taksi
1Jisɔs ayɛl na Jɛriko ajɔ seng. 2Ɛbɛl nɛnom wurang yɔ anyina arɛ Sakiyɔs, ajɔl ntobɛsi nfora a taksi, ajɔl ɛfang nɛ. 3Ajɔl sɛb arɛ ayɛn ligan nɛ yɔ Jisɔs arenɔ, ajɔl ɛkpede nɛ amalam ayɛnɛ ateb ɛbɔngɛ anɛ. 4Fɔyɔ ɛkerɔ abɛna aji na ɔsi bi ɛbɔngɛ anɛ aji yur mbɛl arɛ ayɛnɛ, ateb Jisɔs ajɔl seng na mba yifɔ. 5Naji Jisɔs arirɔ na ɛkɛbɛ mfom yifɔ, abri na libo abong atɔgɛ, “Sakiyɔs, budi kakab. Mɛ na jɔl na ɛtɛk ɛja ɛlɛl.” 6Sakiyɔs asubi abudi aba kpera wɛ na ɛyɛba litem. 7Anɛ kpakpa ba ayɛnɔ akuma numi arɛ, “Alitum njɔla njɛna nɛ na ɛtɛk nema abeɔfɛm.” 8Sakiyɔs atum ayema abong atɔg Tata, “Bri, Tata! Mɛ na banga nsɔl ɛma mfom ɛbal nkarɛ akpak fana mbonga nyɔ, mɛ nɔ fɛng nim nɛ awiawi na tore nkpe wɛ nkpɛlɛ ɛni ɔkon bi nkɔlɔ.” 9Jisɔs abong atɔgɛ, “Ɛlɛl ɔnyangɛ ɛgba ba na ɛtɛk jifa, ateb arɛ nɛnom yɔfa titi, mɔn a Ɛbram yɔ. 10Ateb arɛ Mɔn a Nɛnom abal arɛ aba sɛb afɛngɛ anyangɛ ba alɔ tan.”Ligan ɔbangɛ barɔgantom woba
11Naji ajɔl wɛ yonge atong, Jisɔs asɔra ɛsi atob abɔ ligan, ateb ajɔl alagɛ Jɛrusɛlɛm anɛ ajɔl kɛrɛ arɛ Ɔtol Ɔsɔwɔ ɛlag jog fɔ tutu. 12Wɛ abong: “Nɛnom wurang yɔ ajogɔ ɔgu bi atol ajil lijɛn na ndabamba ɛjiba arɛ abɔbɛ ɔtol nig afɛngɛ njim. 13Fɔyɔ akogɔ barɔgantom abɛ woba akarɛ abɔ ɛkpuga woba abong atɔg abɔ arɛ, ‘Ba kɔ akpuga yafa wun ɔjɛn arɛ tɛtɛ mɛ fɛngɛ njim.’ 14“Ajɔlam kɔr anɛ abɛ, fɔyɔ atomɔ nteb ɔteb arɛ aji tɔgɛ arɛ ‘wur wɛ ɛkpɛlam sɛb mɔng ntol ɔwura.’ 15“Abɔbɛ ɔtol afɛngɛ njim akuri, atom arɛ akog barɔgantom abɛ ba wɛ akarɛ akpuga aba, wɛ abib abɔ nseng yi abɔ alɔ li na akpuga yafɔ. 16“Ngbɔga mba aba, bong atɔgɛ, ‘Nsɔjama njo, ngba bɛl nseng ɛkpuga woba na ɛkpuga ya ɔkarɔ nɔ mam.’ 17“Ndɛnjo afanga, ‘Gafola, ɛteng ndɔgalitom ɔma! Ateb arɛ ɔkpe ɛkagasik na asusuga nsɔl, kɔ ɛjiba woba wɔ ɔbabɛ.’ 18“Ɛtɔna aba bong atɔgɛ, ‘Nsɔjama njo, ngba bɛl nseng ɛkpuga bɛrɔn na akpuga ya ɔkarɔ mam.’ 19“Ndɛ njo afanga, ‘Wɔ kɔ ɛjiba bɛrɔn wɔ ɔbabɛ.’ 20“Ndɔgalitom yɔ ngɔ aba bong atɔgɛ, ‘Nsɔjama njo, nga akpuga aya nkɔl ɛjag mbɔma mbɔb mbir. 21Mɛ njɔl wa bɛ, ateb wɔ ɔre nkora nɛnom, ɔyege ji ɔdɛnɔ kag, ɔfuga ji ɔdɛnɔ bim.’ 22“Ndɛ njo afanga, ‘Mɛ na kɔ alom aya nama, wɔ mbeb aligbɛna ndɔgalitom, wɔ ɔnyinyi arɛ mɛ nkora nɛnom yɔ, mɛ nyege ji ndɛnɔ kag, nfuga ji ndɛnɔ bim. 23Bɛjom ji ɔdɛnɔ kag akpuga ama na njo ɛtore akpuga, na ngara yi nɔ fɛngɛ njim na kɔ akpuga ma na nseng?’ 24“Abong atɔg anɛ ba ayemɔ fɔ, ‘Tabɛ wɛ akpuga yafɔ ɔkarɛ nɛ yɔ akpenɔ ɛkpuga woba.’ 25“Abɔ abong atɔgɛ, ‘Nsɔjira njo, ɛyogyoge akpe ɛkpuga woba!’ 26“Wɛ afanga, ‘Mɛ ntɔga wa ndɛ nɛ yɔ akpenɔ alɛ kpɛ kpɛlɛ, nɛ yɔ adɛnɔ bɛl, ɛjɔl ji akpenɔ alɛ tatabɛ. 27Anɛ ba ajing abama bafɔ ba adɛg sɛb arɛ mɛ njɔl ntol abɔ, ba na abɔ fa wun ɔyol abɔ na libri ɛlama.’”Jisɔs ayɛl na Jɛrusɛlɛm mɔng ntol
