2Ti 3 | BDD | STEP | Nuwanuwagu ma nuwau 'ida sabwalena tuta 'ana 'ebelosaloha 'inaonama weyahina, 'abehega tutaedi 'oidiya mwau baibaiwana 'abwa silatu.

‏ 2 Timothy 3

Tuta 'ana 'ebelosaloha weyahina

1 Nuwanuwagu ma nuwau 'ida sabwalena tuta 'ana 'ebelosaloha 'inaonama weyahina, 'abehega tutaedi 'oidiya mwau baibaiwana 'abwa silatu. 2 Weyahina tutaedi 'oidiya nata tomota taudimo weyahidi sinuwanuwatuhu, ma wasawasa 'ana hamwa nata 'imadou 'oidiya, ta sinuwa hanehane ta sigagasa ma wete siheliya. Ma sinadiyao ma tamadiyao 'enadi nata geya sihematamatana, ta tomota 'idi paihowa bwebwe'adi weyahidi nata geya siloyauwedo. 3 Mumugadi guguyou 'oinega gesowana si'atemuyamuya, ma hesi sihe'ahwa panapanawa besobeso, ma toganawala hedade. Ma sigamwasowala besobeso wete, ta wete mumuga bwebwe'ana 'ana tologwahatao, 4 to'wayama, ma galana 'oina sihewaiwai, ma gwae hane hedada, ma geya Yehoba sihelauwe, ta hesi taudimo 'idi yaliyaya weyahina sinuwanuwatuhu.

5 Tomotaedi sitapwatapwalolo tuwa ma Yehoba 'ina waiwai geya sihemisae, 'oinega 'idi tapwaloloina tuwa ginaula besobeso, 'oinega bodaedi taudi sahena 'oidiya 'uluhuluhu. 6 Weyahina tupwadi 'oidiyega hadai siluhuluhu wahiwahine geya 'idi nuwatuhu pa'alidi sabi 'abowedi, ma wahiwahineyedi sisanasanapu taudi topui, 'oinega 'amna hagana ma hagana silolotoho soladiya ta simulimuliyedi, 7 'oinega he'ita hagana ma hagana 'ana tohesagohao ta geya sawasawahina ma he'ita moisa sisanapu.

8 Tomotaedi he'ita moisa silo'aleheya, gide taudi mwalo Yanisi ma Yamilisi Mosese silo'aleheya, ta 'adi 'ita gide taudi tohemisa ma 'atediya 'abo ma nuwatuhu galadi simiyamiya. 9 Ma hesi muhemuhena sibe'u, ma tomota baibaiwadi si'itadi, mumugadi galadi gide mwalo Yanisi ma Yamilisi mumugadi galana, ta tomota si'iteya.

Timoti 'ana loina

10 Ma 'owa bo'i 'usanapugauwa, 'igu he'ita, ta mumugagu, 'igu 'edao, 'igu hemisa, 'igu 'alama'i'ita, ta 'igu helau ta 'igu toholo pa'ala. 11 Ma 'asaedi Anitioki ma Ikoniyami ma Lisitila 'oidiya yamiyamwauwa ta 'agu muyaedi tomota 'oidiyega yalobediya wete 'usanasanapu, tupwaedi 'oidiya yamiyamwauwa moisa, ta mwauwedi mabwaiyadi 'oidiyega 'ida Cinapwana 'i'abihetegauwa.

12 Moisa, 'eguma Yesu Keliso tahemisae, ma tatagwalegita 'ina 'eda bwebwe'adi 'oina, nata miyamwau tomota 'oidiyega taloba. 13 Ta wete taudi togala, ma tomota 'adi to'abowao 'idi puiyao sihemadou moisa, weyahina Seitani bo'i 'i'abowediya.

14 Ta 'owa hesi he'itaedi 'uhemisa pwaidiya ta 'usanapudiya. He'itaedi 'uda muliyedi, weyahina tauma 'ino tohe'itao bo'i 'usanapumaiya 'abehega 'ima he'itaowedi wete 'amulimuliyedi. 15 Ma 'owa 'uboi wete 'ino tuta gwamega ma nige bewa Buki He'asisi 'ina gwae 'ana tohasila, ta 'ihehe'itego 'abehega 'ida hemisa Yesu Keliso 'oina sowasowana 'i'abihetegita.

16 Ma weteyage Buki He'asisi 'ina gwae mabwaiyana Yehoba Yaluyaluwanega sitauyama, ta gwaeyedi 'oidiyega 'ada he'ita ma 'ada lohatoto ma 'ada gihedumwalu 17 ta 'ida waiwai talobalobadi Yehoba 'ina paihowao weyahidi, weyahina Buki He'asisi 'ina gwae 'oidiyega Yehoba 'i'atububugita, ta 'ina paihowao bwebwe'adi mabwaiyana sawasawahida.