Gal 3 | BDD | STEP | Comi meGaletiya yauyauleimi! Taiya hede 'obega 'i'abihe 'wanigemiya? Mwalo 'ahe'itegomiya ta nuwami 'isabwalena moisa Yesu Keliso weyahina, 'abehega keloseya 'i'amasa, ma 'iyamo wanuwanaideya! Coinega wanuwanuwatuhu 'abehega Mosese 'ina loina 'ana hematamatanega 'abihetena waloba?

‏ Galatians 3

Hemisa Keliso 'oina

1 Comi meGaletiya yauyauleimi! Taiya hede 'obega 'i'abihe 'wanigemiya? Mwalo 'ahe'itegomiya ta nuwami 'isabwalena moisa Yesu Keliso weyahina, 'abehega keloseya 'i'amasa, ma 'iyamo wanuwanaideya! Coinega wanuwanuwatuhu 'abehega Mosese 'ina loina 'ana hematamatanega 'abihetena waloba? 2 Coinega 'aigeda hesilala yahesilalegomi, “To 'eda 'oinega Yaluyaluwa Tabuna wa'eweya? Mosese 'ina loina 'ana paihowao 'oinega? bo Keliso tetelina wahesagoheya ta wahemisaeya?” 3 Yauyauleimi! Cimi tapwalolo 'ina hegaina wasanapuya 'abehega Yaluyaluwa Tabuna 'oinega, 'oinega geya'abwa watohotoho ma 'imi tapwalolo wada losalohi waboi 'imi paihowamo 'oinega! 4 Nata togidega ginaula mabwaiyana waloba 'asaediya, eeta Keliso 'ana hemisa 'oina wa'aipate 'asaeya?

5 Caigeda wete hesilala: Yehoba tauna Yaluyaluwa Tabuna 'i'ebwa'ebwaya 'oimiya ta 'ina waiwaiyega 'imi paihowa waiwaidi wapaipaihowadi. Togidega 'ina 'ebwayaedi 'oimiya Mosese 'ina loinao 'adi paihowa 'oinega bo Keliso tetelina 'ana hemisa 'oinega?

6 Wanuwatuhuyahi Ebalahamo 'abehega tauna Yehoba 'ihemisaeya, 'oinega Yehoba 'i'ahwa bwebwe'aneya, 7 eeta wasanapu Yehoba 'ana tohemisao 'abehega taudi gidemusa Ebalahamo natunao.

8 Mwalo hene Yehoba Ebalahamo 'ihegwaeya, 'igwae,

“Cowa 'oiguwega 'abwa taudi hali 'asa tomotaedi 'idi 'ebe yaliyaya siloba.”
Ma Yehoba 'ina gwae bewa Buki He'asisi 'alona 'ihepwaila nugeteya, 'asa ganamuli baibaiwadi 'adi 'abihebwebwe'ana weyahina, 'eguma Yehoba 'oina sihemisa.

9 Coinega tasanapuya tohemisao mabwaiyadi 'abehega tohemisaina Ebalahamo ba'idadiyao 'idi 'ebe yaliyaya siloba.

10 Ma hesi 'eguma taiyawedi sinuwatuhuya 'abehega Mosese 'ina loina 'ana hematamatana 'oinega sibwebwe'ana, 'ahwa galagalamo nata siloba, weyahina Buki He'asisi 'igwaeya,

“Loina mabwaiyadi buki bewa 'alona 'eguma taiya geya 'imuliya bwaibwainidi, nata 'ahwa galagala 'iloba.”
11 Moisa, geya sawasawahina ma Yehoba tomota 'i'ahwa bwebwe'anegita 'eguma Mosese 'ina loinamo tahematamatane. Weyahina 'ina gwae 'igwaeya,

“Todumwalu 'idi hemisega yawasidi siloba.”
12 Ma hesi Mosese 'ina loina 'ana 'eda hagana, ta hemisa 'ana 'eda hagana. Loina 'ana 'eda Buki He'asisi 'oina bewa gide sileleya, 'igwaeya,

“Ceguma taiya loina mabwaiyana 'ihematamatanedi yawasina bwebwe'ana 'iloba.”
13 Ta geya sawasawahina loina mabwaiyana tahematamatanedi, 'oinega Kelisoina 'ihemiyalaenegita ta 'i'abihetegita loina 'ana mwau 'oinega. Loina 'ana mwau bewa, 'eguma geya tada hematamatanediya ta'amasa, 'oinega Keliso tauda weyahida 'i'amasa gidemusa taudi togala madoudi 'adi lohe'amasa kelose 'oidiya. Buki He'asisi mwalo 'ina gwae bewa weyahina 'igwaeya,

“Ceguma taiyawedi kelose 'oidiya silagudi ma si'amasa, to'amasaedi 'ahwa galagala siloba Yehoba 'oinega.”
Eeta Keliso tauda weyahida mwauina 'ilobeya.

