Luke 21

Ɛyarɛ ji nkala nkuanɛ akarɔ Ɔsɔwɔ

Mak 12.41-44

1Jisɔs abri na libo ayɛn afang anɛ akaga ɛyarɛ na likul li akaga akpuga na Njo Ɔsɔwɔ. 2Titi atɔb ayɛn nkpak a nkala nkuanɛ akaga akpuga abal. 3Wɛ abong, “Mɛ ntɔga wa ɛtete, nkpak a nkala nkuanɛ yɔfa wɛ yɔ alɔ ga kag aseng anɛ bangɔ kpakpa. 4Anɛ bangɔ akarɛ ɛyarɛ abɔ na afang ya abɔ akpenɔ, na ɔkpak ɛbɛ akak fɛb ji akpenɔ ji akɔga akpena.”

Jisɔs abong ɔbangɛ lirungi li Njo Ɔsɔwɔ

Matiyu 24.1-2; Mak 13.1-2

5Ɛrik batɔnanjim abɛ ajɔl bong abangɛ Njo Ɔsɔwɔ ngara mɔng akɔlɔ anɔba atal aleba na ɛyarɛ ji ala karɛ Ɔsɔwɔ. Jisɔs abong arɛ, 6“Atal yafa fɛb ya wun ɔyɛna, ngara ayɔbak yi ɛjɔl lital trang ɛnim kpɛ jɔl ɛkoma na ntɛm; ala rɔ nsɔl kpakpa na nde.”

7Abɔ abibɛ, “Nteteba, ba ngara yi nsɔl yi fa ɛla lem? ba ndenge yi ɛla yɛn arɛ ɛlag lem?”

8Jisɔs afanga, “Ba kone ɛkpo adɛ wun nim. Ateb ɛgbem ala ba na mbeng ɛma, abonga arɛ, ‘Mɛyɔ ndenɔ krayis, ngara agba lome.’ Ɔtɔb tɔna abɔ. 9Ɔlɔ yog ɔbangɛ bita na ɛlema nsim, ɔtɔb bɛ. Nsɔl yifɔ ɛla teg ɛgbɔ mba ɛlem fɔ tutu arig ɛreanɔ nkulsi.”

10Akpɛ bong atɔg abɔ, “Bijiba ɛla nɔg na bijiba, ɛjiba ɔtol na ɛjiba ɔtol. 11Nde ajɔ yɛnyɛngɛ, ɔgba na abe ayam ala jɔl na kpakpa afom, nsɔl ɛkokob na ntakpa ndenge ala jog na libo.

12“Nig nsɔl yi fa ɛlem, ala wun kag ɛriga. Ala wun tur aji na ɛkpasega na agbakɔbɔ, ala wun kɔ aba na libri atol na batora nfam aba lam wun, ateb mbeng ɛma. 13Fɔyɔ ɔla bɛl ɛyaga ji ɔla tɔg abɔ abangɛ mam. 14Nig ngara ari, lem litem ɛla wɔ ɔdɛ kɛrɛ ji ɔfenɔ ɔji fanga abɔ. 15Ateb are mɛ na karɛ ateng alom na ɛkukuna ji ɛjɔl nɛ ɔjing ɔwa wurang adɛ mal afanga, nig afabɛ. 16Ba nsɔjina, nijina, abɔnyɛn abina, nub ɛyina, na atɛm abina, ala wun tɛn. Ala yol ɛrik anɛ ba ndɛga. 17Anɛ kpakpa ala wun gbak ateb ɛsi ɛjama. 18Ɛjɔl linyu tirang na ɛsi ɛjina ɛnim tan. 19Yema nkorenkore, wɔ ɔla bɛl ɔyangɛ.

