Col 2 | BDD | STEP | Nuwanuwagu ma wanuwa sabwalena 'abehega taugu yahetahetapewa madouna 'omi weyahimi, ma wete Leodisiya weyahidi, ma wete taudi 'abwa geya si'itegau weyahidi.

‏ Colossians 2

1 Nuwanuwagu ma wanuwa sabwalena 'abehega taugu yahetahetapewa madouna 'omi weyahimi, ma wete Leodisiya weyahidi, ma wete taudi 'abwa geya si'itegau weyahidi. 2 Ma 'ane wete taudi helauwega sihe'iya'iyagu moisa, ma'adi lotohona bwebwe'ana ta ma'idi sanapu moisa, 'oinega siyaliyaya madouna, weyahina sinuwa sabwalena sanapuina mwalo dahwadahwaina, beno Keliso. 3 Ma Kelisoina 'oina sonoga ma sanapu mabwaiyana simiyamiya, beno 'ida wasawasa madouna.

4 Bewa yagwaegwae ma 'oinega sahena hali tomota 'idi gwae hotohotodiyega si'abo'abowegomi. 5 Sauga bewa wahigu 'imiya bwaga 'oimiyega, ta 'igu nuwatuhu 'oimiya 'imiyamiya, 'oinega yayaliyaliyaya 'imi miya bwebwe'ana ma'imi hemisa waiwai Keliso 'oina weyahina.

Keliso ba'idadai

6 Bada Yesu Keliso 'oina 'atemi watagwala pwaidiya, 'oinega 'ilobwainegomiya ma tauna 'ina waiwaiyega watautauya. 7 Weyahina Kelisoina 'imi hemisa huhuna, ta 'ana 'abihemadou, ta 'ana 'abihepa'ala, gide 'ahe'itegomiya, ma weyahina waloyauwedo madouna.

8 Gesowana teya 'i'abowegomi tomota 'idi sanapuwega, weyahina sanapuwedi ginaula bwagabwaga bale'uwega, ma geya Keliso 'oinega. 9 Weyahina Keliso 'iboi 'oina Yehoba 'ina waiwai ta 'ina mumuga mabwaiyana simiyamiya. 10 Ta Keliso 'oinega bwebwe'ana moisa waloba pwaiya, tauna aneloseyao ma hi'ahi'a 'ihewaiwai sinediya ta 'iloina sinediya.

11 Ma wete Keliso 'oinega 'ami 'ila'ilala walobeya, gide 'upwa, geya 'wapimi 'oina, ma hesi bale'u mumugana 'atemiyega 'i'upwa yahuleya. 12 Coinega Keliso ba'idamiu babitaiso wa'eweya gide 'amasa, ta wete Keliso ba'idamiu 'imi babitaisowega watoholo hila. Weyahina Yehoba 'ina waiwai wahemisaeya 'abehega Keliso 'amasega 'i'abihetoholo hileya.

13 Comi mwalo geya 'wapi'upwa* waloba, ta 'imi puiyao weyahidi gide 'ama'amasimi, ma hesi Keliso ba'idadai yawasi bwebwe'ana Yehoba 'i'ebwaegita, beno 'ida puiyedi 'inuwasamudiya. 14 Eeta 'ida lowaga 'ana loina mwauna 'i'upwa yahuleya, ma 'ana kelose 'oina 'itutu hepa'iya. 15 Ma wete welabanao ma yaluyaluwa galadi gide hi'ahi'a 'i'abi suluhediya ma 'ana keloseyega 'adi debamwadina 'ilaguya, ta 'ihewaiwai sinediya.

16 Coinega sahena 'eta taiya 'i'ahwa'ahwa galagalaegomi 'ami bo nuwana 'ami we'aha weyahidi, 'eguma 'omi 'adi bwabwale geya wapaihowadi, nuwana wai'ena 'ehauna 'ana sauga, bo nana Sabati 'oidiya. 17 Ginaulaedi ma'ama'ayau tuwa, ma 'adi moisaina Keliso tauna. 18 Coinega sahena 'eta taiya 'i'ahwa'ahwa galagalaegomi weyahina 'omi geya watapwa tapwalolo ma'imi nuwasulu aneloseyao 'oidiya. Weyahina tomotaedi 'adi sanapu nihiyega weyahidi sigagasa, ma sinuwahane mumuga bale'u 'oidiyega. 19 Ma hesi Keliso 'ana nuwatuhu geya 'oidiya, tauna debada, ta tauda yahinao gide nimana nana 'ahena, wahina 'aigeda tuwa. Wahinaowedi sipaipaihowa 'aigeda wahi 'ana bwebwe'ana weyahina ma 'imadomadou, ta 'ana madouina Yehoba 'ina paihowega.

Keliso 'oinega yawasida 'ehauna

20 Mwalo wa'amasa Keliso ba'idamiu, 'oinega mumuga gogo gabulena 'ana loina 'oimiya 'ilolaguwa, ma to'aha weyahina 'abwa wapaipaihowa gide gogo gabulena mumugana. 21 To'aha weyahina tomota 'idi he'itao ta 'idi loinao wahehematamatanedi 'abehega gesowana 'e'ahai hehe'asisina wa'abi'abitohodi bo walolotohodi. Ta ginaulaedi sawasawalidi ma 'eguma tahepaihowedi, nata sigumwala.

23 Moisa, loinaedi 'adi 'ita gide sanapu moisa, weyahina 'adi tomuliyaowedi ma'idi he'asisi ta ma'idi nuwasulu sipaipaihowa, ta wete wahidi sihemuyedi; ma tuwa geya 'eta 'idi waiwaimo, ma hesi wahidi 'idi nuwatuhu dahwana 'iloinaedi.