14 Ma Yesu Keliso 'oinega taudi hali boda 'asa ganamuli tomotaedi yaliyaya siloba, gidemusa yaliyayaina Yehoba 'igwae hemisaeya Ebalahamo 'oina, 'abehega mabwaiyada 'ida hemisega to'aha Yehoba 'igwae hemisaeya 'i'ebwaegita, beno Yaluyaluwa Tabuna.

Bobolohe weyahina

15 Ciyagwao, 'aigeda 'ebe'ita 'ida mumuga 'oinega ya'ebwaegomi, bewa gidemusa: Ceguma loheya 'i'iunamo 'i'amasa, ta 'ina tobwatobwa nuwana 'ina 'ebeloina 'i'ebwae wahana 'oina, 'ina gwaeyedi geya sowasowana 'eta taiya wete weyahina 'igwae.

16 Gidemusa wete Yehoba 'ina gwae Ebalahamo ma 'ina susu 'i'ebwaediya 'imiya hataya. Geya 'abehega Buki He'asisi 'igwaeya “Susuwao 'oidiya,” ma hesi 'ina susu 'aigeda tuwamo, beno Keliso.

17 Cana sanapu bewa Yehoba 'ina gwae hemisa 'ilagu nugeteya Ebalahamo 'oina, 'oinega bolime powa handeledi ma teti muliyetega Mosese 'ina loina 'ilatuwa. Ma geya sawasawahina ma gwae hemisaina 'iligehi bo nuwana 'ibui loinaina 'oinega, ma hesi gwae hemisaina 'ina waiwai 'abwa 'imiyamiya.

18 Wanuwatuhuyahi 'eguma 'ida 'ebe yaliyaya taloba Mosese 'ina loinega, beno 'abehega geya Yehoba 'ina gwae hemisa 'oinega. Geya! Weyahina mwalo Yehoba 'igwae hemisa Ebalahamo 'oina.

19 Ma to'aha weyahina loina 'ilatuwa? Loinaina 'i'abilatuheya 'oida 'ida puiyao weyahidi, ma 'oida 'imiyamiya 'ana siga Ebalahamo 'ina susu tauna Yehoba 'igwae hemisaeya 'ilatuma. Ma loinaina aneloseyao 'oidiyega Yehoba Mosese 'i'ebwaeya, ta Mosese 'i'ebwaeya tomota 'oidiya. 20 Ta Yehoba 'ina gwae hemisaina 'ina 'ebwaya hagana, weyahina Yehoba tauna 'i'ebwaeya dumwaluweya Ebalahamo 'oina.

Cida hemisega Yehoba 'i'ahwa natunegita

21 Geya'abwa wanuwanuwatuhu 'abehega Mosese 'ina loina 'ilo'aleheya Yehoba 'ina gwae hemisa. Geya. Weyahina geya 'eta wete loina sawasawahina ma yawasida 'i'ebwaegita, bo 'ida mumugao 'ida 'abihe bwebwe'anedi. Geya. 22 Ma hesi Buki He'asisi mabwaiyada 'i'ahwa galaegita, 'oinega Yesu Keliso 'ana tohemisaomo Yehoba 'ina gwae hemisa siloba.

23 Mwalo tutaina 'oina hemisa geya tasanapu, tauda Mosese 'ina loina 'ipaigita eeta tamiyamwauwa, ma 'ana siga Yehoba hemisa 'igihelatuheya 'oida. 24 Cana 'ita gide loinaina 'i'itayahigita ta 'ana siga Keliso 'ilatuwa, eeta 'eguma tahemisa Keliso 'oina, nata Yehoba 'i'ahwa bwebwe'anegita. 25 Bewa tuwa Keliso 'inao pwaima, 'oinega loinaina 'ana 'itayahi 'oida 'igumwala, 26 ma hesi 'ida hemisega Yehoba mabwaiyada 'i'ahwa natunegita, Yesu Keliso mahetedai. 27 Weyahina taiyawedi 'omi wababitaiso Yesu Keliso saninega Kelisoina mahetemiu wamiya pwaiya.

28 Weyahina mabwaiyada Keliso mahetedai, ma geya 'eta wete wataha solada 'imiyamiya. Coinega meYudiya ma hali bodao mahemahetena, ma babadao ma 'idi topaihowao mahemahetena, ma wete meloheyadi ma mewahinedi mahemahetena, weyahina mabwaiyada Yesu Keliso 'oina taheboda 'aigeda, 29 ma mabwaiyada Ebalahamo 'ina susuwao, weyahina mabwaiyada Keliso 'ina bodao, 'oinega ta'eweya Yehoba 'ina gwae hemisa, beno Ebalahamo 'oina mwalo 'i'ebwaeya.