Matiyu 21.1-11; Mak 11.1-11
28Naji Jisɔs alɔ bong fɛb, atum agbɔ mba na Jɛrusɛlɛm. 29Naji arirɔ alagɛ ɛjiba Bɛtfeg na ɛjiba Bɛtani na Ɛwɔng Ɔlif, atom batɔnanjim abɛ abal, abong atɔg abɔ. 30“Ba sɔng na ɛjiba ji ɛreanɔ wun na ɔsi, mɔng wun ɔyɛla wun ɔla yɛn mɔn ɛnyinya mɔng atugɔ, ji nɛ awiawi adɛdɛ koma, fungi wun ɔkɔ ɔba naji fa. 31Nɛ awiawi alɔ bib wun, ‘Ɛker nan wun ɔfungi?’ Ba tɔgɛ arɛ, ‘Tata yɔ asɛba.’” 32Anɛ ba atomɔ ajil ayɛn anɔ mɔng ngara yi Jisɔs abɔngɔ 33Naji ajɔlɔ fungi mɔn ɛnyinya, nfɔngɛ abib abɔ, “Ɛker nan yɔ wun ɔfungi mɔn ɛnyinya ɔfɔ?” 34Abɔ afanga, “Tata yɔ asɛba.” 35Akɔ mɔn ɛnyinya aba karɛ Jisɔs, ayalɛ wɛ abɔma atab Jisɔs akone. 36Naji asenga, anɛ ayalɛ abɔma abɔ na mba. 37Naji arirɔ alagɛ Jɛrusɛlɛm na mfom yi mba ajɔlɔ ji ɛwɔng Ɔlif, batɔnanjim abɛ akuma njege Ɔsɔwɔ na ɛyɛbalitem na nyura lilom ateb akpɔga ɛsi a nsɔl kpakpa ya abɔ alɔ yɛn. 38Abɔ abong,“Lifola ɛjɔl na ntol yɔ abalɔ
na mbeng a Tata!”
“Likɔna na libonta na lijega li ɛyurɔyura!” 39Asi anɛ ba Farasi na ɛbɔngɛ jifɔ atɔg Jisɔs, “Nteteba, tɔg batɔnanjim aba alɔ ɛyɔg!” 40Jisɔs afanga abɔ arɛ, “Mɛ ntɔga wun, abɔ alɔ lɔ ɛyɔg atal ala kuma nkɔna.”
Jisɔs alul abangɛ Jɛrusɛlɛm
41Naji arirɔ alagɛ Jɛrusɛlɛm ayɛn ɛjiba akuma nlula abangɛ, 42abong, “Arenɔ arɛ wun ɔnyinɔnyi ɛlɛl ji ɛla ba na likɔna, batig ana ali wun bir. 43Ngara anɔnga alaga yi anɛ ba ɔjing abina ala si ɛga akag wun na lika, atob wun asibi agba wun akak. 44Ala wun rungi na abɔn abina na ɔnwɔlɛ bi ɛga. Ɛjɔl lital trang ɛnim sa li ɛla koma na ntɛm, ateb arɛ wun ɔrengam ngara yi Ɔsɔwɔ abalɔ arɛ aba anyangɛ wun!”Jisɔs ayɛl na Njo Ɔsɔwɔ
Matiyu 21.12-17; Mak 11.15-19
45Jisɔs ayɛl na Njo Ɔsɔwɔ, akuma nkama anɛ ba ajɔlɔ gore nsɔl. 46Wɛ abong atɔg abɔ arɛ, “Agba yɛlɛ na nwɛr Ɔsɔwɔ, ‘Ɛtɛk ɛjama ɛla jɔl ɛtɛk ɔrɔ, wun ɔgba fɛngɛ ɔkɔ ɔbom ɛtɛk awaju!’” 47Kpakpa afo Jisɔs ajɔl teb anɛ na Njo Ɔsɔwɔ. Atol a balemanjɔm akarɛ Ɔsɔwɔ, ba teba ajing ya Mosis na atobɛsi anɛ ajɔl sɛb arɛ ayolɛ. 48Amalam ayɛn mba yi alɛ yol, ateb arɛ anɛ kpakpa ajɔl sɛb arɛ ayog alom ayɛ.
Copyright information for
AbmSC