Psa 85 | AmhNASV | STEP | ለመዘምራን አለቃ፤ የቆሬ ልጆች መዝሙር። እግዚአብሔር ሆይ፤ ለምድርህ በጎ ውለሃል፤ የያዕቆብንም ምርኮ መለስህ።

‏ Psalms 85

ስለ ሰላም የቀረበ ጸሎት

ለመዘምራን አለቃ፤ የቆሬ ልጆች መዝሙር።

1 እግዚአብሔር ሆይ፤ ለምድርህ በጎ ውለሃል፤
የያዕቆብንም ምርኮ መለስህ።
2 የሕዝብህን በደል ይቅር አልህ፤
ኀጢአታቸውንም ሁሉ ሸፈንህ። ሴላ
3 መዓትህን ሁሉ አራቅህ፤
ከብርቱ ቍጣህም ተመለስህ።

4 መድኀኒታችን የሆንህ አምላክ ሆይ፤ መልሰን፤
በእኛ ላይ የተቃጣውን ቍጣህን መልሰው።
5 የምትቈጣን ለዘላለም ነውን?
ቍጣህስ ከትውልድ እስከ ትውልድ ይቀጥላልን?
6 ሕዝብህ በአንተ ሐሤት ያደርግ ዘንድ፣
መልሰህ ሕያዋን አታደርገንምን?
7 እግዚአብሔር ሆይ፤ ምሕረትህን አሳየን፤
ማዳንህን ለግሰን።

8 እግዚአብሔር አምላክ የሚናገረውን እሰማለሁ፤
ለሕዝቡ፣ ለቅዱሳኑ ሰላምን ይናገራልና፤
ዳሩ ግን ወደ ከንቱ ምግባራቸው አይመለሱ።
9 ክብሩ በምድራችን ይኖር ዘንድ፣
ማዳኑ ለሚፈሩት በርግጥ ቅርብ ነው።

10 ምሕረትና ታማኝነት ተገናኙ፤
ጽድቅና ሰላም ተቃቀፉ።
11 ታማኝነት ከምድር በቀለች፤
ጽድቅም ከሰማይ ተመለከተች።
12 እግዚአብሔር በጎ ነገር ይለግሳል፤ ምድራችንም ፍሬዋን ትሰጣለች።
13 ጽድቅ በፊቱ ይሄዳል፤
ለአረማመዱም መንገድ ያዘጋጃል።