Jisɔs abong abangɛ lirungi li Jɛrusɛlɛm

Matiyu 24.15-21; Mak 13.14-19

20“Wɔ ɔlɔ yɛn ɔsɔja ɛtob Jɛrusɛlɛm asibi, wɔ ɔla kukun arɛ ngara ndungi ɛyɛ agba rir 21Nɔng anɛ ba arenɔ Judiya abɛna asɔng na biwɔng, nɔng anɛ ba arenɔ na Jɛrusɛlɛm ajog, anɛ ba arenɔ na ɛtegla ji Jɛrusɛlɛm adɛ kpɛ fɛngɛ njim fɔ. 22Fɔyɔ ɛla jɔl ngara ɛriga, ɛlem, ji ayɛlɔnɔ na Nwɛr Ɔsɔwɔ ɛjɔl ɛtete. 23Ɛla jɔl njɛn ɛjom na ofo bifɔ, ɛkarɛ abakal ba ala na abakal ba akpenɔ abɔn! Ntakpa ɛriga ala jɔl na nde yifa, ɛraga litem Ɔsɔwɔ ɛla nyɛndɛ anɛ. 24Anɛ bandɛga ala kɔ ɔkankang ayol abɔ, bangɔ ala tab abɔ mɔng agbakɔbɔ na kpakpa bijiba bi ɛyeng. Anɛ ba adɛnɔ jog Ju ala nyɛndɛ anɛ ba Jɛrusɛlɛm na ata tɛtɛ ngara yi anɛ ba adɛnɔ jog Ju aseng.

Ɛbabaga ji Mɔn a Nɛnom

Matiyu 24.29-31; Mak 13.24-27

25“Akpɔga ɛsi a ndenge ala jɔl na njol, nwɛ na aradando. Na ɛyeng, bijiba kpakpa ɛla jɔl na ɛfegayɔ na buburi ateb ɛyɔg ji ntakpa ɛbuk alib na lijɛn li atakpa aya. 26Ateb na ɛkokob anɛ ala gbɔ na nde naji asega nsɔl yi ɛlagɔba nema na ɛyeng, ɛkɔ ji nsɔl yi libo ɛla nyɛnyɛngɛ. 27Na ngara yifɔ, abɔ ala yɛn mɔn a nɛnom abaga na liro na ɛkɔ na ntakpa liloba. 28Naji nsɔl yifa ɛlɔ bɔm nema, tum yema wɔ ɔtab ɛsi, ateb arɛ ngara ɔyangɛ ɛba agba lome.”

Ligan li ɔte ɔjuju

Matiyu 24.32-35; Mak 13.28-31

29Jisɔs atob abɔ ligan lifa: “Bri ɔjuju na nte yingɔ. 30Akpab ayɛ alɔ jog, wɔ nfɔnɛ ɔlakukun arɛ nalɛ agba kped. 31Ɛtɔb ɛreanɔ, ɔlɔ yɛn ndenge abangɛ nsɔl yifɔ yi ntɔgɔ wa ɛlema, wɔ la kukun arɛ Ɔtol Ɔsɔwɔ ɛgba kped.

32“Mɛ ntɔga wun ɛtete, kpakpa nsɔl yifa ɛtɛk ɛlem nig anɛ kpakpa ba arenɔ mber batig akpɔ. 33Libo na nde ɛla seseng, alom ama anim teg aseng.

34“Bakone ɛkpo, anɔ arig nkanter ɛyina ala jɔl na nsɔl lili na ɛwɔwɔ na ɛfegayɔ ji likpen. Ɔtɔb nɔngɛ afo afɔ abɔb wun mɔng ɛkpɔga naji wun ɔdɛnɔ kone ɛkpo. 35Ɛla jɔl mɔng ɛkpɔga ɛkarɛ anɛ kpakpa ba arenɔ na ɛyeng. 36Ba jɔl na nbabɛ, ɔjɔ kag ɔrɔ kpakpa ngara naji ɔla fɛma nsɔl yi ɛlagɔ lem, naji wun ɔmal ɔyema na libir li Mɔn a Nɛnom.”

37Ɔfo abiabi Jisɔs ajɔl teb na Njo Ɔsɔwɔ, ligoligo aliali atore afɛngɛ njim na Ɛwɔng Ɔlif. 38Anɛ kpakpa ajɔl ba ɔforanfo bribri kpakpa afo na njo Ɔsɔwɔ abaga ayoga wɛ.